മണ്ണിന്റെ അമ്ലത കുറയ്ക്കും, വണ്ടുകളെ നശിപ്പിക്കും, കാല്‍സ്യത്തിന്റെ കലവറ

മനുഷ്യന് ഏറെ ഗുണങ്ങള്‍ നല്‍കുന്ന ഭക്ഷ്യവസ്തുവാണ് മുട്ട. സമീകൃതാഹാരമെന്ന നിലയില്‍ മുട്ട ഏതു പ്രായക്കാര്‍ക്കും കഴിക്കാവുന്ന ഒന്നാണ്. നമ്മുടെ പച്ചക്കറികള്‍ക്കും പൂച്ചെടികള്‍ക്കുമെല്ലാം ഇതേ പോലെ മുട്ട കൊണ്ടു വലിയ ഉപയോഗമുണ്ട്. നാം മുട്ടയുടെ വെള്ളയും മഞ്ഞയും കഴിക്കുമ്പോള്‍ ചെടികള്‍ക്ക് പ്രിയം മുട്ടത്തോടാണ്. മണ്ണിനും ചെടികള്‍ക്കും മുട്ടത്തോട് കൊണ്ടു നിരവധി ഗുണങ്ങളാണുള്ളത്.

മുട്ടത്തോട് പൊടിക്കാം

തോട് നന്നായി ഉണക്കുകയാണ് ആദ്യം ചെയ്യേണ്ടത്. ഉണങ്ങി ഈര്‍പ്പമെല്ലാം പോയ ശേഷം മിക്‌സിയിലിട്ട് പൊടിക്കുക. വായു കടക്കാത്ത പാത്രത്തില്‍ സൂക്ഷിച്ചുവയ്ക്കുന്നതാണ് നല്ലത്, കൂടുതല്‍ കാലം ഉപയോഗിക്കാം.
അമ്ലത കുറയ്ക്കാം
മണ്ണിന്റെ അമ്ലത കുറയ്ക്കാന്‍ കുമ്മായമാണ് നാം സാധാരണ ഉപയോഗിക്കുക. ഇതിലെ പ്രധാന ഘടകം കാത്സ്യം കാര്‍ബൊണേറ്റാണ്. മുട്ടയുടെ തോടില്‍ 97 ശതമാനം അടങ്ങിയിരിക്കുന്നത് കാത്സ്യം കാര്‍ബൊണേറ്റാണ്. ഇതിന് പുറമെ ഫോസ്ഫറസ്, മഗ്‌നീഷ്യം, സോഡിയം, പൊട്ടാസ്യം പോലുള്ള ധാതുക്കളും അടങ്ങിയിട്ടുണ്ട്. ഇതിനാല്‍ നിലമൊരുക്കുമ്പോള്‍ മുട്ടയുടെ തോട് പൊടിച്ചതു ചേര്‍ക്കുന്നത് ഏറെ ഗുണം ചെയ്യും.
ഒച്ചുകളെ തുരത്താം വണ്ടുകളെയും
ജപ്പാനീസ് ബീറ്റില്‍, ഫ്‌ലീ ബീറ്റില്‍ തുടങ്ങിയ  വണ്ടുകളും ഒച്ചുകളും വലിയ ശല്യമാണ് ചെടികള്‍ക്കുണ്ടാക്കുക. ഒച്ചുകള്‍ മഴക്കാലത്തും വണ്ടുകള്‍ വേനലിലും ചെടികളുടെ ഇലകള്‍ നശിപ്പിക്കാനെത്തും. മുട്ടത്തോട് പൊടിച്ച് ഇലകളിലും കായ്കളിലും പറ്റിപ്പിടിച്ചിരിക്കുന്ന വണ്ടുകളുടെയും ഒച്ചുകളുടെയുമെല്ലാം പുറത്ത് വിതറുക, മുട്ടത്തോടിന്റെ പൊടി ഇവയില്‍ അസ്വസ്ഥതയുണ്ടാക്കുകയും ദിശയറിയാതെ ചുറ്റിത്തിരിയുകയും ചെയ്യും. ഇവ വണ്ടുകളുടെ പുറന്തോടിനുള്ളില്‍ കടന്നു ഗ്ലാസ് ചീളുകള്‍ പോലെ പ്രവര്‍ത്തിച്ചു ദേഹമാസകലം മുറിവുകളുണ്ടാക്കും. ഇതോടെ ഇവ നശിക്കും.
പ്രൂണിങ്ങിന് ശേഷം
പച്ചമുളക്, കാന്താരി, വഴുതന തുടങ്ങിയ വിളകള്‍ ഒന്നോ രണ്ടോ സീസണില്‍ തുടര്‍ച്ചയായി വിളവ് തരുന്നവയാണ്. ഒരു സീസണ്‍ കഴിയുമ്പോള്‍ ഇവയുടെ ചില്ലകള്‍ മുറിച്ചു മാറ്റാറുണ്ട്. ഈ സമയത്ത് മുട്ടത്തോട് പൊടി രണ്ടോ മൂന്നോ സ്പൂണ്‍ തടത്തില്‍ ചേര്‍ത്ത് കൊടുക്കുന്നതു നല്ലതാണ്. ഇവ ശക്തിയോടെ വളര്‍ന്നു ധാരാളം പൂക്കളും കായ്കളുമുണ്ടാകും.
കാല്‍സ്യത്തിന്റെ കലവറ
ചെടികള്‍ക്ക് കാല്‍സ്യം ലഭിക്കുമെന്ന് ഉറപ്പ് വരുത്താന്‍ മുട്ടത്തോടിന്റെ പൊടി നല്ലതാണ്. വളരെ സാവധാനം മാത്രമേ മൊട്ടത്തോട് പൊടി കാല്‍സ്യം മണ്ണിലേക്ക് കൊടുക്കുകയുള്ളൂ. ഇതിനാല്‍ ചെടിയുടെ വളര്‍ച്ചയുടെ ഓരോ ഘട്ടത്തിലും കാല്‍സ്യം ലഭ്യത ഉറപ്പാകും. ഗ്രോ ബാഗ് നിറക്കുമ്പോള്‍ ഒരു പിടി മുട്ടതോടിന്റെ പൊടി കൂടി ചേര്‍ക്കുന്നത് നല്ലതാണ്.https://i0.wp.com/eveningkerala.com/wp-content/uploads/2022/07/cropped-ev-logo.jpg?fit=32%2C32&ssl=1