എങ്ങോട്ടാണ് പാകിസ്ഥാന് ക്രിക്കറ്റിന്റെ പോക്ക്? ന്യൂസിലന്‍ഡിനെതിരെ രണ്ടാം ടി20യിലും ബാറ്റിംഗ് തകര്‍ച്ച
ഡ്യുനെഡിന്‍: ന്യൂസിലന്‍ഡിനെതിരെ രണ്ടാം ടി20യില്‍ പാകിസ്ഥാന് ബാറ്റിംഗ് തകര്‍ച്ച. ഡ്യുനെഡിന്‍, യൂണിവേഴ്‌സിറ്റി ഓവലില്‍ ടോസ് നഷ്ടപ്പെട്ട് ബാറ്റിംഗിനെത്തിയ പാകിസ്ഥാന് അഞ്ച് വിക്കറ്റ് നഷ്ടമായി. മഴയെ തുടര്‍ന്ന് ടോസ് വൈകിയതിന് പിന്നാലെ മത്സരം 15 ഓവറാക്കി ചുരുക്കിയിരുന്നു. പിന്നാലെ ടോസ് നഷ്ടപ്പെട്ട് ബാറ്റിംഗിനെത്തിയ പാകിസ്ഥാന് ഒടുവില്‍ വിവരം ലഭിക്കുമ്പോള്‍ 10 ഓവറില്‍ അഞ്ചിന് 83 എന്ന നിലയിലാണ്. ഷദാബ് ഖാന്‍ (10), അബ്ദുള്‍ സമദ് (1) എന്നിവരാണ് ക്രീസില്‍. മുഹമ്മദ് ഹാരിസ് (11), ഹസന്‍ നവാസ് (0), ഇര്‍ഫാന്‍ ഖാന്‍ (11), ഖുഷ്ദില്‍ ഷാ (2), ക്യാപ്റ്റന്‍ സല്‍മാന്‍ അഗ (46) എന്നിവരുടെ വിക്കറ്റുകളാണ് പാകിസ്ഥാന് നഷ്ടമായത്. ഇഷ് സോധി, ബെന്‍ സീര്‍സ് എന്നിവര്‍ രണ്ട് വിക്കറ്റ് വീതം വീഴ്ത്തി. ജേക്കബ് ഡഫിക്ക് ഒരു വിക്കറ്റുണ്ട്.
ആദ്യ ഓവറില്‍ തന്നെ പാകിസ്ഥാന് ഒന്നാം വിക്കറ്റ് നഷ്ടമായി. സ്‌കോര്‍ബോര്‍ഡില്‍ ഒരു റണ്‍ മാത്രമുള്ളപ്പോള്‍ നവാസ് മടങ്ങി. ഡഫിയുടെ പന്തില്‍ മാര്‍ക്ക് ചാപ്മാന് ക്യാച്ച്. നാലാം ഓവറില്‍ രണ്ടാം വിക്കറ്റും വീണു. ഹാരിസിനെ സീര്‍സ് മടക്കുകയായിരുന്നു. തുടര്‍ന്നെത്തിയ ഇര്‍ഫാന്‍ ഖാന്‍, ഖുഷ്ദില്‍ എന്നിവരെ ഒരേ ഓവറില്‍ സോധി മടക്കിയതോടെ നാലിന് 52 എന്ന നിലയില്‍ തകര്‍ന്നു പാകിസ്ഥാന്. അല്‍പമെങ്കിലും ചെറുത്തുനിന്ന സല്‍മാന്‍ 10-ാം ഓവറിലും മടങ്ങി. മൂന്ന് സിക്സും നാല് ഫോറും ഉള്‍പ്പെടുന്നതായിരുന്നു സല്‍മാന്‍റെ ഇന്നിംഗ്സ്. ഇനി ഷദാബ് – സമദ് സഖ്യത്തിലാണ് പാകിസ്ഥാന്റെ പ്രതീക്ഷ. ഇരു ടീമുകളുടേയും പ്ലേയിംഗ് ഇലവന്‍ അറിയാം.
ലോകകപ്പ് യോഗ്യത: ബ്രസീലിനും ഉറുഗ്വെക്കുമെതിരെ അര്‍ജന്റീനയ്ക്ക് വേണ്ടി മെസി കളിക്കില്ല; ടീം അറിയാം
ന്യൂസിലന്‍ഡ്: ടിം സീഫെര്‍ട്ട്, ഫിന്‍ അല്ലന്‍, മാര്‍ക്ക് ചാപ്മാന്, ഡാരില്‍ മിച്ചല്‍, ജെയിംസ് നീഷാം, മിച്ചല്‍ ഹേ (വിക്കറ്റ് കീപ്പര്‍), മൈക്കല്‍ ബ്രേസ്വെല്‍ (ക്യാപ്റ്റന്‍), സക്കറി ഫോള്‍ക്‌സ്, ജേക്കബ് ഡഫി, ഇഷ് സോധി, ബെന്‍ സിയേഴ്‌സ്.
പാകിസ്ഥാന്: മുഹമ്മദ് ഹാരിസ് (വിക്കറ്റ് കീപ്പര്‍), ഹസന്‍ നവാസ്, സല്‍മാന്‍ ആഗ (ക്യാപ്റ്റന്‍), ഇര്‍ഫാന്‍ ഖാന്‍, ഷദാബ് ഖാന്‍, അബ്ദുള്‍ സമദ്, ഖുശ്ദില്‍ ഷാ, ജഹന്ദാദ് ഖാന്‍, ഷഹീന്‍ അഫ്രീദി, ഹാരിസ് റൗഫ്, മുഹമ്മദ് അലി.