സമരം ചെയ്യുന്ന ആരോ​ഗ്യപ്രവർത്തകർക്കെതിരെ കൂട്ടനടപടി; 2000 പേരെ പിരിച്ചുവിട്ട് ഗുജറാത്ത് സര്‍ക്കാര്‍

ഗാന്ധിന​ഗർ: ശമ്പളവർധനവ് ഉൾപ്പെടെയുള്ള ആവശ്യങ്ങൾ ഉന്നയിച്ച് സമരം ചെയ്യുന്ന ആരോഗ്യ പ്രവർത്തകർക്കെതിരെ നടപടിയുമായി ഗുജറാത്ത് സർക്കാർ. ജില്ലാ പ്രാഥമികാരോഗ്യ കേന്ദ്രങ്ങളിലെയും കമ്മ്യൂണിറ്റി ഹെൽത്ത് സെന്ററുകളിലെയും 2000 ആരോഗ്യപ്രവര്‍ത്തകരെ പിരിച്ചുവിട്ടു. എട്ട് ജില്ലകളിൽ നിന്നുള്ള  ആരോഗ്യപ്രവർത്തകരെയാണ് പിരിച്ചുവിട്ടത്. മൾട്ടിപർപ്പസ് ഹെൽത്ത് വർക്കർ, വനിതാ ഹെൽത്ത് വർക്കർ, മൾട്ടിപർപ്പസ് ഹെൽത്ത് സൂപ്പർവൈസർ, വനിതാ ഹെൽത്ത് സൂപ്പർവൈസർ എന്നീ തസ്‍തികയിലുള്ളവരെയാണ് പിരിച്ചുവിട്ടത്.

1,000-ത്തിലധികം ജീവനക്കാർക്കെതിരെ വകുപ്പുതല അന്വേഷണത്തിന് സംസ്ഥാന ആരോഗ്യ വകുപ്പ് ഉത്തരവിട്ടിട്ടുണ്ട്. സമരം ചെയ്ത 5000ത്തിലധികം ജീവനക്കാര്‍ക്ക് കാരണം കാണിക്കൽ നോട്ടിസ് അയച്ചിട്ടുണ്ട്. അതേ സമയം സർക്കാർ ചർച്ചയ്ക്ക് ക്ഷണിച്ചില്ലെങ്കിൽ സംസ്ഥാന വ്യാപകമായി പ്രക്ഷോഭം ആരംഭിക്കുമെന്ന് ഗുജറാത്ത്  ആരോഗ്യ പ്രവർത്തക യൂണിയൻ അറിയിച്ചു.