ഇടുക്കി: ഇടുക്കിയില്‍ വന്‍ വാറ്റ് ചാരായ വേട്ട. കമ്പംമെട്ട് കട്ടേക്കാനത്ത് വീട്ടില്‍ സൂക്ഷിച്ചിരുന്ന 245 ലിറ്റര്‍ ചാരായമാണ് അടിമാലി നാര്‍ക്കോട്ടിക് എന്‍ഫോഴ്‌സ്‌മെന്റ് സംഘം കണ്ടെടുത്തത്. ചാരായം സൂക്ഷിച്ച സന്തോഷിനെയും എക്‌സൈസ് സംഘം പിടികൂടി. കഴിഞ്ഞ വര്‍ഷത്തിനിടെ ഇടുക്കിയിലെ വലിയ ചാരായവേട്ടയാണിത്.
നിരവധി അബ്ക്കാരിക്കേസുകളില്‍ പ്രതിയായ സന്തോഷ് ചാരായം നിര്‍മ്മിച്ചു സൂക്ഷിച്ചെന്ന വിവരത്തിന്റെ അടിസ്ഥാനത്തിലായിരുന്നു എക്‌സൈസ് സംഘം സന്തോഷിന്റെ വീട്ടിലെത്തിയത്. വീട്ടിലെ കിടപ്പുമുറിയില്‍ സൂക്ഷിച്ചിരുന്ന 35 ലിറ്റര്‍ ചാരായം ആദ്യം കണ്ടെടുത്തു.
ശേഷിക്കുന്നവ പറമ്പില്‍ കുഴിച്ചിട്ടെന്ന് എക്‌സൈസ് സംഘത്തിന് സൂചന കിട്ടിയിരുന്നു. തുടര്‍ന്ന് സന്തോഷിന്റെ വീട്ടുപറമ്പ് മുഴുവന്‍ കിളച്ചുനോക്കിയാണ് ആറു കന്നാസുകളിലുള്‍പ്പെടെ സൂക്ഷിച്ചിരുന്ന ചാരായ ശേഖരം കണ്ടെത്തിയത്.
അതിര്‍ത്തി ഗ്രാമങ്ങളിലും എസ്റ്റേറ്റ് മേഖലകളും കേന്ദ്രീകരിച്ച് ചാരായത്തിന്റെ മൊത്തക്കച്ചവടക്കാരനാണ് സന്തോഷെന്നാണ് എക്‌സൈസിന് കിട്ടിയ വിവരം. ചാരായം എവിടെ നിര്‍മ്മിച്ചെന്നതിലുള്‍പ്പെടെ വ്യക്തത വരുത്തേണ്ടതുണ്ട്. നെടുങ്കണ്ടത്തെ എക്‌സൈസ് യൂണിറ്റാവും തുടരന്വേഷണം നടത്തുക.