എന്റെ കേരളം: കോട്ടയത്തെ പ്രദർശനമേള ഏപ്രിൽ 30-ന് സമാപിക്കും

പിണറായി വിജയൻ നയിക്കുന്ന രണ്ടാം എൽ.ഡി.എഫ് സർക്കാരിന്റെ നാലാം വാർഷികത്തോട് അനുബന്ധിച്ച് നടക്കുന്ന പ്രദർശന വിപണനമേള “എന്റെ കേരളം” കോട്ടയത്ത് തുടരുന്നു. ഏപ്രിൽ 30-നാണ് കോട്ടയം ജില്ലയിലെ പരിപാടികൾ സമാപിക്കുന്നത്.

കേരള സർക്കാരിന്റെ വിവിധ പദ്ധതികൾ, സേവനങ്ങൾ എന്നിവ അടുത്തറിയാനും ജനങ്ങൾക്ക് പ്രയോജനപ്പെടുത്താനും കഴിയുന്നതാണ് മേള. ആരോഗ്യം, വൈദ്യുതി, ജലവിഭവം തുടങ്ങിയ വിവിധ സർക്കാർ വകുപ്പുകളുടെ പ്രവർത്തനം വിശദമാക്കുന്ന സ്റ്റാളുകളും മേളയുടെ ഭാ​ഗമാണ്. ടൂറിസം, വിപണന സ്റ്റാളുകൾ, കുടുംബശ്രീ ആഹാരശാല എന്നിവയും പരിപാടിയുടെ ഭാ​ഗമാണ്.

ഏപ്രിൽ 24-നാണ് എൻറെ കേരളം പ്രദർശന വിപണന മേള തുടങ്ങിയത്. മന്ത്രി വിഎൻ വാസവനാണ് മേള ഉദ്‌ഘാടനം ചെയ്തത്.

കോട്ടയം നാ​ഗമ്പടം മൈതാനത്ത് നടക്കുന്ന മേളയിൽ സർക്കാർ വകുപ്പുകളുടെയും പൊതുമേഖലാ-സ്വയംഭരണ സ്ഥാപനങ്ങളുടെയും 186 സ്‌റ്റാളുകളാണുള്ളത്. 45,000 ചതുരശ്രയടി എയർകണ്ടീഷൻഡ് പവലിയൻ ഉൾപ്പെടെ മൊത്തം 69,000 ചതുരശ്രയടിയിലാണ് പ്രദർശന വിപണനമേള. ദിവസവും രാവിലെ 9.30 മുതൽ വൈകിട്ട് 9.30 വരെ നടക്കുന്ന പരിപാടിയിൽ പൊതുജനങ്ങൾക്ക് പ്രവേശനം സൗജന്യമാണ്.