ദുരന്തത്തിന് കാരണം റെയിൽ‌വേയുടെ ഗുരുതരമായ അശ്രദ്ധ. ദുരന്തത്തിന് ഉത്തരവാദി ബിജെപിയുടെ നേതൃത്വത്തിലുള്ള കേന്ദ്ര സർക്കാരും റെയിൽവേ മന്ത്രിയും. ട്രെയിൻ സമയക്രമവും പ്ലാറ്റ്‌ഫോമും അവസാന നിമിഷം മാറ്റിയത്​ ദുരന്തത്തിന്​ ആക്കം കൂട്ടി. ഡൽഹി റെയിൽവേ സ്​റ്റേഷൻ ദുരന്തത്തിൽ കേന്ദ്രത്തിനെതിരെ പ്രതിപക്ഷം

ഡൽഹി: ന്യൂഡൽഹി റെയിൽവേ സ്റ്റേഷനിൽ തിക്കിലും തിരക്കിലും 18 പേർ മരിച്ചതിന്​ പിന്നാലെ കേന്ദ്ര സർക്കാരിനെയും റെയിൽവേ മന്ത്രിയെയും കുറ്റപ്പെടുത്തി പ്രതിപക്ഷം. സർക്കാരിൻറെ കെടുകാര്യസ്ഥതയും അശ്രദ്ധയുമാണ്​ ദുരന്തത്തിന്​ കാരണമെന്ന്​ നേതാക്കാൾ ചൂണ്ടിക്കാട്ടി.
ദുരന്തത്തിന് ഉത്തരവാദി ബിജെപിയുടെ നേതൃത്വത്തിലുള്ള കേന്ദ്ര സർക്കാരും റെയിൽവേ മന്ത്രി അശ്വിനി വൈഷ്ണവുമാണെന്ന് പ്രതിപക്ഷം ആരോപിച്ചു. അങ്ങേയറ്റം ദുഃഖകരമായ സംഭവമാണെന്ന്​ ലോക്സഭാ പ്രതിപക്ഷ നേതാവ് രാഹുൽ ഗാന്ധി പറഞ്ഞു.​ മരണപ്പെട്ടവർക്ക്​ അദ്ദേഹം അനുശോചനം രേഖപ്പെടുത്തി.
റെയിൽ‌വേയുടെ ഗുരുതരമായ അശ്രദ്ധയാണ് ദുരന്തത്തിന് കാരണമെന്ന് ബിഎസ്പി നേതാവും ഉത്തർപ്രദേശ് മുൻ മുഖ്യമന്ത്രിയുമായ മായാവതി ആരോപിച്ചു. ‘റെയിൽവേയുടെ ഗുരുതരമായ അശ്രദ്ധ കാരണം തിക്കിലും തിരക്കിലും പെട്ട് നിരവധി പേർ കൊല്ലപ്പെടുകയും പരിക്കേൽക്കുകയും ചെയ്തു.
അത്യന്തം ദാരുണമായ സംഭവമാണിത്​. ഇരകൾക്ക് എൻറെ അഗാധമായ അനുശോചനം. ഉത്തരവാദികളായവർക്കെതിരെ സർക്കാർ നടപടിയെടുക്കുകയും ഇരകൾക്ക് പൂർണ സഹായം നൽകുകയും വേണം’ -അവർ പറഞ്ഞു.
ഉത്തർപ്രദേശിലെ പ്രയാഗ്‌രാജിൽ നടക്കുന്ന മഹാകുംഭമേളയിൽ പങ്കെടുക്കാൻ പ്രത്യേക ട്രെയിനുകളിൽ കയറാൻ ശ്രമിക്കുന്നതിനിടെയാണ്​ ദുരന്തമുണ്ടാകുന്നത്​. സ്റ്റേഷനിൽ തടിച്ചുകൂടിയ വലിയ ജനക്കൂട്ടത്തെ നിയന്ത്രിക്കുന്നതിൽ പാളിച്ചയുണ്ടായെന്ന്​ ദൃക്സാക്ഷികൾ പറയുന്നു​. ട്രെയിൻ സമയക്രമത്തിലും പ്ലാറ്റ്‌ഫോമിലും അവസാന നിമിഷം മാറ്റം വരുത്തിയതും കുഴപ്പങ്ങൾക്ക് ആക്കം കൂട്ടിയെന്ന്​ ഇവർ ചൂണ്ടിക്കാട്ടുന്നുണ്ട്​.