റിലീസിന് മുന്‍പ് ആര് മുന്നില്‍? വിഷു ചിത്രങ്ങളുടെ ഫൈനല്‍ അഡ്വാന്‍സ് ബുക്കിംഗ് കണക്കുകള്‍
മലയാള സിനിമയിലെ പ്രധാന റിലീസിംഗ് സീസണുകളില്‍ ഒന്നായ വിഷു- ഈസ്റ്റര്‍ സീസണിന് തിയറ്ററുകളില്‍ ഇന്ന് തുടക്കമാവുകയാണ്. മൂന്ന് സിനിമകളാണ് മലയാളത്തില്‍ നിന്ന് ഇക്കുറി എത്തുന്നത്. നവാഗതനായ ഡീനോ ഡെന്നിസിന്‍റെ സംവിധാനത്തില്‍ മമ്മൂട്ടി നായകനാവുന്ന ബസൂക്ക, ഖാലിദ് റഹ്‍മാന്‍റെ സംവിധാനത്തില്‍ നസ്‍ലെന്‍ നായകനാവുന്ന ആലപ്പുഴ ജിംഖാന, നവാഗതനായ ശിവപ്രസാദിന്‍റെ സംവിധാനത്തില്‍ ബേസില്‍ ജോസഫ് നായകനാവുന്ന മരണമാസ്സ് എന്നിവയാണ് അവ. തിയറ്റര്‍ വ്യവസായം ഏറെ പ്രതീക്ഷയോടെ കാത്തിരിക്കുന്ന ഈ ചിത്രങ്ങളുടെ ആദ്യ പ്രതികരണങ്ങള്‍ക്കായി ആകാംക്ഷയോടെ കാത്തിരിക്കുകയാണ് സിനിമാലോകം. അതേസമയം ഈ ചിത്രങ്ങള്‍ നേടിയിട്ടുള്ള അഡ്വാന്‍സ് ബുക്കിംഗ് ഫൈനല്‍ കണക്കുകള്‍ ഇതിനകം പുറത്തെത്തിയിട്ടുണ്ട്.
കേരളത്തിലെ അഡ്വാന്‍സ് ബുക്കിംഗിലൂടെ ബസൂക്ക നേടിയിരിക്കുന്നത് 1.50 കോടിയാണെന്ന് ട്രാക്കര്‍മാര്‍ പറയുന്നു. ആലപ്പുഴ ജിംഖാന 1.45 കോടിയും മരണമാസ്സ് 29 ലക്ഷവുമാണ് കേരളത്തില്‍ നിന്ന് നേടിയിരിക്കുന്നതെന്നും. അതേസമയം ഇന്ന് തന്നെ തിയറ്ററുകളില്‍ എത്തുന്ന അജിത്ത് കുമാറിന്‍റെ തമിഴ് ചിത്രം ഗുഡ് ബാഡ് അഗ്ലി 34.75 ലക്ഷമാണ് നേടിയിരിക്കുന്നത്.
നസ്‍ലെനെ സംബന്ധിച്ച് കരിയറിലെ ഏറ്റവും മികച്ച കേരള അഡ്വാന്‍സ് സെയില്‍സ് ആണ് ആലപ്പുഴ ജിംഖാനയിലൂടെ നേടിയിരിക്കുന്നത്. പ്രേമലു നേടിയ 96 ലക്ഷമാണ് ഇതിന് മുന്‍പുള്ള ബെസ്റ്റ് എന്ന് ട്രാക്കര്‍മാര്‍ ചൂണ്ടിക്കാട്ടുന്നു. ആഗോള ബോക്സ് ഓഫീസില്‍ നിന്ന് 2 കോടിയിലേറെ അഡ്വാന്‍സ് ബുക്കിംഗും ചിത്രം നേടിയതായും റിപ്പോര്‍ട്ടുകള്‍ ഉണ്ട്.
അതേസമയം ഒരു ബോളിവുഡ് ചിത്രവും ഇന്ന് തിയറ്ററുകളില്‍ എത്തുന്നുണ്ട്. സണ്ണി ഡിയോള്‍ നായകനാവുന്ന ജാഠ് ആണ് അത്. പുതിയ റിലീസുകളില്‍ ഏതൊക്കെ മികച്ച അഭിപ്രായം നേടുമെന്ന് അറിയാനുള്ള കാത്തിരിപ്പിലാണ് സിനിമാപ്രേമികള്‍.
ALSO READ : ‘കാറിൽ സ്ഥലമില്ലെന്നു പറഞ്ഞ് ലിഫ്റ്റ് തരാതിരുന്ന സുഹൃത്തുക്കളുണ്ട്’; അമൃത നായർ പറയുന്നു