ഹോണ്ട ജാസ് തിരിച്ചുവരുന്നു: പുതിയ മോഡലിന്റെ വിശദാംശങ്ങൾ
ഇന്ത്യയിൽ ഹോണ്ട ജാസ് എന്ന പേരിൽ വിറ്റഴിക്കപ്പെട്ട കാറാണ് ഹോണ്ട ഫിറ്റ്. നിങ്ങളും ഹോണ്ട ജാസിന്റെ അതായത്, ആഗോളതലത്തിലെ ഹോണ്ട ഫിറ്റിന്‍റെ ആരാധകനാണെങ്കിൽ , നിങ്ങൾക്കായി ഒരു വലിയ വാർത്തയുണ്ട്. വാഹനത്തിന് പുതിയൊരു ഫെയ്‌സ്‌ലിഫ്റ്റ് പതിപ്പ് വരുന്നു. പക്ഷേ ചൈനീസ് വിപണിക്കായി തയ്യാറാക്കിയതാണ് ഈ പതിപ്പ്. ഇത് ഇന്ത്യയിലേക്ക് വരുമോ? ഇതാ അതിന്റെ വിശദാംശങ്ങൾ
ചോർന്ന ചിത്രങ്ങൾ അനുസരിച്ച്, 2025 ഹോണ്ട ജാസ് -ഫിറ്റിന് വളരെ ബോൾഡ് ഫ്രണ്ട് പ്രൊഫൈൽ നൽകിയിട്ടുണ്ട്. ഇതിന് നേർത്ത ഹെഡ്‌ലൈറ്റുകളും പുതിയ ആംഗിൾ ബമ്പർ ഡിസൈനും ഉണ്ടായിരിക്കും. ഇതിന് ഡ്യുവൽ-ടോൺ ഓആർവിഎമ്മുകളും ബ്ലാക്ക്-ഔട്ട് ബി-പില്ലറുകളും ഉണ്ട്. ‘റേസിംഗ് ഡിഫ്യൂസർ’ പോലുള്ള ഒരു പ്ലാസ്റ്റിക് ആഡ്-ഓൺ അതിന്റെ പിൻഭാഗത്ത് ചെയ്തിട്ടുണ്ട്. എങ്കിലും ടെയിൽ‌ലൈറ്റുകൾ മുമ്പത്തെപ്പോലെ തന്നെ തുടരുന്നു.
ഇന്റീരിയറിന്‍റെ ഔദ്യോഗിക ചിത്രങ്ങൾ പുറത്തുവന്നിട്ടില്ലെങ്കിലും, ഇതിന് 8 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ലഭിക്കുമെന്നാണ് റിപ്പോർട്ടുകൾ. ഇതിനുപുറമെ, ഡിജിറ്റൽ ടിഎഫ്‍ടി ഇൻസ്ട്രുമെന്റ് ക്ലസ്റ്റർ, ഓട്ടോമാറ്റിക് ക്ലൈമറ്റ് കൺട്രോൾ, പിൻ എസി വെന്റുകൾ എന്നിവയും ഈ കാറിൽ നൽകിയിട്ടുണ്ട്. ഇതിന് പ്രീമിയം ഡ്യുവൽ-ടോൺ ലെതർ ഫിനിഷുണ്ട്. ഇതിനുപുറമെ, ആപ്പിൾ കാർപ്ലേ, ആൻഡ്രോയിഡ് ഓട്ടോ, ഇൻബിൽറ്റ് നാവിഗേഷൻ എന്നിവ ലഭ്യമാണ്. ഇലക്ട്രോണിക് പാർക്കിംഗ് ബ്രേക്കും വൈവിധ്യമാർന്ന സീറ്റിംഗ് സജ്ജീകരണവും ഇതിൽ ലഭിക്കും.
ഈ കാറിലെ സുരക്ഷാ സവിശേഷതകളെ കുറിച്ച് പറയുകയാണെങ്കിൽ, ഹോണ്ട സെൻസിംഗ് സ്യൂട്ടിന് കീഴിൽ നിരവധി സ്മാർട്ട് സുരക്ഷാ സവിശേഷതകൾ ഇതിൽ ലഭ്യമാകും . ലെയിൻ ഡിപ്പാർച്ചർ വാണിംഗ്, അഡാപ്റ്റീവ് ക്രൂയിസ് കൺട്രോൾ, കൊളീഷൻ മിറ്റിഗേഷൻ ബ്രേക്കിംഗ്, ലെയ്ൻ കീപ്പ് അസിസ്റ്റ് സവിശേഷതകൾ എന്നിവ ഇതിലുണ്ട്. പുതിയ ജാസിന് 1.5 ലിറ്റർ i-VTEC പെട്രോൾ എഞ്ചിൻ ലഭിക്കും, ഇത് 120 bhp കരുത്തും 145 എൻഎം ടോർക്കും ഉത്പാദിപ്പിക്കും. സുഖകരവും സുഗമവുമായ ഡ്രൈവിംഗിന് പേരുകേട്ട ഒരു സിവിടി ഓട്ടോമാറ്റിക് ട്രാൻസ്‍മിഷനുമായാണ് ഇത് ഘടിപ്പിച്ചിരിക്കുന്നത്.
പുതിയ ജാസ് ഇന്ത്യയിലേക്ക് വരുമോ?
2023-ൽ ഇന്ത്യയിൽ ഹോണ്ട ജാസ് നിർത്തലാക്കി. ഇതിന് ഏറ്റവും വലിയ കാരണം 4 മീറ്ററിൽ കൂടുതൽ നീളമുള്ള കാറുകൾക്ക് ചുമത്തിയ ഉയർന്ന നികുതിയായിരുന്നു. ഇപ്പോൾ പുതിയ ജാസിന്റെ നീളം ഏകദേശം 4.2 മീറ്ററാണ്. അതായത് ഇന്ത്യയിൽ നാല് മീറ്ററിൽ താഴെയുള്ള നികുതി ആനുകൂല്യം ഇതിന് ലഭിക്കില്ല. ഇതിനുപുറമെ, ഹോണ്ട ഇപ്പോൾ എസ്‌യുവികളിലും ഇലക്ട്രിക് വാഹനങ്ങളിലുമാണ് ശ്രദ്ധ കേന്ദ്രീകരിക്കുന്നത്. 2026-27 ആകുമ്പോഴേക്കും എലിവേറ്റ് ഇവിയും ചില പുതിയ ഐസിഇ എസ്‌യുവികളും പുറത്തിറക്കാൻ പദ്ധതിയുണ്ട്. അത്തരമൊരു സാഹചര്യത്തിൽ, ജാസിന്റെ തിരിച്ചുവരവിന്റെ സാധ്യതകൾ ഇപ്പോൾ കുറവാണ്. പുതിയ ഹോണ്ട ജാസ് ആഗോളതലത്തിൽ മികച്ചതായി കാണപ്പെടുന്നു . ഡിസൈൻ, സുരക്ഷ, സവിശേഷതകൾ എന്നിവയുടെ കാര്യത്തിൽ ഇത് മികച്ചതാണ്. എന്നാൽ ഇന്ത്യൻ വിപണിയുടെ ആവശ്യം, നികുതി ഘടന തുടങ്ങിയവ കണക്കിലെടുക്കുമ്പോൾ ഹോണ്ട ജാസ് തിരിച്ചുവരാനുള്ള സാധ്യത വളരെ കുറവാണ്.