കെ. സുധാകരന്‍ ബി.ജെ.പിയിലേക്ക് പോകാന്‍ എത്ര തവണശ്രമം നടത്തി, പോകാനായി ഇവിടെനിന്ന് വണ്ടി കയറി ചെന്നൈയിലെത്തിയതാണ്, ഇന്നലെ സുധാകരന്‍ മരുന്ന് കുടിച്ചിട്ടുണ്ടാകില്ല, ഓര്‍മ ശക്തി വീണ്ടെടുക്കൂ, നല്ല മനുഷ്യാനാകൂ; സുധാകരനെതിരേ ജയരാജന്‍

തിരുവനന്തപുരം: താന്‍ ബി.ജെ.പിയിലേക്ക് പോകുന്നെന്ന കെ.പി.സി.സി. പ്രസിഡന്റ് കെ. സുധാകരന്റെ ആരോപണങ്ങള്‍ക്ക് മറുപടിയുമായി എല്‍.ഡി.എഫ്. കണ്‍വീനര്‍ ഇ.പി. ജയരാജന്‍. അസംബന്ധവും അടിസ്ഥാനരഹിതവുമായ കാര്യങ്ങളാണ് സുധാകരന്‍ പറഞ്ഞത്. സുധാകരനെതിരെ മാനനഷ്ടക്കേസ് നല്‍കുമെന്നും ജയരാജന്‍ പറഞ്ഞു. 
കെ. സുധാകരന്‍ ബി.ജെ.പിയിലേക്ക് പോകാന്‍ എത്ര തവണശ്രമം നടത്തി. ബി.ജെ.പിയിലേക്ക് പോകാനായി ഇവിടെ നിന്ന് വണ്ടി കയറി ചെന്നൈയിലെത്തിയതാണ്. ഇത് മണത്തറിഞ്ഞ കോണ്‍ഗ്രസ് നേതാക്കള്‍ ചെന്നൈയിലുള്ള കോണ്‍ഗ്രസ് നേതാക്കളെ കൊണ്ട് ഇടപെടുവിച്ച് തിരിച്ചയയ്ക്കുകയായിരുന്നു. അസം മുഖ്യമന്ത്രി ഹിമന്ത ബിശ്വ പറഞ്ഞത് കേരളത്തിലെ കോണ്‍ഗ്രസിനകത്ത് സുധാകരനും മറ്റുചിലരും ചേര്‍ന്ന് രൂപീകരിച്ച് ബി.ജെ.പിയുമായി ചേര്‍ന്നുപോകാന്‍ ആഗ്രഹിക്കുന്നുവെന്നാണ്. അടുത്ത നിയമസഭാ തെരഞ്ഞെടുപ്പിനോടനുബന്ധിച്ച് ഇവര്‍ പുതിയ പാര്‍ട്ടിയുണ്ടാക്കുമെന്നും അദ്ദേഹം പറഞ്ഞിട്ടുണ്ട്. ഇക്കാര്യം സുധാകരന് നിഷേധിക്കാന്‍ സാധിക്കില്ല. 
അനില്‍ ആന്റണി പോയതുപോലെ ബി.ജെ.പിയിലേക്ക് പോകാനാണ് സുധാകരന്‍ ശ്രമിച്ചത്. ചെന്നൈയിലെ ബി.ജെ.പി. നേതാവ് രാജയാണ് തന്നെ ബി.ജെ.പിയിലേക്ക് ക്ഷണിച്ചതെന്ന് കെ. സുധാകരന്‍ തന്നെ പറഞ്ഞിട്ടുണ്ട്. അമിത് ഷായുമായി കൂടിക്കാഴ്ച നടത്താന്‍ കണ്ണൂരിലെ ബി.ജെ.പി. നേതാക്കള്‍ ഏര്‍പ്പാടുകള്‍ ഒരുക്കിയിരുന്നെന്ന് സുധാകരന്‍ തന്നെയാണ് പറഞ്ഞത്.
താന്‍ ആര്‍.എസ്.എസിനോട് പോരാടി വന്ന നേതാവാണ്. ബി.ജെ.പി. തന്നെ പല തവണ വധിക്കാന്‍ ശ്രമിച്ചതാണ്. നിങ്ങളെ പോലെ വൃത്തികെട്ട രാഷ്ട്രീയമല്ല എന്റെത്. രാജ്യത്തിന് വേണ്ടി പോരാടുന്ന രാഷ്ട്രീയമാണ്. ആ പാര്‍ട്ടിയുടെ അന്തസ് ഉയര്‍ത്തിപ്പിടിച്ചാണ് ഞാന്‍ പ്രവര്‍ത്തിക്കുന്നത്. 
അസംബന്ധങ്ങളും അടിസ്ഥാനരഹിതവും വായില്‍ തോന്നുന്നത് വിളിച്ചുപറയുകയും ഒക്കെ ചെയ്യുന്ന നിലയിലേക്ക് രാഷ്ട്രീയം മാറിയിരിക്കുകയാണ്. ഇത്തരത്തിലുള്ള തെറ്റായ നിലപാടുകള്‍ സ്വീകരിക്കുന്നവരെ മാധ്യമപ്രവര്‍ത്തകര്‍ അവഗണിക്കണം. ടി.വി. ചാനലില്‍ പ്രത്യക്ഷപ്പെടാനുള്ള വ്യഗ്രത കൊണ്ട് പലതരത്തിലുള്ള പ്രവണതകളും വളര്‍ന്നുവരികയാണ്. ഇന്നലെ സുധാകരന്‍ മരുന്ന് കുടിച്ചിട്ടുണ്ടാകില്ല. അതാവും ഇ.പി. ജയരാജന്‍ ബിജെപിയിലേക്ക് പോകുമെന്ന് പറഞ്ഞത്.
എന്തുംപറയുന്നവര്‍ക്ക് എന്താ പറഞ്ഞുകൂടാത്തത്. പ്രധാനമന്ത്രി പദമെന്ന് പറയാത്തത് നന്നായി. സുധാകരാ മരുന്ന് കഴിക്കൂ, ഓര്‍മ ശക്തി വീണ്ടെടുക്കൂ, നല്ല മനുഷ്യാനാകൂ എന്നുമാത്രമേ പറയാനുള്ളൂ. സുധാകരന് വക്കീല്‍ നോട്ടീസ് അയയ്ക്കുമെന്നും ഇത്തരത്തിലുളള നടപടികള്‍ ആരുടെ ഭാഗത്ത് നിന്നുമുണ്ടാകാന്‍ പാടില്ലെന്നും ഇ.പി. ജയരാജന്‍ പറഞ്ഞു.