സാവോ പോളോ : കൂവിവിളിച്ച എതിർ ടീമിന്റെ ആരാധകർക്ക് ഗോളടിച്ച് മറുപടി നൽകി സാന്റോസ് താരം നെയ്മർ.
പോളിസ്റ്റ എ വൺ ലീഗ് മത്സരത്തിൽ ഇന്റർനാഷണൽ ഡെ ലിമെയ്റയ്ക്കെതിരെയായിരുന്നു നെയ്മറിന്റെ സൂപ്പർ ഗോൾ.
മത്സരത്തിന്റെ 27-ാം മിനിറ്റിലാണ് നെയ്മർ ഗോൾ നേടിയത്. കോർണർ കിക്കെടുക്കാനായി നെയ്മർ എത്തിയപ്പോൾ ലിമെയ്റ ആരാധകർ കൂക്കി വിളിക്കുകയായിരുന്നു.
എന്നാൽ ശബ്ദം പോരെന്ന് മറുപടി നൽകിയ നെയ്മർ തൊട്ടടുത്ത നിമിഷം കോർണർ കിക്ക് വലയിലാക്കുകയായിരുന്നു.
മത്സരത്തിൽ സാന്റോസ് എതിരില്ലാത്ത മൂന്ന് ഗോളിന് ജയിച്ചു. സാന്റോസിനായുള്ള നെയ്മറിന്റെ രണ്ടാം ഗോളാണിത്.
ബാഴ്സയിലെത്തുന്നതിനു മുമ്പ് സാന്റോസിന്റെ താരമായിരുന്നു നെയ്മർ. സൗദി ക്ലബ്ബായ അൽ ഹിലാലിൽ നിന്നാണ് നെയ്മർ തിരിച്ച് സാന്റോസിലെത്തിയത്.