മെക്സിക്കോ: മെക്സിക്കോയില്‍ അവധി ആഘോഷിക്കാനെത്തിയ യുഎസ് ദമ്പതികള്‍ വെടിയേറ്റു മരിച്ചു. കഴിഞ്ഞ ബുധനാഴ്ച രാത്രി അംഗമാകുറ്റിറോ മുനിസിപ്പാലിറ്റിയില്‍ പിക്കപ്പില്‍ യാത്ര ചെയ്ത ദമ്പതികള്‍ക്കാണ് വെടിയേറ്റത്. ഗ്ലോറിയ എ (50), റാഫേല്‍ സി (53) എന്നിവരാണ് മരിച്ചത്.
യുവതി സംഭവസ്ഥലത്ത് തന്നെ മരിച്ചു. എന്നാല്‍ പരിക്കേറ്റ് ആശുപത്രിയില്‍ ചികിത്സയിലിരിക്കെയാണ് യുവാവ് മരിച്ചത്.
അക്രമാസക്തമായ പ്രദേശം
അക്രമാസക്തമായ പ്രദേശമെന്ന് അറിയപ്പെടുന്ന പടിഞ്ഞാറന്‍ മെക്സിക്കന്‍ സംസ്ഥാനമായ മൈക്കോവാകനിലാണ് യു.എസ് ദമ്പതികള്‍ വെടിയേറ്റു മരിച്ചത്. സ്റ്റേറ്റ് പ്രോസിക്യൂട്ടര്‍മാരാണ് ഈ സംഭവത്തെക്കുറിച്ചുള്ള വിവരങ്ങള്‍ വ്യാഴാഴ്ച പുറത്തുവിട്ടത്.
അതേസമയം വിവാഹിതരായ ദമ്പതികളെ എന്തിനാണ് ലക്ഷ്യമിട്ടതെന്ന് വ്യക്തമല്ലെന്നും, അന്വേഷണം തുടരുകയാണെന്നും അധികൃതര്‍ അറിയിച്ചു. യുഎസ് പൗരന്മാരായ ദമ്പതികള്‍ക്ക് അംഗമാകുറ്റിറോയില്‍ കുടുംബവും വീടും ഉണ്ടെന്നും അധികൃതര്‍ അറിയിച്ചു.