ഓൺലൈൻ ട്രേഡിങ്ങിലൂടെ വൻ ലാഭം വാഗ്ദാനം ചെയ്​ത്​ ലക്ഷങ്ങൾ തട്ടി; കാലടി സ്വദേശിക്ക് നഷ്ടപ്പെട്ടത് 51 ലക്ഷം ! ആളുകളെ വലയിൽ വീഴ്ത്തിയത് ഇടനിലക്കാരന് കമ്മീഷൻ നൽകികൊണ്ട്; പ്രതി അറസ്റ്റിൽ

കൊച്ചി: ഓൺലൈൻ ട്രേഡിങ്ങിലൂടെ ലക്ഷങ്ങൾ തട്ടിയ സംഘത്തിലെ ഒരാൾ പിടിയിൽ. കണ്ണൂർ മട്ടന്നൂർ എടയന്നൂർ ദാറുൽഫലാഹ്​ മുഹമ്മദ് ഇർഫാനെയാണ്​ (21) ആലുവ സൈബർ പൊലീസ് സ്റ്റേഷൻ ടീം അറസ്റ്റ് ചെയ്തത്.
ഓൺലൈൻ ട്രേഡിങ്ങിലൂടെ വൻ ലാഭം വാഗ്ദാനം ചെയ്​ത്​ കാലടി മാണിക്യമംഗലം സ്വദേശിയിൽ നിന്ന് 51 ലക്ഷം രൂപയാണ് തട്ടിയെടുത്തത്. തട്ടിപ്പുസംഘം പറഞ്ഞ മൂന്ന് അക്കൗണ്ടുകളിലേക്കാണ് ഇദ്ദേഹം പണം നിക്ഷേപിച്ചത്. ആദ്യം പണം നിക്ഷേപിച്ചപ്പോൾ ലാഭമെന്ന്​ പറഞ്ഞ് 5000 രൂപ പരാതിക്കാരന്‍റെ അക്കൗണ്ടിലേക്ക് നൽകി.
ഇത്​ വിശ്വസിച്ച്​ കൂടുതൽ തുക നിക്ഷേപിച്ചു. ഇത്​ മുഴുവൻ സംഘം കൈക്കലാക്കുകയായിരുന്നു. ഓൺലൈൻ ട്രേഡിങ്ങിൽ ചേർക്കുന്നയാൾക്ക് കമീഷനും നൽകിയാണ് ആളുകളെ വലയിൽ വീഴ്ത്തിയിരുന്നത്. നിരവധി പേർ തട്ടിപ്പിനിരയായിട്ടുണ്ടെന്നാണ് സൂചന.
ഇൻസ്പെക്ടർ വിപിൻദാസ്, സീനിയർ സി.പി.ഒമാരായ ജെറി കുര്യാക്കോസ്, വികാസ് മണി, ലിജോ ജോസ് എന്നിവരാണ് അന്വേഷണ സംഘത്തിലുള്ളത്.