ശിവകാർത്തികേയൻ ചെയ്ത ദ്രോഹം പൊറുക്കില്ല, മക്കളുടെ ഭാവി ഓർത്താണ് തുറന്ന് പറയാത്തത്; ഡി ഇമ്മാന്റെ വെളിപ്പിടുത്തൽ

നടൻ ശിവകാർത്തികേയനും സംഗീത സംവിധായകൻ ഡി.ഇമ്മാനും ആരാധകർ ഏറെയാണ്. ഇരുവരും ഒരുമിച്ച ചിത്രങ്ങളിലെ പാട്ടുകളെല്ലാം സൂപ്പർഹിറ്റുകളാണ്. എന്നാൽ അടുത്തിടെയായി രണ്ടുപേരും അത്ര രസത്തിലല്ലെന്ന ചില റിപ്പോർട്ടുകൾ പ്രചരിച്ചിരുന്നു. ഇപ്പോഴിതാ ഇതിൽ വാസ്തവമുണ്ടെന്ന് സമ്മതിച്ചിരിക്കുകയാണ് ഡി.ഇമ്മാൻ. ശിവകാർത്തികേയൻ തന്നെ ചതിച്ചുവെന്നാണ് ഇമ്മാൻ പറയുന്നത്. 
വൗ തമിഴാ എന്ന യൂട്യൂബ് ചാനലിന് നൽകിയ അഭിമുഖത്തിലാണ് ശിവകാർത്തികേയനുമായുണ്ടായ പ്രശ്‌നത്തെ കുറിച്ച് ഡി. ഇമ്മാൻ വെളിപ്പെടുത്തലുകൾ നടത്തിയത്. ഭാവിയിൽ ശിവകാർത്തികേയന്റെ ചിത്രങ്ങൾക്കായി സംഗീത സംവിധാനം നിർവ്വഹിക്കില്ലെന്ന് ഇമ്മാൻ വ്യക്തമാക്കി. മനംകൊത്തി പറവൈ മുതലാണ് ഇരുവരും ഒരുമിച്ച് പ്രവർത്തിക്കാൻ തുടങ്ങിയത്. 
വാലിബർ സംഘം, രജനിമുരുകൻ, സീമരാജ, നമ്മ വീട്ട് പുള്ളൈ എന്നീ ചിത്രങ്ങൾ പിന്നീട് ഒരുമിച്ച് ചെയ്തു. ഈ ചിത്രങ്ങളും പാട്ടുകളുമെല്ലാം ഹിറ്റായി. ഈ ജന്മം ഇനി വീണ്ടും ഒരുമിച്ച് ജോലി ചെയ്യുന്നത് ബുദ്ധിമുട്ടാകും. വലിയ ഒരു ദ്രോഹമാണ് ശിവകാർത്തികേയൻ എന്നോട് ചെയ്തത്. അത് പുറത്തുപറയാൻ സാധിക്കില്ല. ദ്രോഹം എന്നത് അങ്ങനെയൊക്കെയാണ് നടക്കുകയെന്നും അദ്ദേഹം വ്യക്തമാക്കി. 
‘എന്നോടു ചെയ്ത ദ്രോഹം തിരിച്ചറിയാൻ വളരെ വൈകി. അതുകൊണ്ട് ശിവകാർത്തികേയൻ അഭിനയിക്കുന്ന സിനിമകൾ ഞാനിനി ചെയ്യില്ല. എന്നോട് എങ്ങനെ ഇത് ചെയ്യാൻ തോന്നി എന്ന് ഞാൻ ചോദിച്ചിരുന്നു. അതിന് ശിവകാർത്തികേയൻ പറഞ്ഞ മറുപടി വെളിപ്പെടുത്താനാകില്ല. ചില കാര്യങ്ങൾ മറച്ചുവെയ്ക്കപ്പെടുകതന്നെ വേണം. അതിന് കാരണം എന്റെ കുഞ്ഞുങ്ങളുടെ ഭാവിയാണ്. 
നാട്ടുകാർ എന്നെ എന്തുപറയുന്നു എന്നത് എനിക്ക് പ്രശ്‌നമല്ല. ഞാനാരാണെന്ന് എനിക്കറിയാം. അപകടങ്ങൾ മുൻകൂട്ടി പറഞ്ഞിട്ടല്ലല്ലോ നടക്കുന്നത്. ജീവിതത്തിൽ സങ്കടങ്ങളുണ്ടാവും. അതിന് ഇദ്ദേഹം മാത്രമാണ് കാരണം എന്നുപറയാനാവില്ല. പക്ഷേ ശിവകാർത്തികേയനും ഒരു മുഖ്യകാരണമാണ്. ഇതുപോലൊരു വിശ്വാസ വഞ്ചന ശിവകാർത്തികേയൻ കാരണം സംഭവിച്ചു എന്നത് വേദനയും സങ്കടവും ആയിരുന്നു. മാപ്പ് പറഞ്ഞാലും ആ തെറ്റ് പൊറുക്കാൻ കഴിയില്ല’ ഇമ്മാൻ പറഞ്ഞു.