കേക്ക് സ്റ്റോറി: മധുരമൂറുന്നൊരു യൂത്ത് ചിത്രം – റിവ്യൂ
രസകരമായ ഹിറ്റ് ചിത്രങ്ങള്‍ ഒരുക്കിയ സംവിധായകൻ സുനില്‍ ഒരിടവേളയ്ക്കു ശേഷം ഒരുക്കിയിരിക്കുന്ന ചിത്രമാണ് ‘കേക്ക് സ്റ്റോറി’. മധുരമൂറുന്നൊരു കേക്ക് കഥയുമായാണ് ഈ ഫാമിലി യൂത്ത് ചിത്രം ഒരുക്കിയിരിക്കുന്നത്. ഒരു കേക്ക് പോലെ ആസ്വദ്യകരമായ കഥയാണ് ചിത്രം പറയുന്നത്.
ഭക്ഷണത്തിന്‍റെയും അതിന്‍റെ പിന്നിലെ കഥകളും മലയാളത്തില്‍ ഏറെ വന്നിട്ടുണ്ട്. അത്തരം ചിത്രങ്ങളുടെ കൂട്ടത്തില്‍ ചേര്‍ത്ത് വയ്ക്കാന്‍ സാധിക്കുന്ന ചിത്രമാണ് ‘കേക്ക് സ്റ്റോറി’. നൈന എന്ന പെണ്‍കുട്ടി കൂട്ടുകാര്‍ക്കൊപ്പം ചേര്‍ന്ന് ഒരു കഫേ നടത്തുകയാണ്. എന്നാല്‍ ഒരു വര്‍ഷമായിട്ടും കഫേ പച്ചപിടിക്കുന്നില്ല. ഈ അവസ്ഥയില്‍ നൈനയുടെ മരിച്ചുപോയ മുത്തച്ഛന്‍ സ്വപ്നത്തില്‍ കേക്ക് ബേക്കിംങ് തുടങ്ങാന്‍ ആവശ്യപ്പെടുന്നയിടത്താണ് സിനിമ തുടങ്ങുന്നത്.
ഇതിന് പിന്നാലെ നൈനയുടെ മുത്തച്ഛന്‍റെ കേക്ക് നിര്‍മ്മാണം അറിയാവുന്ന കുഞ്ചു വര്‍ക്കി എന്ന വ്യക്തിയെ കണ്ടത്താന്‍ നൈനയും സംഘവും ശ്രമിക്കുന്നു. പിന്നീട് കുഞ്ചുവര്‍ക്കി എന്ന വ്യക്തിയില്‍ നിന്നും ഒരു കേക്ക് സ്റ്റോറി ഇതള്‍ വിരിയുകയാണ്.
ഒരു കേക്കിന് പിന്നിലെ രസകരവും ഒപ്പം ഉദ്വേഗ ജനകവുമായ കഥയുമായെത്തുന്ന ചിത്രത്തിൽ സംവിധായകൻ സുനിലിന്‍റെ മകള്‍ വേദ സുനിലാണ് പ്രധാന കഥാപാത്രമായ നൈനയെ അവതരിപ്പിക്കുന്നത്. ചിത്രത്തിന്‍റെ തിരക്കഥ ഒരുക്കിയിരിക്കുന്നതും വേദ സുനിലാണ്. ചിത്രവേദ റീൽസിന്‍റെയും ജെകെആര്‍ ഫിലിംസിന്‍റെയും ബാനറിൽ ബിന്ദു സുനിലും ജയന്തകുമാർ അമൃതേശ്വരിയും ചേർന്നാണ് ‘കേക്ക് സ്റ്റോറി’ നിർമ്മിക്കുന്നത്.
ചിത്രത്തില്‍ പ്രധാന കഥാപാത്രമായ കുഞ്ചുവര്‍ക്കിയെ അവതരിപ്പിക്കുന്നത് അശോകനാണ്. കൂടാതെ തമിഴ് നടനായ റെഡിൻ കിൻസ്ലി ആദ്യമായി മലയാള സിനിമയിൽ അഭിനയിക്കുന്നു എന്ന പ്രത്യേകതയും ഈ സിനിമയ്ക്കുണ്ട്. നൈനയുടെ മുത്തച്ഛന്‍ രാഘവനായി തമിഴ് താരം എത്തുന്നു. ചിത്രത്തിന്‍റെ ആദ്യഘട്ടത്തിലെ കേക്ക് പ്രണയകഥയാണ് ചിത്രത്തിന്‍റെ കാതല്‍ എന്ന് പറയാം.
നേരത്തെ പുറത്തുവന്ന ചിത്രത്തിലെ ഗാനങ്ങള്‍ തീയറ്ററില്‍ ചിത്രത്തോട് ഇഴുകി ചേര്‍ന്ന് നില്‍ക്കുന്നതാണ്. ജെറി അമൽദേവ്, എസ് പി വെങ്കിടേഷ് എന്നിവരാണ് സംഗീതം. ഒപ്പം റോണി റാഫേൽ പാശ്ചത്തല സംഗീതം ഒരുക്കുന്നുണ്ട്. ബാബു ആന്‍റണി ചിത്രത്തിലെ പ്രധാന വില്ലന്‍ വേഷത്തിലാണ് എത്തുന്നത്.
ജോണി ആന്‍റണി, മേജർ രവി, കോട്ടയം രമേഷ്, അരുൺ കുമാർ, മല്ലിക സുകുമാരൻ, നീനാ കുറുപ്പ്, സാജു കൊടിയൻ, ദിനേഷ് പണിക്കർ, ഡൊമിനിക്, അൻസാർ കലാഭവൻ, ടിഎസ് സജി, ഗോവിന്ദ്, അശിൻ, ജിത്തു, ഗോകുൽ, സംഗീത കിങ്സ്ലി , ജനനി സജി, അമൃത ജയന്ത്, സിന്ധു ജയന്ത്, വിദ്യാ വിശ്വനാഥ് എന്നിവരും ജോസഫ് യുഎസ്എ, മിലിക്ക സെർബിയ, ലൂസ് കാലിഫോർണിയ, നാസ്തിയ മോസ്കോ തുടങ്ങി വിദേശികൾ ആയിട്ടുള്ള അഞ്ചുപേരും സിനിമയിൽ അഭിനയിക്കുന്നുണ്ട്.
സംവിധായകന്‍ സുനിലിനൊപ്പം നാല് ചിത്രങ്ങളില്‍ അസിസ്റ്റന്‍റ് ഡയറക്ടറായും, മറ്റൊരു ചിത്രത്തില്‍ എഡിറ്റര്‍ ആയും പ്രവര്‍ത്തിച്ച വേദയുടെ ആദ്യ തിരക്കഥയാണ് ‘കേക്ക് സ്റ്റോറി’യുടെത്. ഇമോഷന്‍സിനെ കൂട്ടുപിടിച്ച് രസകരമായ ഒരു കഥയാണ് വേദ ഒരുക്കിയിരിക്കുന്നത്.
എഡിറ്റർ: എംഎസ് അയ്യപ്പൻ നായർ, പ്രൊജക്ട് ഡിസൈനർ: എന്‍എം ബാദുഷ, ചീഫ് അസോസിയേറ്റ് ഡയറക്ടർ: ജിബി മാള, വരികൾ: വിനായക് ശശികുമാർ, സന്തോഷ് വർമ്മ, കലാസംവിധാനം: സജീഷ് താമരശ്ശേരി, വസ്ത്രാലങ്കാരം: അരുൺ മനോഹർ, മേക്കപ്പ്: കലാമണ്ഡലം വൈശാഖ് ,സിജു കൃഷ്ണ, അസോസിയേറ്റ് ഡയറക്ടർ: നിധീഷ് ഇരിട്ടി, സ്റ്റില്‍സ്: ഷാലു പേയാട്, അസിസ്റ്റന്‍റ് ഡയറക്ടേഴ്സ്: ഹാരിസ് ഹംസ, പ്രജി സുബ്രഹ്മണ്യൻ, രാഹുൽ കെ എം, പിആര്‍ഒ: ആതിര ദിൽജിത്ത് എന്നിവരാണ് ചിത്രത്തിന്‍റെ അണിയറയില്‍ പ്രവര്‍ത്തിച്ചവര്‍.
എല്ലാവരുടെയും ആഘോഷത്തിന്‍റെ ഭാഗമാണ് കേക്കുകള്‍. എന്നാല്‍ ഒരോ കേക്കിനും പ്രണയത്തിന്‍റെയും സ്നേഹത്തിന്‍റെയും കഥ പറയാനുണ്ടാകും. ഇത്തരത്തില്‍ പഴയകാലത്ത് തുടങ്ങി ന്യൂജെന്‍ യുവത്വത്തില്‍ എത്തി നില്‍ക്കുന്ന ഒരു തലമുറയുടെ മധുരമൂറുന്ന കഥയാണ് കേക്ക് സ്റ്റോറി പറയുന്നത്. കുടുംബമായി അസ്വദിക്കാന്‍ കഴിയുന്ന എല്ലാ ചേരുവകളും ഒരു കേക്ക് ബേക്കിംഗില്‍ എന്ന പോലെ ഈ ചിത്രത്തില്‍ അടങ്ങിയിരിക്കുന്നു.
‘കേക്ക് സ്റ്റോറി’ യുടെ മനോഹരമായ ടീസർ പുറത്ത്, ചിത്രം 19 മുതൽ തിയേറ്ററുകളിൽ
കേക്ക് സ്റ്റോറി: പ്രണയത്തിന് വേണ്ടി ഉണ്ടാക്കപ്പെട്ട ഒരു കേക്കിന്റെ കഥ