തിരുവനന്തപുരം: നിയമസഭ പാസാക്കിയ ബില്ലുകൾക്ക് അനുമതി നൽകാത്തതിന് രാഷ്ട്രപതിക്കെതിരെയും കേസുമായി പോവുകയാണ് സംസ്ഥാന സർക്കാർ. രാഷ്ട്രപതിക്കെതിരേ സംസ്ഥാനത്തിന് നിയമപോരാട്ടം നടത്താൻ പരിമിതിയുള്ളതിനാൽ നിയമസഭ പാസാക്കിയ ബില്ലുകൾ രാഷ്ട്രപതിയുടെ പരിഗണനയ്ക്ക് അയച്ച ഗവർണറുടെ നടപടി ചോദ്യം ചെയ്തായിരിക്കും സർക്കാർ സുപ്രീംകോടതിയെ സമീപിക്കുക.
രാജ്യത്തു തന്നെ അസാധാരണമായ സംഭവമാണിതെന്നാണ് നിയമവിദ്ഗ്ദർ പറയുന്നത്. രാഷ്ട്രപതിയുടെ പരിഗണനയ്ക്ക് വിടേണ്ട കാര്യമില്ലാത്ത ബില്ലുകളും അയച്ച നടപടിയാവും സർക്കാർ ചോദ്യംചെയ്യുക.
ബില്ലുകളിലൊപ്പിടാത്തതിന് ഗവർണർക്കെതിരേ സർക്കാരിന്റെ ഹർജി നേരത്തേ സുപ്രീംകോടതിയിലുണ്ട്. പുതിയ ഹർജി ഇതുമായി കൂട്ടിച്ചേർക്കണോ പുതുതായി ഫയൽ ചെയ്ത് ഭരണഘടനാ ബഞ്ചിന്റെ പരിഗണനയ്ക്കെത്തിക്കണോ എന്നീ കാര്യങ്ങളിൽ അഡ്വക്കേറ്റ് ജനറലിനോട് നിയമോപദേശം തേടി.
കേന്ദ്രനിയമത്തിന് വിരുദ്ധമല്ലാത്ത ബില്ലുകൾ രാഷ്ട്രപതിക്കയച്ച നടപടി ശരിയല്ലെന്നാണ് സംസ്ഥാനത്തിന്റെ നിലപാട്. ഇവയൊന്നും രാഷ്ട്രപതിയുടെ മുൻകൂർ അനുമതി ആവശ്യമില്ലാത്തവയുമാണ്. മുൻപ് ഗവർണർ ഒപ്പുവച്ച ഓർഡിനൻസുകളാണ് ബില്ലുകളാക്കിയതിൽ ഭൂരിഭാഗവും. ഇതിനും രാഷ്ട്രപതിയുടെ അനുമതി ആവശ്യമില്ല.
ബില്ലുകൾ ഒപ്പിടാതെ പിടിച്ചുവച്ചിരിക്കുന്നെന്ന് ചൂണ്ടിക്കാട്ടി ഗവർണർക്കെതിരേ സർക്കാർ സുപ്രീംകോടതിയിൽ ഹർജി നൽകിയപ്പോൾ 7 ബില്ലുകൾ ഗവർണർ രാഷ്ട്രപതിക്ക് അയച്ചിരുന്നു. ഇതിൽ ലോകായുക്ത ഭേദഗതിക്ക് മാത്രമാണ് രാഷ്ട്രപതി അനുമതി നൽകിയത്. 4 ബില്ലുകൾക്ക് രാഷ്ട്രപതി അനുമതി നിഷേധിച്ചിരുന്നു. ഇനി 2 ബില്ലുകളിൽ തീരുമാനം വരാനുണ്ട്.
ബില്ലുകൾക്ക് അനുമതി നിഷേധിച്ച രാഷ്ട്രപതിയുടെ തീരുമാനം കോടതിയിൽ ചോദ്യംചെയ്യാനാവില്ലെന്ന് നിയമോപദേശം ലഭിച്ചതോടെയാണ് സർക്കാരിന്റെ പുതിയ നീക്കം. രാഷ്ട്രപതി ബില്ലുകൾക്ക് അനുമതി നിഷേധിച്ചതിന്റെ കാരണമറിയില്ലെന്ന് സർക്കാർ ഹർജിയിൽ ചൂണ്ടിക്കാട്ടും.
നിയമസഭ പാസാക്കിയ ബില്ലുകൾ രാഷ്ട്രപതി തടഞ്ഞത് സംബന്ധിച്ച ഒരു സംസ്ഥാനത്തിന്റെ നിയമനടപടികൾ ആദ്യമായാണ്. ഭരണഘടനാ വിദഗ്ദ്ധരുടെ നിയമോപദേശം തേടിയശേഷമായിരിക്കും തുടർനടപടികൾ.
സർവകലാശാലകളിൽ ഗവർണറുടെ ചാൻസലർ പദവിയൊഴിവാക്കാനും വൈസ് ചാൻസലർ നിയമനത്തിനുള്ള സെർച്ച് കമ്മിറ്റി വിപുലീകരിക്കാനും ഗവർണറെ ഒഴിവാക്കി സർവകലാശാലാ അപ്പലേറ്റ് ട്രൈബ്യൂണലിനെ സർക്കാരിന് നിയമിക്കാനും നോമിനേറ്റഡ് അംഗങ്ങൾക്കും വോട്ടവകാശം അനുവദിച്ച് മിൽമയുടെ ഭരണം പിടിക്കാനുമുള്ള 4 ബില്ലുകൾക്കാണ് രാഷ്ട്രപതി അനുമതി നിഷേധിച്ചത്.
സുപ്രീംകോടതിയിൽ സർക്കാരിന്റെ കേസിനാധാരമായ എട്ട് ബില്ലുകളിൽ ഏഴെണ്ണം രാഷ്ട്രപതിയുടെ പരിഗണനയ്ക്ക് അയച്ചത് ഗവർണറുടെ തന്ത്രമായി പൊതുവേ വിലയിരുത്തപ്പെട്ടിരുന്നു. സർക്കാരിന്റെയോ നിയമസഭയുടെയോ ശുപാർശയില്ലാതെ ബില്ലുകൾ രാഷ്ട്രപതിക്ക് അയയ്ക്കാനാവില്ലെന്നിരിക്കെയാണ് ഏഴെണ്ണം അയച്ചത്.
ബില്ലുകൾ കേന്ദ്രനിയമത്തിന് വിരുദ്ധമാണോയെന്ന് പരിശോധിക്കാൻ രാഷ്ട്രപതിക്ക് കൈമാറാൻ നിയമസഭയോ നിയമസെക്രട്ടറിയോ ശുപാർശ ചെയ്യേണ്ടതുണ്ട്. 7 ബില്ലുകളിലും അത്തരമൊരു ശുപാർശയില്ല. മാത്രമല്ല, നിയമഭേദഗതിക്ക് നിയമസഭയ്ക്ക് അധികാരമുണ്ടെന്നും ഇവയൊന്നും കേന്ദ്രനിയമത്തിന് വിരുദ്ധമല്ലെന്നും ബില്ലുകൾക്കൊപ്പം നിയമസെക്രട്ടറി പ്രത്യേക കുറിപ്പും നൽകിയിട്ടുണ്ട്. ഈ സാഹചര്യത്തിൽ ഇവ രാഷ്ട്രപതിക്ക് അയയ്ക്കാനാവില്ലെന്നായിരുന്നു ഗവർണർക്ക് നേരത്തേ നിയമോപദേശം കിട്ടിയത്.
ബില്ലുകൾ രാഷ്ട്രപതിക്ക് അയയ്ക്കുന്നത് ബന്ധപ്പെട്ട വകുപ്പിന്റെയോ നിയമവകുപ്പിന്റെയോ സർട്ടിഫിക്കറ്റ് സഹിതമായിരിക്കണമെന്നാണ് ചട്ടം. രാഷ്ട്രപതിയുടെ പരിഗണയ്ക്ക് വിടാനുള്ള കാരണമെന്താണെന്ന് വിശദമാക്കുന്ന മെമ്മോറാണ്ടവും അതോടൊപ്പമുണ്ടാവണം. കേന്ദ്ര ആഭ്യന്തര മന്ത്രാലയത്തിനാണ് ഗവർണർ ബില്ലുകൾ അയയ്ക്കുക.
അവിടത്തെ പരിശോധനയ്ക്ക് ശേഷമാവും ബിൽ രാഷ്ട്രപതിയുടെ പരിഗണനയ്ക്കയയ്ക്കുക. സർക്കാരിന്റെ ശുപാർശയില്ലാതെ ബില്ലുകൾ അയച്ചാൽ നടപടിക്രമം പാലിച്ചില്ലെന്ന് ചൂണ്ടിക്കാട്ടി ആഭ്യന്തര മന്ത്രാലയം അവ പരിഗണിക്കാതെ തിരിച്ചയയ്ക്കേണ്ടതാണ്.
രാജ്യസുരക്ഷ, ഹൈക്കോടതിയുടെ അധികാരത്തിൽ മാറ്റം, ഭരണഘടനാ തത്വങ്ങളുടെ ലംഘനം, ദേശീയപ്രാധാന്യം എന്നിവയടങ്ങിയ ബില്ലുകൾ ഗവർണർക്ക് നേരിട്ട് രാഷ്ട്രപതിക്കയയ്ക്കാം. പക്ഷേ ഈ ഏഴെണ്ണം അത്തരത്തിലുള്ളതല്ല. ഈ ബില്ലുകൾ നിലവിലെ നിയമങ്ങളുടെ ഭേദഗതിയാണെന്നും ഇത് സംസ്ഥാനത്തിന്റെ അധികാരമാണെന്നുമാണ് സർക്കാർ നിലപാട്.