ഈ ജനപ്രിയ എസ്‍യുവികൾ ഹൃദയം മാറുന്നു, ഇനി പെട്രോളും ഡീസലും വേണ്ടേവേണ്ട!
ഇന്ത്യയിലെ വികസിച്ചുകൊണ്ടിരിക്കുന്ന ഇലക്ട്രിക് വാഹന വിപണി കണക്കിലെടുത്ത്, വ്യത്യസ്ത വില ശ്രേണികളിൽ പുതിയ ഇലക്ട്രിക് മോഡലുകൾ കമ്പനികൾ അവതരിപ്പിക്കുന്നു. വരും വർഷങ്ങളിൽ മൂന്ന് പ്രധാന ഉൽപ്പന്നങ്ങൾക്ക് വൈദ്യുത പതിപ്പ് ലഭിക്കാൻ പോകുന്നതിനാൽ വിവിധ കമ്പനികളുടെ എസ്‍യുവി വിഭാഗവും വൈദ്യുതീകരണത്തിനായി ഒരുങ്ങുകയാണ്. വരാനിരിക്കുന്ന ഈ ഇലക്ട്രിക് കോംപാക്റ്റ് എസ്‌യുവികളിൽ നിന്ന് നമുക്ക് എന്ത് പ്രതീക്ഷിക്കാം? ഈ മോഡലുകളുടെ പ്രധാന വിശദാംശങ്ങൾ അറിയാം.
മാരുതി ഫ്രോങ്ക്സ് ഫെയ്‌സ്‌ലിഫ്റ്റ്
നിലവിൽ രാജ്യത്ത് ഏറ്റവുമധികം വിറ്റഴിക്കപ്പെടുന്ന കാറാണ് മാരുതി ഫ്രോങ്ക്സ്. ഇ വിറ്റാരയുമായി ഇവി സെഗ്‌മെന്റിലേക്ക് കടക്കാൻ മാരുതി സുസുക്കി തയ്യാറാണ്. അതിനുശേഷം ഇലക്ട്രിക് ഫ്രോങ്ക്സ് ഉൾപ്പെടെയുള്ള ബഹുജന വിപണിയിലേക്കുള്ള ഇവികൾ വരും. നിലവിൽ ഇവി സെഗ്‌മെന്റിൽ ആധിപത്യം പുലർത്തുന്ന ടാറ്റ പഞ്ച് ഇവിയുമായി മാരുതി ഫ്രോങ്ക്സ് ഇവി നേരിട്ട് മത്സരിക്കും. ഇതിന്റെ പവർട്രെയിൻ വിശദാംശങ്ങൾ നിലവിൽ ലഭ്യമല്ലെങ്കിലും, ഇ വിറ്റാരയേക്കാൾ ചെറിയ ബാറ്ററി പായ്ക്കുമായി ഇത് വരാൻ സാധ്യതയുണ്ട്. മാരുതി സുസുക്കി ഇ- വിറ്റാര 49kWh ഉം 61kWh എന്നിങ്ങനെ രണ്ട് ബാറ്ററി പായ്ക്ക് ഓപ്ഷനുകളുമായാണ് വരുന്നത്.
പ്രതീക്ഷിക്കുന്ന ലോഞ്ച് – 2027
പ്രതീക്ഷിക്കുന്ന വില – 12 ലക്ഷം രൂപ മുതൽ
മഹീന്ദ്ര XUV 3XO
മഹീന്ദ്ര ആൻഡ് മഹീന്ദ്ര കുറച്ചുകാലമായി XUV 3XO EV പരീക്ഷിച്ചുവരികയാണ്, വരും മാസങ്ങളിൽ അതിന്റെ വിപണി ലോഞ്ച് നടക്കാൻ സാധ്യതയുണ്ട്. ഈ കോംപാക്റ്റ് ഇലക്ട്രിക് എസ്‌യുവിയിൽ 35kWh ബാറ്ററി പായ്ക്ക് ഉപയോഗിക്കാനാണ് സാധ്യത, ഇത് XUV400 EV യുടെ 40kWh ബാറ്ററിയുടെ ഒരു ചെറിയ പതിപ്പായിരിക്കും. മഹീന്ദ്ര XUV 3XO EV-ക്ക് അകത്തും പുറത്തും ചില ഇവി നിർദ്ദിഷ്ട ഘടകങ്ങൾ ലഭിക്കുമെന്ന് സ്പൈ ചിത്രങ്ങൾ വെളിപ്പെടുത്തുന്നു. പുറംഭാഗത്ത്, വലിയ സെൻട്രൽ എയർ ഇൻടേക്കും ബാഡ്‍ജിംഗും പുതിയ അലോയി വീലുകളും ഉള്ള ഒരു പുതിയ ഗ്രില്ലും ഇതിൽ ഉണ്ടാകും.
പ്രതീക്ഷിക്കുന്ന ലോഞ്ച് – വരും മാസങ്ങൾ
പ്രതീക്ഷിക്കുന്ന വില – 15 ലക്ഷം രൂപ മുതൽ
ഹ്യുണ്ടായി വെന്യു
2025 ജനുവരിയിൽ, ഹ്യുണ്ടായി മോട്ടോർ ഇന്ത്യ തങ്ങളുടെ ബഹുജന വിപണിയിലെ ഇലക്ട്രിക് ഓഫറായ ക്രെറ്റ ഇലക്ട്രിക് പുറത്തിറക്കി. ഇന്ത്യൻ വിപണിക്കായി മൂന്ന് പുതിയ മെയിഡ്-ഇൻ-ഇന്ത്യ ഇലക്ട്രിക് മോഡലുകളും ദക്ഷിണ കൊറിയൻ വാഹന നിർമ്മാതാക്കൾ സ്ഥിരീകരിച്ചു. എങ്കിലും, വരാനിരിക്കുന്ന ഈ ഇലക്ട്രിക് കോംപാക്റ്റ് എസ്‌യുവികളുടെ പേരും വിശദാംശങ്ങളും കമ്പനി ഇതുവരെ വെളിപ്പെടുത്തിയിട്ടില്ല. ഹ്യുണ്ടായി ഇൻസ്റ്റർ ഇവി അടിസ്ഥാനമാക്കിയുള്ള ഇലക്ട്രിക് എസ്‌യുവിയും ഗ്രാൻഡ് ഐ10 നിയോസ്, വെന്യു എന്നിവയുടെ ഇലക്ട്രിക് പതിപ്പുകളും ഈ ശ്രേണിയിൽ ഉൾപ്പെടാൻ സാധ്യതയുണ്ട്. ഹ്യുണ്ടായി വെന്യു ഇവിയുടെ ബാറ്ററി ശേഷിയും ശ്രേണിയും സംബന്ധിച്ച പ്രത്യേക വിശദാംശങ്ങൾ ഇതുവരെ വെളിപ്പെടുത്തിയിട്ടില്ല.