ദുബൈ ടു മുംബൈ, 2000 കി.മി വെറും 2 മണിക്കൂർ! സാധ്യമാകുമോ അണ്ടർ വാട്ടർ ട്രെയിൻ പദ്ധതി

ദുബൈ: ദുബൈയിൽ നിന്നും മുംബൈയിലേക്ക് അണ്ടർ വാട്ടർ റെയിൽ പാത വരുന്നു. ഇതോടെ യാത്രാ സമയം വെറും രണ്ട് മണിക്കൂറായി കുറയുമെന്നാണ് പ്രതീക്ഷിക്കുന്നത്. യുഎഇയുടെ നാഷണൽ അഡ്വൈസർ ബ്യൂറോ ലിമിറ്റഡ് ആണ് ഈ പദ്ധതിയുമായി രം​ഗത്തുവന്നത്. ഇരു രാജ്യങ്ങളെയും തമ്മിൽ ബന്ധിപ്പിക്കുന്ന ഈ അതിവേ​ഗ അണ്ടർ വാട്ടർ ട്രെയിൻ മണിക്കൂറിൽ 600 കിലോമീറ്റർ മുതൽ 1000 കിലോമീറ്റർ വരെ വേ​ഗത്തിലാണ് സഞ്ചരിക്കുന്നത്. രാജ്യങ്ങളെ തമ്മിൽ ബന്ധിപ്പിക്കുന്ന വിമാന യാത്രയ്ക്ക് ഒരു ബദൽ മാർ​ഗം സൃഷ്ടിക്കുക എന്നതാണ് പദ്ധതി ലക്ഷ്യം വെക്കുന്നത്. ഈ അണ്ടർ വാട്ടർ ട്രെയിനിൽ യാത്രക്കാരെ മാത്രമല്ല, ഇന്ധനം ഉൾപ്പെടെയുള്ള ചരക്കുകളും കൊണ്ടുപോകാൻ കഴിയും. ഇന്ത്യയ്ക്കും യുഎഇക്കും ഇടയിൽ ക്രൂഡ് ഓയിൽ ഉൾപ്പടെയുള്ള സാധനങ്ങളുടെ ​ഗതാ​ഗതം സു​ഗമമാക്കുകയും പദ്ധതി ലക്ഷ്യം വെക്കുന്നുണ്ട്. 

അതിവേ​ഗ അണ്ടർ വാട്ടർ ട്രെയിൻ പദ്ധതിക്ക് അം​ഗീകാരം ലഭിച്ചാൽ 2030ഓട് കൂടി ഇത് യാഥാർത്ഥ്യമാകും. ഇരു രാജ്യങ്ങളും തമ്മിലുള്ള ചരക്കു നീക്കത്തിന് ഏറ്റവും വേ​ഗത്തിലുള്ളതും സുസ്ഥിരവുമായ ​ഗതാ​ഗത മാർ​ഗം തെളിയുന്നതോടൊപ്പം വ്യാപാര ബന്ധം കൂടുതൽ ശക്തിപ്പെടുകയും ചെയ്യും. ഇന്ത്യക്കും യുഎഇക്കും മാത്രമല്ല, റെയിൽ കടന്നുപോകുന്ന ഇതര രാജ്യങ്ങൾക്കും ഈ പദ്ധതി ​ഗുണകരമാകുമെന്ന് പ്രതീക്ഷിക്കുന്നതായി നാഷണൽ അഡ്വൈസർ ബ്യൂറോ ലിമിറ്റഡ് ചീഫ് കൺസൾട്ടന്റ് അബ്ദുല്ല അൽ ഷെഹി പറഞ്ഞു.  

നിലവിൽ ഇന്ത്യയിൽ നിന്ന് യുഎഇയിലേക്കെത്താൻ വിമാന യാത്രക്ക് 4 മണിക്കൂറാണ് എടുക്കുന്നത്. അണ്ടർ വാട്ടർ ട്രെയിൻ പദ്ധതി വരുന്നതോടെ യാത്രാ സമയം രണ്ട് മണിക്കൂറായി കുറയും. കൂടാതെ, യാത്രക്കാർക്ക് ആഴക്കടലിലെ കൗതുകമുണർത്തുന്ന കാഴ്ചകൾ ആസ്വദിക്കാനും കഴിയുന്ന തരത്തിലാണ് പദ്ധതി വിഭാവനം ചെയ്തിരിക്കുന്നത്. ഇന്ത്യയും യുഎഇയും തമ്മിലുള്ള 2000 കിലോമീറ്റർ ദൂരത്തെയാണ് ഈ അണ്ടർ വാട്ടർ റെയിൽ പാത ബന്ധിപ്പിക്കുക. കോടിക്കണക്കിന് രൂപയുടെ നിക്ഷേപം ആവശ്യമായി വരുന്ന ഈ പദ്ധതി മുൻ വർഷങ്ങളിലും മുന്നോട്ട് വന്നിരുന്നു. എന്നാൽ, പദ്ധതിയുടെ അം​ഗീകാരത്തിൽ കാര്യമായ പുരോ​ഗതിയൊന്നും ഉണ്ടായിരുന്നില്ല. ഇതുസംബന്ധിച്ച ചർച്ചകൾ ഇപ്പോഴും നടന്നുവരികയാണ്. സാമ്പത്തിക നിക്ഷേപത്തെയും അം​ഗീകാരത്തെയും ആശ്രയിച്ചായിരിക്കും പദ്ധതിയുടെ കൂടുതൽ വികസനങ്ങളെന്ന് ഉറവിടങ്ങൾ അറിയിച്ചു.    

read more: പരിശോധനക്കിടെ ജാബർ പാലത്തില്‍ അസ്വാഭാവിക സാഹചര്യത്തിൽ ഇന്ത്യക്കാരൻ, ഉദ്യോഗസ്ഥരുടെ ഇടപെടൽ; ആജീവനാന്ത വിലക്ക്

By admin