കൊല്ലം: കൊല്ലം കുളത്തൂപ്പുഴ ഓയില്‍ ഫാം എസ്റ്റേറ്റില്‍ തീപിടുത്തം. കണ്ടന്‍ച്ചിറ എണ്ണപ്പന എസ്റ്റേറ്റിലാണ് തീപിടിത്തമുണ്ടായത്. എസ്റ്റേറ്റിന് സമീപമുള്ള അഞ്ചേക്കറോളം വരുന്ന എണ്ണപ്പന തോട്ടത്തിലാണ് തീ പടര്‍ന്ന് പിടിച്ചത്.
പുക ശ്വസിച്ചതിനെ തുടര്‍ന്ന് തൊഴിലാളികള്‍ക്ക് ദേഹാസ്വാസ്ഥ്യം അനുഭവപ്പെട്ടു. തുടര്‍ന്ന് മൂന്ന് തോട്ടം തൊഴിലാളികളെ ആശുപത്രിയില്‍ പ്രവേശിപ്പിച്ചു.
കൂടുതല്‍ ഭാഗങ്ങളിലേക്ക് തീ പടര്‍ന്നിട്ടുണ്ടോ എന്നും പരിശോധന നടത്തുന്നുണ്ട്. കടുത്ത വേനലില്‍ ഇടക്കാടുകള്‍ക്ക് തീപിടിച്ചതാണ് അഗ്‌നിബാധയ്ക്ക് കരണമെന്നാണ് പ്രാഥമിക വിവരം.
തോട്ടത്തില്‍ പുതുതായി പ്ലാന്റ് ചെയ്ത ആയിരക്കണക്കിന് എണ്ണപ്പന തൈകള്‍ തീപിടിത്തത്തില്‍ കത്തി നശിച്ചു. ആള്‍താമസമില്ലാത്ത മേഖല ആയതിനാല്‍ ആശങ്കപ്പെടേണ്ട സാഹചര്യമില്ലെന്നാണ് അധികൃതര്‍ പറയുന്നത്.