Malayalam News Live: നിത്യതയിൽ… തീനാളങ്ങളിൽ ലയിച്ച് അക്ഷര സൂര്യൻ; എംടി ഇനി ഓർമ
മലയാളത്തിന്റെ ‘വടക്കൻ വീരഗാഥ’ എംടി വാസുദേവൻ നായർ അന്തരിച്ചു. കോഴിക്കോട്ടെ ആശുപത്രിയിൽ ഹൃദയസംബന്ധമായ അസുഖത്തെ തുടർന്ന് ചികിത്സയിലിരിക്കെ ഇന്നലെ രാത്രിയോടെയാണ് മരണം സംഭവിച്ചത്. ഏഴുപതിറ്റാണ്ട് എഴുത്തിന്റെ ‘സുകൃത’മായി നിറഞ്ഞ അതുല്യ വ്യക്തിത്വമാണ് മലയാളത്തോട് വിടപറയുന്നത്. കൈവെച്ച മേഖലകളിൽ എല്ലാം ‘ഉയരങ്ങളിൽ’ എത്തിയ പ്രതിഭാശാലിയായിരുന്നു അദ്ദേഹം. വൈകിട്ട് 3.30വരെ കോഴിക്കോട് കൊട്ടാരം റോഡിലെ ‘സിതാര’യിൽ നടന്ന അന്ത്യദര്‍ശനത്തിൽ ആയിരങ്ങളാണ് എംടിക്ക് അന്ത്യാഞ്ജലി അര്‍പ്പിച്ചത്. വീട്ടിലെ അന്ത്യദര്‍ശനത്തിനുശേഷം അന്ത്യകര്‍മ്മങ്ങള്‍ നടന്നു. ആംബുലന്‍സിലാണ് വീട്ടിൽ നിന്നും മൃതദേഹം മാവൂര്‍ റോഡിലേക്ക് കൊണ്ടുവരുന്നത്. തുടര്‍ന്ന് വൈകിട്ട് അഞ്ചിന് കോഴിക്കോട് മാവൂർ റോഡിലെ സ്മൃതിപഥം എന്ന പേരിലുള്ള കോര്‍പ്പറേഷൻ ശ്മശാനത്തിൽ സംസ്കാരം നടക്കും.