വെടിക്കെട്ടിന് പിന്നാലെ സാള്‍ട്ട് മടങ്ങി, വൈകാതെ കോലിയും! ഡല്‍ഹിക്കെതിരെ ആര്‍സിബിക്ക് മൂന്ന് വിക്കറ്റ് നഷ്ടം
ബെംഗളൂരു: ഐപിഎല്ലില്‍ ഡല്‍ഹി കാപിറ്റല്‍സിനെതിരായ മത്സരത്തില്‍ റോയല്‍ ചലഞ്ചേഴ്‌സ് ബെംഗളൂരുവിന് മൂന്ന് വിക്കറ്റ് നഷ്ടം. ബെംഗളൂരു, ചിന്നസ്വാമി സ്‌റ്റേഡിയത്തില്‍ ടോസ് നഷ്ടപ്പെട്ട് ബാറ്റിംഗിനെത്തിയ ആര്‍സിബി ഒടുവില്‍ വിവരം ലഭിക്കുമ്പോള്‍ എട്ട് ഓവറില്‍ മൂന്ന് വിക്കറ്റ് നഷ്ടത്തില്‍ 83 റണ്‍സെടുത്തിട്ടുണ്ട്. രജത് പടിധാര്‍ (11), ലിയാം ലിവിംഗ്സ്റ്റണ്‍ (1) എന്നിവരാണ് ക്രീസില്‍. ഫിലിപ് സാള്‍ട്ട് (17 പന്തില്‍ 37), ദേവ്ദത്ത് പടിക്കല്‍ (1), വിരാട് കോലി (22) എന്നിവരുടെ വിക്കറ്റുകളാണ് ആര്‍സിബിക്ക് നഷ്ടമായത്. സാള്‍ട്ട് റണ്ണൗട്ടായപ്പോള്‍ ദേവ്ദത്ത്, മുകേഷ് കുമാറിന്റെ പന്തില്‍ അക്സര് പട്ടേലിന് ക്യാച്ച് നല്‍കുകയായിരുന്നു. കോലിയുടെ വിക്കറ്റ് വിപ്രജ് നിഗമാണ് വീഴ്ത്തിത്.
നേരത്തെ, ഒരു മാറ്റവുമായിട്ടാണ് ഡല്‍ഹി ഇറങ്ങിയത്. പരിക്ക് മാറി ഫാഫ് ഡു പ്ലെസിസ് തിരിച്ചെത്തി. സമീര്‍ റിസ്വി പുറത്തായി. ഫാഫ് വരുന്നതോടെ കെ എല്‍ രാഹുല്‍ വീണ്ടും മധ്യനിരയില്‍ കളിക്കും. ആര്‍സിബി മാറ്റമൊന്നും വരുത്തിയിട്ടില്ല. ഇരു ടീമുകളുടേയും പ്ലേയിംഗ് ഇലവന്‍ അറിയാം…
റോയല്‍ ചലഞ്ചേഴ്‌സ് ബെംഗളൂരു: ഫിലിപ്പ് സാള്‍ട്ട്, വിരാട് കോഹ്ലി, ദേവദത്ത് പടിക്കല്‍, രജത് പടിദാര്‍ (ക്യാപ്റ്റന്‍), ലിയാം ലിവിംഗ്സ്റ്റണ്‍, ജിതേഷ് ശര്‍മ്മ (വിക്കറ്റ് കീപ്പര്‍), ടിം ഡേവിഡ്, ക്രുനാല്‍ പാണ്ഡ്യ, ഭുവനേശ്വര് കുമാര്‍, ജോഷ് ഹാസില്‍വുഡ്, യാഷ് ദയാല്‍.
ഡല്‍ഹി ക്യാപിറ്റല്‍സ്: ഫാഫ് ഡു പ്ലെസിസ്, ജെയ്ക് ഫ്രേസര്‍-മക്ഗുര്‍ക്ക്, കെ എല്‍ രാഹുല്‍ (വിക്കറ്റ് കീപ്പര്‍), ട്രിസ്റ്റന്‍ സ്റ്റബ്സ്, അക്സര് പട്ടേല്‍ (ക്യാപ്റ്റന്‍), അശുതോഷ് ശര്‍മ, വിപ്രജ് നിഗം, മിച്ചല്‍ സ്റ്റാര്‍ക്ക്, മോഹിത് ശര്‍മ്മ, കുല്‍ദീപ് യാദവ്, മുകേഷ് കുമാര്‍.
ഈ ഐപിഎല്‍ സീസണില്‍ ഇതിനോടകം മികവ് പുറത്തെടുത്ത രണ്ട് ടീമുകളാണ് ആര്‍സിബിയും ക്യാപിറ്റല്‍സും. സീസണില്‍ ഇതുവരെ തോല്‍വി അറിയാത്ത ഏക ടീമാണ് ഡല്‍ഹി.കളിച്ച മൂന്ന് മത്സരങ്ങളിലും ജയം.അക്സര് പട്ടേലിന്റെ ക്യാപ്റ്റന്‍സിക്ക് കൈയ്യടിക്കുകയാണ് ആരാധകര്‍. പതിനെട്ടാം സീസണില്‍ പുതിയ നായകന് കീഴില്‍ നല്ല തുടക്കമാണ് ആര്‍സിബിക്ക് ലഭിച്ചത്.കളിച്ച നാലില്‍ മൂന്നിലും ജയം.ഇനി സ്വന്തം തട്ടകത്തില്‍ ആദ്യ ജയമാണ് ലക്ഷ്യം.