അമ്പോ..എന്തൊരു പോക്കായിരുന്നു! മുടക്കിയത് 200 മില്യൺ, നേടിയത് 6000 കോടിയിലധികം; മുഫാസ ഇനി ഒടിടിയിൽ
ആഘോഷ അവസരങ്ങളിൽ പുത്തൻ സിനിമകൾ റിലീസ് ചെയ്യുന്നത് എല്ലാ ഇന്റസ്ട്രികളിലും പതിവാണ്. അത്തരത്തിൽ കഴിഞ്ഞ വർഷം ക്രിസ്മസ് ദിനത്തിൽ ഒരു കൂട്ടം സിനിമകൾ തിയറ്ററുകളിൽ എത്തിയിരുന്നു. അക്കൂട്ടത്തിൽ ഏറ്റവും ചെലവേറിയ ചിത്രമായിരുന്നു മുഫാസ: ദ ലയൺ കിംഗ്. 200 മില്യൺ ഡോളർ മുടക്കി റിലീസ് ചെയ്ത ചിത്രം, ലോകമെമ്പാടുമുള്ള സിനിമാസ്വാദകർ ഏറ്റെടുത്ത ദ ലയൺ കിങ്ങിന്റെ പ്രീക്വൽ ആയിരുന്നു. ഇപ്പോഴിതാ തിയറ്റർ റിലീസ് ചെയ്ത് രണ്ട് മാസത്തിന് ശേഷം മുഫാസ ഒടിടിയിൽ എത്താൻ ഒരുങ്ങുകയാണ്.
ജിയോ ഹോർട് സ്റ്റാറിനാണ് മുഫാസ ദ ലയൺ കിങ്ങിന്റെ സ്ട്രീമിംഗ് അവകാശം വിറ്റു പോയിരിക്കുന്നത്. മാർച്ച് 26 മുതലാണ് സ്ട്രീമിംഗ്. ഇംഗ്ലീഷ്, ഹിന്ദി, തമിഴ്, തെലുങ്ക് എന്നീ ഭഷകളിൽ ചിത്രം കാണാനാകും. റെക്കോർഡ് തുകയ്ക്കാണ് ഹോർട് സ്റ്റാർ സ്ട്രീമിംഗ് അവകാശം വാങ്ങിയതെന്നാണ് റിപ്പോർട്ടുകൾ.
2024 ഡിസംബർ 20ന് റിലീസ് ചെയ്ത ചിത്രമാണ് മുഫാസ: ദ ലയൺ കിംഗ്. ബോക്സ് ഓഫീസിൽ വലിയ കളക്ഷൻ നേടാൻ ചിത്രത്തിനാ സാധിച്ചിരുന്നു. റിപ്പോർട്ടുകൾ പ്രകാരം 700 മില്യൺ ഡോളറാണ് ഇതുവരെ മുഫാസ കളക്ട് ചെയ്തിരിക്കുന്നത്. അതായത് 6093 കോടിയിലധികം രൂപയാണ് ചിത്രം നേടിയത്. കഴിഞ്ഞ വർഷം റിലീസ് ചെയ്ത സിനിമകളിൽ ഏറ്റവും കൂടുതൽ കളക്ഷൻ നേടിയ ടോപ് 10 ചിത്രങ്ങളിൽ ഒന്നും മുഫാസയാണ്.
ബാരി ജെങ്കിൻസ് ആണ് മുഫാസ: ദ ലയൺ കിംഗ് സംവിധാനം ചെയ്തത്. അമേരിക്കൻ മ്യൂസിക്കൽ ഡ്രാമ ചിത്രം എഴുതിയത് ജെഫ് നഥാൻസൺ ആണ്. 2019ൽ ആയിരുന്നു ദ ലയൺ കിംഗ് റിലീസ് ചെയ്തത്. കേരളത്തിൽ അടക്കം ശ്രദ്ധനേടിയ ചിത്രം 1.66 ബില്യൺ ആണ് ആഗോള തലത്തിൽ നേടിയിരുന്നത് എന്നാണ് റിപ്പോർട്ട്.