അനധികൃത മയക്കുമരുന്ന് വ്യാപാരത്തിനും കുടിയേറ്റത്തിനും മറുപടി. ചൈന, മെക്‌സിക്കോ, കാനഡ എന്നീ രാജ്യങ്ങള്‍ക്ക് വന്‍ തീരുവ ചുമത്തുമെന്ന് പ്രഖ്യാപിച്ച് ട്രംപ്

ന്യൂയോര്‍ക്ക്:  അമേരിക്കയുടെ ഏറ്റവും വലിയ മൂന്ന് വ്യാപാര പങ്കാളികളായ കാനഡ, മെക്സിക്കോ, ചൈന എന്നീ രാജ്യങ്ങള്‍ക്ക് വന്‍ താരിഫ് ചുമത്തുമെന്ന് പ്രഖ്യാപിച്ച് നിയുക്ത അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്.
അനധികൃത മയക്കുമരുന്ന് വ്യാപാരത്തിനും കുടിയേറ്റത്തിനും മറുപടിയായാണ് ചൈനയില്‍ നിന്നുള്ള ഇറക്കുമതിക്ക് 10 ശതമാനം തീരുവയ്ക്കൊപ്പം മെക്സിക്കോയില്‍ നിന്നും കാനഡയില്‍ നിന്നുമുള്ള ചരക്കുകള്‍ക്ക് 25 ശതമാനം തീരുവ ചുമത്താന്‍ ഉദ്ദേശിക്കുന്നതായി ട്രംപ് പറഞ്ഞത്.
2025 ജനുവരി 20 നാണ് ട്രംപ് അധികാരമേല്‍ക്കുന്നത്. കാനഡയിലെയും മെക്‌സിക്കോയിലെയും മയക്കുമരുന്ന് കടത്തും അതിര്‍ത്തി കടക്കുന്ന കുടിയേറ്റക്കാരെ തടയുന്നതും വരെ ഈ രാജ്യങ്ങള്‍ക്ക് 25% താരിഫ് ചുമത്തുമെന്ന് ട്രംപ് പറഞ്ഞു.
രാജ്യത്തേക്ക് പ്രവേശിക്കുന്ന എല്ലാ ചരക്കുകള്‍ക്കും വന്‍തോതിലുള്ള താരിഫ് ചുമത്തുന്നത് അമേരിക്കയിലെ ഏറ്റവും വലിയ വ്യാപാര പങ്കാളികളില്‍ ചിലരെ ബാധിക്കുമെന്ന് ട്രംപ് പറഞ്ഞു.
ജനുവരി 20-ലെ എന്റെ ആദ്യ എക്‌സിക്യൂട്ടീവ് ഓര്‍ഡറുകളിലൊന്നില്‍ മെക്‌സിക്കോയില്‍ നിന്നും കാനഡയില നിന്നും യുണൈറ്റഡ് സ്റ്റേറ്റ്‌സിലേക്ക് വരുന്ന എല്ലാ ഉല്‍പ്പന്നങ്ങള്‍ക്കും 25% താരിഫ് ഈടാക്കുന്നതിന് ആവശ്യമായ എല്ലാ രേഖകളിലും ഞാന്‍ ഒപ്പിടും, അദ്ദേഹം പറഞ്ഞു.
ഫെന്റനൈല്‍ കള്ളക്കടത്ത് കൈകാര്യം ചെയ്യുന്നതില്‍ പരാജയപ്പെട്ടതിന് മറുപടിയായി യുഎസിലേക്ക് പ്രവേശിക്കുന്ന ചൈനയുടെ എല്ലാ ഉല്‍പ്പന്നങ്ങള്‍ക്കും ഏതെങ്കിലും അധിക താരിഫുകള്‍ക്ക് മുകളില്‍ 10 ശതമാനം താരിഫ് ചുമത്തുമെന്നും അദ്ദേഹം പറഞ്ഞു.