ഡല്‍ഹി: പ്രധാനമന്ത്രി നരേന്ദ്രമോദിയെയും ആം ആദ്മി നേതാവ് അരവിന്ദ് കെജ്രിവാളിനെയും താരതമ്യപ്പെടുത്തി കോണ്‍ഗ്രസ് നേതാവ് രാഹുല്‍ ഗാന്ധി.
അരവിന്ദ് കെജ്രിവാളിനെ പ്രധാനമന്ത്രി നരേന്ദ്ര മോദിയുമായി രാഹുല്‍ താരതമ്യം ചെയ്തു. ഇരുവരും തെറ്റായ വാഗ്ദാനങ്ങള്‍ നല്‍കി ജനങ്ങളെ വഞ്ചിക്കുകയാണെന്നും അദ്ദേഹം ആരോപിച്ചു
മിനിറ്റുകള്‍ക്ക് ശേഷം രാഹുല്‍ ഗാന്ധി തന്നെ അധിക്ഷേപിച്ചുവെന്നും കോണ്‍ഗ്രസിനെ രക്ഷിക്കാന്‍ അദ്ദേഹം പോരാടുകയാണെന്നും പറഞ്ഞു കെജ്രിവാള്‍ തിരിച്ചടിച്ചു.
വടക്കുകിഴക്കന്‍ ഡല്‍ഹിയിലെ സീലംപൂരില്‍ ഒരു റാലിയെ അഭിസംബോധന ചെയ്തുകൊണ്ട് സംസാരിക്കുകയായിരുന്നു രാഹുല്‍ ഗാന്ധി.
രാജ്യവ്യാപകമായി ജാതി സെന്‍സസ് നടത്തുന്ന വിഷയത്തെക്കുറിച്ച് പരാമര്‍ശിച്ച രാഹുല്‍ പ്രധാനമന്ത്രി മോദിയില്‍ നിന്നും കെജ്രിവാളില്‍ നിന്നും അതിനെക്കുറിച്ച് ഒരു വാക്കുപോലും താന്‍ കേട്ടിട്ടില്ലെന്നും പറഞ്ഞു
പിന്നാക്ക വിഭാഗക്കാര്‍ക്ക് സംവരണം വേണോ, ജാതി സെന്‍സസ് വേണോ എന്ന് നിങ്ങള്‍ കെജ്രിവാളിനോട് ചോദിക്കുന്നു. ജാതി സെന്‍സസിനെക്കുറിച്ച് പ്രധാനമന്ത്രി മോദിയില്‍ നിന്നും കെജ്രിവാളില്‍ നിന്നും ഒരു വാക്കുപോലും ഞാന്‍ കേള്‍ക്കുന്നില്ല.
കെജ്രിവാളും പ്രധാനമന്ത്രി മോദിയും തമ്മില്‍ വ്യത്യാസമില്ല, കാരണം അവര്‍ രണ്ടുപേരും തെറ്റായ വാഗ്ദാനങ്ങളാണ് നല്‍കുന്നതെന്ന് അദ്ദേഹം പറഞ്ഞു.
കഴിഞ്ഞ വര്‍ഷം ഡല്‍ഹിയില്‍ ലോക്സഭാ തെരഞ്ഞെടുപ്പില്‍ കൈകോര്‍ത്തതിനുശേഷം കോണ്‍ഗ്രസും ആം ആദ്മി പാര്‍ട്ടിയും തമ്മിലുള്ള സംഘര്‍ഷം രൂക്ഷമായിക്കൊണ്ടിരിക്കുന്ന സമയത്താണ് രാഹുല്‍ ഗാന്ധിയുടെ പരാമര്‍ശം
പാര്‍ലമെന്റ് തെരഞ്ഞെടുപ്പില്‍ ഇരു പാര്‍ട്ടികള്‍ക്കും ദേശീയ തലസ്ഥാനത്ത് ഒരു സീറ്റ് പോലും നേടാന്‍ കഴിഞ്ഞിരുന്നില്ല.