തിരുവനന്തപുരം: പത്തനംതിട്ട മുന്‍ എസ്.പി. സുജിത് ദാസിനെ സർവീസിൽനിന്നു സസ്പെൻഡ് ചെയ്യാൻ മുഖ്യമന്ത്രി പിണറായി വിജയൻ ഉത്തരവിട്ടതിൽ പ്രതികരണവുമായി പി.വി. അൻവർ. ‘വിക്കറ്റ്‌ നമ്പർ 1. ഒരു പുഴുക്കുത്ത്‌ പുറത്തേക്ക്‌’-എന്ന് അന്‍വര്‍ ഫേസ്ബുക്കില്‍ കുറിച്ചു.
പി.വി. അന്‍വര്‍ ഉന്നയിച്ച ആരോപണങ്ങളാണ് സുജിത് ദാസിന്റെ സസ്‌പെന്‍ഷനിലേക്ക് നയിച്ചത്. സുജിത് ദാസിനെതിരെ ഉയർന്ന ആരോപണങ്ങളെ കുറിച്ച് പ്രാഥമികമായി അന്വേഷിക്കാൻ ഡി ഐ ജി അജിത ബീഗത്തെ ചുമതലപ്പെടുത്തിയിരുന്നു. അവർ നൽകിയ റിപ്പോർട്ടിൽ ഗുരുതരമായ വീഴ്ചകൾ കണ്ടെത്തി. അതിനെ തുടർന്നാണ് സസ്പെൻഡ് ചെയ്യാൻ മുഖ്യമന്ത്രി ഉത്തരവിട്ടത്.
മലപ്പുറത്ത് പൊലീസ് ക്വാർട്ടേഴ്സിലെ മരം മുറി കേസൊതുക്കാൻ പി.വി അൻവർ എംഎൽഎയെ ഫോണിൽ വിളിച്ച് സ്വാധീനിക്കാൻ ശ്രമിച്ചെന്ന ആരോപണത്തിന് പിന്നാലെ സുജിത്ത് ദാസിനെ സ്ഥലംമാറ്റിയിരുന്നു.
പത്തനംതിട്ട എസ്‌പിയായിരുന്ന ഇദ്ദേഹത്തോട് പൊലീസ് ആസ്ഥാനത്ത് സംസ്ഥാന പൊലീസ് മേധാവി ഡിജിപി ഷെയ്‌ഖ് ദ‍ർവേസ് സാഹിബിന് മുന്നിൽ ഹാജരാകാനാണ് നിർദ്ദേശം നൽകിയത്.
‘വിക്കറ്റ്‌ നമ്പർ 1. ഒരു പുഴുക്കുത്ത്‌ പുറത്തേക്ക്‌’; സുജിത്ത് ദാസിന്റെ സസ്‌പെന്‍ഷനില്‍ പ്രതികരിച്ച് പി.വി. അന്‍വര്‍
Byadmin
Sep 5, 2024