World Irritable Bowel Syndrome Day: ഇറിറ്റബിള്‍ ബവല്‍ സിന്‍ഡ്രോമിനെ എങ്ങനെ തിരിച്ചറിയാം? ശ്രദ്ധിക്കേണ്ടവ
ഇന്ന് ഏപ്രില്‍ 19- ലോക ഇറിറ്റബിള്‍ ബവല്‍ സിന്‍ഡ്രോം ദിനം. ദഹനവുമായി ബന്ധപ്പെട്ടതും മാനസികപിരിമുറുക്കത്തെ തുടര്‍ന്നുണ്ടാകുന്നതുമായ വയറിന്റെ പ്രശ്നങ്ങളെ ഇറിറ്റബിള്‍ ബവല്‍ സിന്‍ഡ്രോം എന്ന് പറയുന്നു. ദഹനസംവിധാനത്തില്‍ വയറിന് താഴെ സ്ഥിതി ചെയ്യുന്ന അവയവങ്ങളാണ് ചെറുകുടലും വന്‍കുടലും. ഇവ രണ്ടും അടങ്ങുന്ന ഭാഗത്തെ ബവല്‍ എന്നാണ് വിളിക്കുന്നത്. ഈ ഭാഗത്തുണ്ടാകുന്ന പ്രശ്നങ്ങളെ ഇറിറ്റബിള്‍ ബവല്‍ സിന്‍ഡ്രോം (ഐബിഎസ്) എന്ന് വിളിക്കുന്നു.
ഇറിറ്റബിള്‍ ബവല്‍ സിന്‍ഡ്രോമിന്‍റെ ലക്ഷണങ്ങള്‍:
വിട്ടുമാറാത്ത വയറുവേദന, വയറ്റിളക്കം, മലബന്ധം, മലവിസര്‍ജ്ജനത്തിലെ മാറ്റങ്ങള്‍ എന്നിവ ഇറിറ്റബിള്‍ ബവല്‍ സിന്‍ഡ്രോമിന്‍റെ ലക്ഷണങ്ങളാണ്. ആഹാരം കഴിച്ച് അധികം കഴിയും മുൻപ് വയറ്റിൽ ഇരമ്പുന്ന അനുഭവം, വയറുവീർത്തുവരുക, വയറ്റിൽ നിന്നു പോകണമെന്നു തോന്നുക അതായത് അടിക്കടി ടോയ്‌ലറ്റില്‍ പോകണമെന്ന തോന്നല്‍, ഓരോ തവണ ആഹാരം കഴിക്കുമ്പോഴും ഇതേ ലക്ഷണങ്ങൾ ആവർത്തിക്കും. വയറിന് അസ്വസ്ഥതയും, ഗ്യാസ്, നെഞ്ചെരിച്ചില്‍, ദഹനക്കേട്, വിശപ്പില്ലായ്മ പോലെയുള്ള ദഹന പ്രശ്നങ്ങളും ഇതു മൂലം ഉണ്ടാകാം.
രോഗ കാരണങ്ങള്‍:
വയറില്‍ ലക്ഷക്കണക്കിന് നല്ല ബാക്ടീരിയകളും ചീത്ത ബാക്ടരീയകളും ഉണ്ട്. ഇവയിലുണ്ടാകുന്ന ചില മാറ്റങ്ങള്‍ ഇറിറ്റബിള്‍ ബവല്‍ സിന്‍ഡ്രോമിന് കാരണമാകും. ബാക്ടീരിയയോ വൈറസോ മൂലമുണ്ടാകുന്ന ഗ്യാസ്‌ട്രോഎന്റെറൈറ്റിസും ഐബിഎസിന് കാരണമാകാം. അതുപോലെ സ്ട്രെസ് അഥവാ മാനസിക സമ്മര്‍ദ്ദവും ഐബിഎസിന് കാരണമായേക്കാം. ചിലരുടെ ശരീരത്തിന് ചില ഭക്ഷണങ്ങൾ പിടിക്കില്ല. ഐബിഎസ് രോഗി തന്റെ ശരീരത്തിന് പിടിക്കാത്ത ഭക്ഷണങ്ങള്‍ കണ്ടെത്തി അവ ഒഴിവാക്കണം.
ഐബിഎസിന് ചികിത്സയില്ലെങ്കിലും, ഭക്ഷണക്രമത്തിലെ മാറ്റങ്ങൾ ഉൾപ്പെടെയുള്ള ചില ജീവിതശൈലി മാറ്റങ്ങൾ രോഗലക്ഷണങ്ങൾ നിയന്ത്രിക്കാന്‍ സഹായിക്കും. സ്ട്രെസ് കുറയ്ക്കുക, യോഗയും വ്യായാമവും പതിവാക്കുക, പഴങ്ങളും പച്ചക്കറികളും ധാരാളം കഴിക്കുക, ഫൈബര്‍ അടങ്ങിയ ഭക്ഷണങ്ങള്‍, പ്രോബയോട്ടിക് ഭക്ഷണങ്ങള്‍ തുടങ്ങിയവ ഡയറ്റില്‍ ഉള്‍പ്പെടുത്തുക.
ഐബിഎസ് രോഗികള്‍ക്ക് ചില ഭക്ഷണങ്ങള്‍ വയറ്റിന് പിടിക്കില്ല. അത്തരം ചില ഭക്ഷണങ്ങളെ പരിചയപ്പെടാം.
ഐബിഎസ് രോഗികളില്‍ ചിലർക്ക് പാലും പാലുൽപന്നങ്ങളും കഴിച്ചാൽ വയറിളകും. അത്തരത്തില്‍ പ്രശ്നം ഉള്ളവര്‍ പാല്‍, ചീസ്, തൈര് തുടങ്ങിയവ ഡയറ്റില്‍ നിന്നും ഒഴിവാക്കുക. അതുപോലെ കോഫി, ഗോതമ്പ്, എണ്ണയില്‍ പൊരിച്ച ഭക്ഷണങ്ങള്‍, സംസ്കരിച്ച ഭക്ഷണങ്ങള്‍, സിട്രസ് പഴങ്ങള്‍, ഗ്യാസ് നിറഞ്ഞ പാനീയങ്ങള്‍, ബീന്‍സ്, കാബേജ്, പഞ്ചസാരയോ എരിവോ കൂടുതല്‍ അടങ്ങിയ ഭക്ഷണങ്ങളും ജങ്ക് ഫുഡും ഇറിറ്റബിള്‍ ബവല്‍ സിന്‍ഡ്രോം രോഗികള്‍ ഡയറ്റില്‍ നിന്നും പരമാവധി ഒഴിവാക്കുക.
ഇറിറ്റബിള്‍ ബവല്‍ സിന്‍ഡ്രോമിനെ തടയാന്‍ ഡയറ്റില്‍ ഉള്‍പ്പെടുത്തേണ്ട ചില ഭക്ഷണങ്ങളെ പരിചയപ്പെടാം:
തണ്ണിമത്തൻ, കുക്കുമ്പർ, പുതിന, ഇഞ്ചി, തൈര്, ബെറി പഴങ്ങള്‍, മത്സ്യം, ഇലക്കറികൾ, ഇളനീര് തുടങ്ങിയവയൊക്കെ ഐബിഎസിൻ്റെ ലക്ഷണങ്ങളെ ലഘൂകരിക്കാനും കുടലിൻ്റെ ആരോഗ്യത്തെ സംരക്ഷിക്കാനും സഹായിക്കും.
ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ ‘കൺസൾട്ട്’ ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.അതുപോലെ തന്നെ ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില്‍ മാറ്റം വരുത്തുക.