ടാറ്റ സിയറ, ഹാരിയർ ഇവികൾ ഉടൻ വിപണിയിലേക്ക്

ടാറ്റ മോട്ടോഴ്‌സ് രണ്ട് ആവേശകരമായ പുതിയ എസ്‌യുവികൾ രാജ്യത്ത് അവതരിപ്പിക്കാൻ ഒരുങ്ങുകയാണ്. പുതിയ ഹാരിയർ ഇവിയും സിയറയും. 2025 ഏപ്രിൽ-മെയ് മാസങ്ങളിൽ ഹാരിയർ ഇവി പുറത്തിറക്കാൻ പദ്ധതിയിട്ടിട്ടുണ്ട്. ടാറ്റ സിയറ 2025 അവസാനത്തോടെ , മിക്കവാറും 2025 സെപ്റ്റംബർ-നവംബർ മാസത്തോടെ ഇവ വിപണിയിൽ എത്തും. 2025 ലെ ഭാരത് മൊബിലിറ്റി ഗ്ലോബൽ എക്‌സ്‌പോയിൽ ടാറ്റ മോട്ടോഴ്‌സ് സിയറ എസ്‌യുവിയെ ഏതാണ്ട് നിർമ്മാണ ഘട്ടത്തിലുള്ള രൂപത്തിൽ പ്രദർശിപ്പിച്ചിരുന്നു.

പെട്രോൾ, ഡീസൽ, ഇലക്ട്രിക് എന്നിവ ഉൾപ്പെടെ ഒന്നിലധികം എഞ്ചിൻ ഓപ്ഷനുകൾ വാഗ്ദാനം ചെയ്യുന്ന ടാറ്റ സിയറയുടെ അടുത്ത മോഡലായിരിക്കും ഇത്. ഒരു ലൈഫ്‌സ്റ്റൈൽ എസ്‌യുവിയായി വിപണനം ചെയ്യപ്പെടുകയും ടാറ്റ നിരയിലെ  കർവ്വിനും ഹാരിയറിനും ഇടയിൽ സ്ഥാനം പിടിക്കുകയും ചെയ്യും. ടാറ്റ സിയറ ഐസിഇ പതിപ്പ് ബ്രാൻഡിന്റെ പുതിയ 1.5 ലിറ്റർ, 4 സിലിണ്ടർ, ടർബോചാർജ്ഡ് പെട്രോൾ എഞ്ചിന്റെ അരങ്ങേറ്റം കുറിക്കും, ഇത് വരാനിരിക്കുന്ന ഹാരിയർ, സഫാരി പെട്രോളിനും കരുത്ത് പകരും. ഈ എഞ്ചിൻ 168 ബിഎച്ച്പി പവറും 280 എൻഎം ടോർക്കും ഉത്പാദിപ്പിക്കാൻ പ്രാപ്തമാണ്. 6 സ്പീഡ് മാനുവൽ, 7 സ്പീഡ് ഡ്യുവൽ-ക്ലച്ച് ഓട്ടോമാറ്റിക് എന്നിങ്ങനെ രണ്ട് ഗിയർബോക്സ് ഓപ്ഷനുകളോടെ ഇത് വാഗ്ദാനം ചെയ്യുമെന്ന് പ്രതീക്ഷിക്കുന്നു.

ടാറ്റ സിയറ ഇവിയുടെ ബാറ്ററി സവിശേഷതകൾ ഹാരിയർ ഇവിയുടെ ബാറ്ററി സവിശേഷതകൾ പങ്കിടുമെന്ന് പ്രതീക്ഷിക്കുന്നു. രണ്ടാമത്തേതിൽ ഡ്യുവൽ-മോട്ടോർ, AWD സജ്ജീകരണമുള്ള 75kWh ബാറ്ററി പായ്ക്ക് ലഭിക്കുമെന്നാണ് റിപ്പോർട്ട്. ഇലക്ട്രിക് എസ്‌യുവിക്ക് സ്റ്റാൻഡേർഡായി റിയർ-ആക്‌സിൽ-മൗണ്ടഡ് ഇലക്ട്രിക് മോട്ടോറുള്ള ഒരു ചെറിയ 60kWh ബാറ്ററി പായ്ക്കും ലഭിക്കും. ഇലക്ട്രിക് സിയറ പൂർണ്ണ ചാർജിൽ ഏകദേശം 500 കിലോമീറ്റർ+ റേഞ്ച് വാഗ്ദാനം ചെയ്യാൻ സാധ്യതയുണ്ട്.

ഐസിഇ പതിപ്പിയിൽ പ്രവർത്തിക്കുന്ന സിയറയ്‌ക്കൊപ്പം 4×4 ഡ്രൈവ്‌ട്രെയിൻ സിസ്റ്റവും ടാറ്റ വാഗ്ദാനം ചെയ്യുമെന്ന് റിപ്പോർട്ടുകൾ ഉണ്ട്. എങ്കിലും, ഔദ്യോഗിക പ്രഖ്യാപനം ഇതുവരെ നടത്തിയിട്ടില്ല. സിയറയുടെ പ്ലാറ്റ്‌ഫോം 4×4 ഡ്രൈവ്‌ട്രെയിനുമായി പൊരുത്തപ്പെടുമെന്നും റിപ്പോ‍ട്ടുകൾ ഉണ്ട്. ടാറ്റ മോട്ടോഴ്‌സ് ഇന്ത്യൻ റോഡുകളിൽ പുതിയ സിയറ ഇവി, ഐസിഇ പതിപ്പുകൾ തുടർച്ചയായി പരീക്ഷിച്ചുകൊണ്ടിരിക്കുകയാണ്. കഴിഞ്ഞ വർഷം അരങ്ങേറ്റം കുറിച്ച കൺസെപ്റ്റിന് സമാനമായി സിയറ ഇവി കാണപ്പെടുമെന്ന് സമീപകാല സ്പൈ ചിത്രങ്ങൾ വെളിപ്പെടുത്തുന്നു. ഇതിന് നിവർന്നുനിൽക്കുന്ന ഫ്രണ്ട് ഫാസിയ, ചതുരാകൃതിയിലുള്ള എൽഇഡി ഹെഡ്‌ലൈറ്റുകൾ, റാഡാർ സെൻസറുകൾ ഉൾക്കൊള്ളുന്ന വീതിയേറിയ എയർ ഡാം, ഫ്ലഷ്-ടൈപ്പ് ഡോർ ഹാൻഡിലുകൾ, വലിയ ചക്രങ്ങൾ തുടങ്ങിയവ ഉണ്ടായിരിക്കും.

ടാറ്റ സിയറ ഇവിയിൽ ഷാർക്ക്-ഫിൻ ആന്റിന, ഇന്റഗ്രേറ്റഡ് റൂഫ് സ്‌പോയിലർ, പുതുതായി രൂപകൽപ്പന ചെയ്‌ത റാപ്പറൗണ്ട് എൽഇഡി ടെയിൽ-ലൈറ്റുകൾ എന്നിവ ഉണ്ടായിരിക്കും. എസ്‌യുവിയിൽ ബ്ലാക്ക്-ഔട്ട് സി-പില്ലറും റൂഫ് റെയിലുകളും ഉണ്ടാകും.  പുതിയ ടാറ്റ സിയറ ഇവിയിൽ പുതുതായി സ്റ്റൈൽ ചെയ്ത സ്റ്റിയറിംഗ് വീൽ, വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് യൂണിറ്റ്, എയർ കണ്ടീഷനിംഗ് പ്രവർത്തനങ്ങൾക്കുള്ള ടച്ച് കൺട്രോളുകൾ, പൂർണ്ണമായും ഡിജിറ്റൽ ഡ്രൈവർ ഡിസ്‌പ്ലേ, പനോരമിക് സൺറൂഫ്, ലെവൽ 2 ADAS, വെന്റിലേറ്റഡ് ഫ്രണ്ട് സീറ്റുകൾ തുടങ്ങിയവ ഉണ്ടായിരിക്കും എന്നാണ് റിപ്പോ‍ട്ടുകൾ.