മാരുതിയുടെ കയറ്റുമതി കുതിക്കുന്നു; ഏപ്രിലിൽ വൻ വളർച്ച

ഇന്ത്യയിലെ മുൻനിര കാർ നിർമ്മാതാക്കളായ മാരുതി സുസുക്കി ഇന്ത്യ 2025 ഏപ്രിൽ മാസത്തിലെ വിൽപ്പനയിൽ വാർഷികാടിസ്ഥാനത്തിൽ 6.9 ശതമാനം വളർച്ച രേഖപ്പെടുത്തി. മൊത്തം വിൽപ്പന 179,791 യൂണിറ്റുകളായി. ആഭ്യന്തര റീട്ടെയിൽ വിൽപ്പന 138,704 യൂണിറ്റുകളും കയറ്റുമതി 27,911 യൂണിറ്റുകളുമാണ്. അതായത് മൊത്തം വിൽപ്പനയിലെ വളർച്ചയ്ക്ക് പ്രധാനമായും കമ്പനിയുടെ കയറ്റുമതിയാണ് കാരണമായത് എന്നാണ് റിപ്പോർട്ടുകൾ.

ആഭ്യന്തര വിൽപ്പനയിൽ നേരിയ വളർച്ച ലഭിച്ചപ്പോൾ കയറ്റുമതിയിൽ വൻ കുതിച്ചുചാട്ടമാണ് ഉണ്ടായത്. കഴിഞ്ഞ വർഷം ഇതേ കാലയളവിൽ 22,160 യൂണിറ്റുകൾ കയറ്റുമതി ചെയ്ത മാരുതി സുസുക്കി 2025 ഏപ്രിൽ മാസത്തിൽ 27,911 യൂണിറ്റുകൾ കയറ്റുമതി ചെയ്തു. ഇത് വാർഷികാടിസ്ഥാനത്തിൽ 25.9 ശതമാനം വളർച്ചയിലേക്ക് നയിക്കുന്നു.

ആഭ്യന്തര വിൽപ്പനയുടെ കാര്യത്തിൽ, കഴിഞ്ഞ വർഷം ഇതേ കാലയളവിൽ ഇത് 137,952 യൂണിറ്റായിരുന്നു. ഈ മാസം 138,704 യൂണിറ്റുകളുടെ വിൽപ്പനയാണ് കമ്പനി നടത്തിയത്. കഴിഞ്ഞ വർഷം ഇതേ കാലയളവിൽ ഇത് 137,952 യൂണിറ്റായിരുന്നു. ഇത് വാർഷികാടിസ്ഥാനത്തിൽ 0.54 ശതമാനം വളർച്ചയാണ് കാണിക്കുന്നത്. എസ്‌യുവി, എംപിവി വിഭാഗങ്ങൾ വാർഷികാടിസ്ഥാനത്തിൽ 4.3 ശതമാനം വളർച്ച കൈവരിച്ചപ്പോൾ, ആഭ്യന്തര വിൽപ്പന 59,022 യൂണിറ്റുകളായിരുന്നു. എന്നാൽ മറ്റ് സെഗ്മെന്‍റുകളിൽ വിൽപ്പന ഇടിഞ്ഞു.

മാരുതി സുസുക്കി ബലേനോ , സ്വിഫ്റ്റ് , ഡിസയർ , സിയാസ് , ആൾട്ടോ തുടങ്ങിയ മോഡലുകൾ ഉൾപ്പെടുന്ന പാസഞ്ചർ കാർ വിഭാഗത്തിൽ 1.57 ശതമാനം ഇടിവ് രേഖപ്പെടുത്തി. ആഭ്യന്തര റീട്ടെയിൽ 68,244 യൂണിറ്റുകളായി. കൂടാതെ, പാസഞ്ചർ കാർ വിഭാഗത്തിൽ, ആൾട്ടോ കെ 10 , എസ്-പ്രസ്സോ തുടങ്ങിയ എൻട്രി ലെവൽ മോഡലുകളുടെ വിൽപ്പന 45 ശതമാനം വൻ ഇടിവ് രേഖപ്പെടുത്തി. മൊത്തം ആഭ്യന്തര വിൽപ്പന 6,332 ആയി.

ചെറുകാർ വിഭാഗത്തിൽ വളർച്ച കാണുന്നില്ലെങ്കിൽ ഇന്ത്യൻ പാസഞ്ചർ വാഹന വിപണി മന്ദഗതിയിലുള്ള വളർച്ച തുടരുമെന്ന് നേരത്തെ മാരുതി സുസുക്കി ഇന്ത്യ ചെയർമാൻ ആർ.സി. ഭാർഗവ വ്യക്തമാക്കിയിരുന്നു. ആഭ്യന്തര പാസഞ്ചർ വാഹന വിൽപ്പനയിൽ മാന്ദ്യം തുടരുമെന്ന് പ്രതീക്ഷിക്കുന്നുണ്ടെന്നും പുതിയ സാമ്പത്തിക വർഷത്തിൽ ഉൽപ്പാദനത്തിലും വരുമാനത്തിലും വളർച്ച കൈവരിക്കുന്നതിനായി കയറ്റുമതി തന്ത്രത്തിൽ ശ്രദ്ധ കേന്ദ്രീകരിക്കുകയാണെന്നും ആർ സി ഭാർഗവ പറഞ്ഞിരുന്നു.