പ്രയാഗ്രാജിൽ പോയ അനുഭവങ്ങൾ പങ്കുവെച്ച് സീരിയൽ താരം ഗൗരി കൃഷ്ണൻ. തന്റെ യൂട്യൂബ് ചാനലിലൂടെയാണ് താരം മനസ് തുറന്നത്.
സുഹൃത്തുക്കളോടൊപ്പമാണ് ഗൗരി പ്രയാഗ്രാജിൽ മഹാകുംഭമേളയിൽ പങ്കെടുക്കാനായി പോയത്. യാത്രയിലൂടനീളം ഏതോ ഒരു അദൃശ്യ ശക്തി തങ്ങളോടൊപ്പമുണ്ടായിരുന്നതായി തോന്നിയതായി ഗൗരി പറയുന്നു. ”മഹാരാഷ്ട്ര എത്തുമ്പോൾ തന്നെ നല്ല ബ്ലോക്ക് ആയിരിക്കും എന്നാണ് പലരും പറഞ്ഞത്. പക്ഷേ ഞങ്ങൾക്ക് വലിയ ബ്ലോക്ക് ഒന്നും കിട്ടിയില്ല. ഗൂഗിൾ മാപ്പ് കാണിച്ച വഴിയിലൂടെയാണ് ഞങ്ങൾ പോയത്. ചെറിയ വഴികളായിരുന്നു. ഗ്രാമങ്ങളിലൂടെയായിരുന്നു യാത്ര. അവിടുത്തെ പല ജീവിതങ്ങളും അടുത്തു കണ്ടു”, ഗൗരി കൃഷ്ണൻ വ്ളോഗിൽ പറഞ്ഞു. തങ്ങൾ സ്നാനം ചെയ്യാൻ എത്തിയപ്പോൾ വലിയ ജനക്കൂട്ടം ഉണ്ടായിരുന്നില്ല എന്നും ഗൗരി കൂട്ടിച്ചേർത്തു.
”പ്രയാഗ്‍രാജ് യാത്രയിൽ നല്ല അനുഭവങ്ങളും മോശം അനുഭവങ്ങളും ഉണ്ടായിട്ടുണ്ട്. നോർത്തിലേക്ക് എത്തിയപ്പോഴേക്കും തികച്ചും വ്യത്യസ്തമായ ആളുകളും സംസ്കാരവും ആണ് കാണാനായത്. ഒരുപാട് പാഠങ്ങൾ പഠിച്ച യാത്രയായിരുന്നു അത്. പോയ ആളായല്ല ഞാൻ തിരിച്ചു വന്നത്. അവരുടെ ജീവിതമൊക്കെ കണ്ടപ്പോൾ നമ്മുടെ ജീവിതം എത്രയോ സൗഭാഗ്യം നിറഞ്ഞതാണെന്ന് തോന്നി. ചില സ്ഥലങ്ങളിൽ ചാണകം ഉണക്കി കത്തിച്ചൊക്കെയാണ് പാചകം ചെയ്യുന്നത്”, ഗൗരി കൃഷ്ണൻ പറഞ്ഞു.
ചില പേടിപ്പെടുത്തുന്ന അനുഭവങ്ങളും ഉണ്ടായിട്ടുണ്ടെന്നും ഗൗരി പറഞ്ഞു. ”രാത്രി യാത്ര ഞങ്ങൾ പരമാവധി ഒഴിവാക്കിയിരുന്നു. ഞങ്ങൾ മൂന്ന് പെൺകുട്ടികളായിരുന്നു. വളരെ ശ്രദ്ധിച്ചാണ് പോയതെങ്കിലും ഒരു രാത്രി റോഡിൽ കിടക്കേണ്ടി വന്നു. രണ്ടു പേർ ഉറങ്ങുമ്പോൾ മറ്റേയാൾ എഴുന്നേറ്റിരുന്നൊക്കെയാണ് നേരം വെളുപ്പിച്ചത്. പെപ്പർ സ്പ്രേയും കയ്യിൽ കരുതിയിരുന്നു”, ഗൗരി കൂട്ടിച്ചേർത്തു.