കൊച്ചി: കലൂര്‍ കത്രക്കടവിലെ ബാറിലുണ്ടായ വെടിവെയ്പ്പില്‍ അഞ്ചാം പ്രതി പിടിയില്‍. കൊച്ചി കളമശേരി സ്വദേശിയായ മനുവിനെയാണ് പോലീസ് പിടികൂടിയത്. കളമശേരിയില്‍ നിന്നാണ് ഇയാളെ നോര്‍ത്ത് പോലീസ് കസ്റ്റഡിയിലെടുത്തത്. നിരവധി കേസുകളില്‍ പ്രതിയാണ് ഇയാള്‍.
ലഹരിമാഫിയ ക്വട്ടേഷന്‍ സംഘത്തിലെ മറ്റു പ്രതികളെ പോലീസ് നേരത്തെ അറസ്റ്റ് ചെയ്തിരുന്നു. മുമ്പ് പിടിയിലായ സമീര്‍, വിജയ്, ദില്‍ഷന്‍ എന്നിവരെ ഇന്ന് വിശദമായി ചോദ്യം ചെയ്യും. നോര്‍ത്ത് പോലീസ്, ഡാന്‍സാഫ് സംഘം, സൈബര്‍ സെല്‍ എന്നിവയുടെ നേതൃത്വത്തിലാണ് അന്വേഷണം.
ഞായര്‍ രാത്രി പതിനൊന്നരയോടെയാണ് നഗര മധ്യത്തിലെ ബാറില്‍ വെടിവയ്പുണ്ടായത്. ക്ലോസിംഗ് സമയം കഴിഞ്ഞ് മദ്യം വാങ്ങാനെത്തിയ നാലംഗസംഘം ആദ്യം ബാര്‍ മാനേജരെ കൈയേറ്റം ചെയ്യുകയായിരുന്നു. ജീവനക്കാര്‍ ആക്രമണം ചെറുത്തതോടെ ഇവരില്‍ ഒരാള്‍ തോക്കെടുത്ത് ക്ലോസ് റേഞ്ചില്‍ ജീവനക്കാരായ അഖില്‍നാഥ്, സുജിന്‍ എന്നിവര്‍ക്ക് നേരെ വെടിയുതിര്‍ക്കുകയായിരുന്നു.
