ആനന്ദക്കണ്ണീരുമായി ആനന്ദ് മഹീന്ദ്ര; വിൽപ്പന കണ്ട് തലകറങ്ങി എതിരാളികൾ, മഹീന്ദ്രയ്ക്ക് ഇത് ചരിത്രനേട്ടം!
രാജ്യത്തെ ജനപ്രിയ എസ്യുവി ബ്രൻഡാണ് പൂനെ ആസ്ഥാനമായുള്ള ആഭ്യന്തര വാഹന നിർമ്മാതാക്കളായ മഹീന്ദ്ര ആൻഡ് മഹീന്ദ്ര. കമ്പനി കഴിഞ്ഞ സാമ്പത്തിക വർഷത്തിലെയും 2025 മാർച്ച് മാസത്തിലെയും വിൽപ്പന റിപ്പോർട്ട് പുറത്തുവിട്ടു. റെക്കോർഡ് വിൽപ്പനയാണ് കമ്പനി നേടിയതെന്ന് ഈ കണക്കുകൾ വ്യക്തമാക്കുന്നു. 2025 സാമ്പത്തിക വർഷത്തിൽ കമ്പനി 5,51,487 യൂണിറ്റ് എസ്യുവി വിൽപ്പന രേഖപ്പെടുത്തി. കഴിഞ്ഞ സാമ്പത്തിക വർഷത്തിൽ ഇത് 4,59,864 യൂണിറ്റായിരുന്നു. ഇന്ത്യയിൽ മഹീന്ദ്ര അഞ്ച് ലക്ഷം വിൽപ്പന നാഴികക്കല്ല് കടക്കുന്നത് ഇതാദ്യമായാണ്.
2025 മാർച്ചിൽ, മഹീന്ദ്ര വാർഷികാടിസ്ഥാനത്തിൽ 23 ശതമാനം വിൽപ്പന വളർച്ച രേഖപ്പെടുത്തി. മൊത്തം വിൽപ്പന 83,894 യൂണിറ്റായിരുന്നു. ആഭ്യന്തര വിപണിയിൽ, മഹീന്ദ്രയ്ക്ക് 48,048 എസ്‌യുവികൾ വിൽക്കാൻ കഴിഞ്ഞു. ഇത് വാർഷികാടിസ്ഥാനത്തിൽ 18 ശതമാനം വളർച്ച കൈവരിച്ചു. മൊത്തം വാണിജ്യ വാഹന വിൽപ്പന 23,951 യൂണിറ്റായിരുന്നു. ഇത്രയും ശ്രദ്ധേയമായ വിൽപ്പന കണക്കുകളോടെ, മഹീന്ദ്ര ആൻഡ് മഹീന്ദ്ര ഇന്ത്യയിലെ രണ്ടാമത്തെ മികച്ച പാസഞ്ചർ വാഹന നിർമ്മാതാക്കളായി ഉയർന്നുവന്നു. കൂടാതെ കമ്പനി സാമ്പത്തിക വർഷത്തിൽ 20 ശതമാനം വളർച്ചയോടെ ഏറ്റവും ഉയർന്ന വാഹൻ രജിസ്ട്രേഷനുകളും രേഖപ്പെടുത്തി.
മാർച്ചിൽ കമ്പനി ആകെ 48,048 എസ്‌യുവികൾ വിറ്റു എന്ന് വിൽപ്പന റിപ്പോർട്ടിനെക്കുറിച്ച് സംസാരിച്ച മഹീന്ദ്ര ആൻഡ് മഹീന്ദ്ര ലിമിറ്റഡിന്റെ ഓട്ടോമോട്ടീവ് ഡിവിഷൻ പ്രസിഡന്റ് വീജയ് നക്ര പറഞ്ഞു. ഇത് 18 ശതമാനം വളർച്ചയും ആകെ 83894 വാഹനങ്ങളും ഉൾപ്പെടുന്നു. കഴിഞ്ഞ വർഷത്തേക്കാൾ 23 ശതമാനം വളർച്ചയാണിതെന്നും അദ്ദേഹം വ്യക്തമാക്കി. കമ്പനിയുടെ ഇലക്ട്രിക് ഒറിജിൻ എസ്‌യുവികളുടെ ഡെലിവറി ആരംഭിച്ചെന്നും അവിടെ ശക്തമായ ഡിമാൻഡ് ഉണ്ടെന്നും അദ്ദേഹം പറഞ്ഞു. ആഭ്യന്തര വിപണിയിൽ ആദ്യമായി അഞ്ച് ലക്ഷത്തിലധികം എസ്‌യുവികൾ വിറ്റഴിച്ചുകൊണ്ട് വർഷം വളരെ പോസിറ്റീവായിട്ടാണ് അവസാനിച്ചതെന്നും വിജയ് നക്ര പറഞ്ഞു.
2030 ആകുമ്പോഴേക്കും ഒമ്പത് ആന്തരിക ജ്വലന എഞ്ചിൻ എസ്‌യുവികൾ, 7 ബിഇവി (ബാറ്ററി ഇലക്ട്രിക് വാഹനങ്ങൾ), 7 ലൈറ്റ് കൊമേഴ്‌സ്യൽ വാഹനങ്ങൾ എന്നിവ ഉൾപ്പെടെ 23 പുതിയ വാഹനങ്ങൾ പുറത്തിറക്കി തങ്ങളുടെ ഉൽപ്പന്ന നിര വിപുലീകരിക്കാനാണ് മഹീന്ദ്ര ആൻഡ് മഹീന്ദ്ര ലക്ഷ്യമിടുന്നത്. ഈ പദ്ധതി നടപ്പിലാക്കുന്നതിനായി കമ്പനി 37,000 കോടി രൂപ നിക്ഷേപിക്കും. അതേസമയം, സെഗ്‌മെന്റ് ലീഡറായ ടാറ്റ നെക്‌സോൺ ഇവിയെ വെല്ലുവിളിക്കാൻ മഹീന്ദ്ര വരും മാസങ്ങളിൽ XUV3XO ഇവിയെ പുറത്തിറക്കാൻ ഒരുങ്ങുകയാണ്. XUV700 എസ്‌യുവിയുടെ ഇലക്ട്രിക് പതിപ്പായ മഹീന്ദ്ര XEV 7e ഇതിന് പിന്നാലെ പുറത്തിറങ്ങും . ഈ ഇലക്ട്രിക് എസ്യുവി ഈ വർഷം അവസാനത്തോടെ എത്താൻ സാധ്യതയുണ്ട് എന്നാണ് റിപ്പോർട്ടുകൾ.