പവർ പ്ലേയിൽ വെടിക്കെട്ട് തീർത്ത് വൈഭവ്, 14കാരന്റെ മുന്നിൽ വിറച്ച് ഗുജറാത്ത്; രാജസ്ഥാന് തകർപ്പൻ തുടക്കം
ജയ്പൂര്‍: ഐപിഎല്ലില്‍ ഗുജറാത്ത് ടൈറ്റന്‍സിനെതിരെ 210 റൺസ് വിജയലക്ഷ്യവുമായി ഇറങ്ങിയ രാജസ്ഥാന് റോയല്‍സിന് തകര്‍പ്പന്‍ തുടക്കം. പവര്‍ പ്ലേ പൂര്‍ത്തിയാകുമ്പോള്‍ രാജസ്ഥാന് വിക്കറ്റ് നഷ്ടമില്ലാതെ 87 റണ്‍സ് എന്ന നിലയിലാണ്. 52 റൺസുമായി വൈഭവ് സൂര്യവൻഷിയും 31 റൺസുമായി യശസ്വി ജയ്സ്വാളുമാണ് ക്രീസിൽ.
ഓപ്പണര്‍മാരായ വൈഭവ് സൂര്യവൻഷിയും യശസ്വി ജയ്‌സ്വാളും തുടക്കം മുതല്‍ തന്നെ ഗുജറാത്ത് ബൗളര്‍മാര്‍ക്ക് എതിരെ ആക്രമണം അഴിച്ചുവിട്ടു. നേരിട്ട രണ്ടാം പന്ത് തന്നെ സിക്‌സര്‍ പറത്തി 14കാരനായ വൈഭവ് രാജസ്ഥാന് ആരാധകരെ ആവേശത്തിലാക്കി. ഇഷാന്ത് ശര്‍മ്മ എറിഞ്ഞ രണ്ടാം ഓവറില്‍ ജയ്‌സ്വാളിനെ പുറത്താക്കാന്‍ ലഭിച്ച അവസരം ബട്‌ലര്‍ കൈവിട്ടു കളഞ്ഞു. അവസാന പന്ത് സിക്‌സര്‍ പറത്തി ജയ്‌സ്വാള്‍ വീണുകിട്ടിയ അവസരം മുതലാക്കി. മൂന്നാം ഓവറില്‍ മുഹമ്മദ് സിറാജിനെതിരെ 3 ബൗണ്ടറികള്‍ നേടിയ ജയ്‌സ്വാള്‍ സ്‌കോറിംഗിന്റെ വേഗം കൂട്ടി. തൊട്ടടുത്ത ഓവറില്‍ ഇഷാന്ത് ശര്‍മ്മയ്‌ക്കെതിരെ മൂന്ന് സിക്‌സറുകളും രണ്ട് ബൗണ്ടറികളും നേടി വൈഭവ് കൂടുതല്‍ അപകടകാരിയായി. 28 റണ്‍സാണ് നാലാം ഓവറില്‍ പിറന്നത്. 3.5 ഓവറില്‍ ടീം സ്‌കോര്‍ 50 കടന്നു.
5-ാം ഓവറില്‍ വാഷിംഗ്ടണ്‍ സുന്ദറിനെ നായകന്‍ ശുഭ്മന്‍ ഗില്‍ പന്തേല്‍പ്പിച്ചു. എന്നാല്‍, ആദ്യ പന്ത് ബൗണ്ടറി കടത്തിയാണ് ജയ്‌സ്വാള്‍ സുന്ദറിനെ വരവേറ്റത്. പിന്നാലെ രണ്ട് സിക്‌സറുകളും ഒരു ബൗണ്ടറിയും നേടി വൈഭവ് അര്‍ധ സെഞ്ച്വറി പൂര്‍ത്തിയാക്കി. വെറും 17 പന്തുകളില്‍ നിന്ന് 3 ബൗണ്ടറികളും 6 സിക്‌സറുകളും പറത്തിയാണ് വൈഭവ് 50 കടന്നത്. പവർ പ്ലേയുടെ അവസാന ഓവറിൽ പ്രസീദ് കൃഷ്ണയ്ക്ക് എതിരെ 6 റൺസ് മാത്രം കണ്ടെത്താനെ രാജസ്ഥാൻ ബാറ്റർമാർക്ക് കഴിഞ്ഞുള്ളൂ.
READ MORE: ജയ്പൂരിൽ ഗില്ലാട്ടം, വെടിക്കെട്ട് ബാറ്റിംഗുമായി ബട്ലറും! ഗുജറാത്തിന് കൂറ്റൻ സ്കോർ