ആരും കാണാത്ത ഗാൽവൻ യുദ്ധഭൂമി സഞ്ചാരികൾക്കായി തുറക്കുന്നു; ബാറ്റിൽഫീൽഡ് ടൂറിസത്തിന്റെ വിശദ വിവരങ്ങൾ ഇതാ
ഇന്ത്യൻ സൈന്യവും ചൈനീസ് പട്ടാളവും ഏറ്റുമുട്ടിയ ഗാൽവനിലെ യുദ്ധക്കളം ഇനി നേരിൽ കാണാം. ചൈനയുമായുള്ള യഥാർത്ഥ നിയന്ത്രണ രേഖയ്ക്ക് (എൽഎസി) സമീപം സ്ഥിതി ചെയ്യുന്ന ലഡാക്കിലെ ഗാൽവാൻ താഴ്‌വര സഞ്ചാരികൾക്കായി തുറന്നുകൊടുക്കും. ഇന്ത്യൻ സൈന്യവുമായി കൈകോർത്ത് പ്രതിരോധ മന്ത്രാലയമാണ് ഗാൽവൻ താഴ്വരയെ വിനോദ സഞ്ചാര കേന്ദ്രമാക്കി മാറ്റാൻ തീരുമാനിച്ചിരിക്കുന്നത്. 2020-ൽ 20 ഇന്ത്യൻ സൈനികരും 42 ചൈനീസ് സൈനികരും കൊല്ലപ്പെട്ട ഗാൽവാൻ താഴ്‌വരയിലെ ഏറ്റുമുട്ടലിന്റെ അഞ്ചാം വാർഷികത്തോടനുബന്ധിച്ചാണ് ബാറ്റിൽഫീൽഡ് ടൂറിസം പദ്ധതി ഉദ്ഘാടനം ചെയ്യുക.
നിലവിൽ ഗാൽവൻ താഴ്‌വര സന്ദർശിക്കാൻ പ്രദേശവാസികൾക്ക് പോലും അനുവാദമില്ല. എന്നാൽ, ഈ മേഖലയിലെ വിനോദ സഞ്ചാരം സുഗമമാക്കുന്നതിന് ആവശ്യമായ അടിസ്ഥാന സൗകര്യങ്ങൾ ഒരുക്കുന്നതിനുള്ള ക്രമീകരണങ്ങൾ പുരോഗമിക്കുകയാണ്. നിലവിൽ, സന്ദർശകർക്കുള്ള സൗകര്യങ്ങൾ തയ്യാറാക്കുന്നതിലും സുരക്ഷ ഉറപ്പാക്കുന്നതിനും ആവശ്യമായ കാര്യങ്ങൾ തയ്യാറാക്കാൻ ലഡാക്ക് ഭരണകൂടം ഇന്ത്യൻ സൈന്യവുമായി സഹകരിച്ച് പ്രവർത്തിക്കുന്നുണ്ട്. അതിർത്തി, ഗ്രാമീണ ടൂറിസം എന്നിവയെ പ്രോത്സാഹിപ്പിക്കുന്നതിലൂടെ പ്രാദേശിക തലത്തിൽ സാമ്പത്തിക ഉന്നമനം കൈവരിക്കാൻ ഈ സംരംഭം സഹായിക്കുമെന്നാണ് വിലയിരുത്തൽ.
ഗാൽവനിലേയ്ക്ക് എത്തുന്ന സന്ദർശകരെ ഉൾക്കൊള്ളുന്നതിനായി രണ്ട് പ്രധാന കേന്ദ്രങ്ങൾ വികസിപ്പിച്ചു കൊണ്ടിരിക്കുകയാണെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ഡർബക്കിൽ നിന്ന് ഏകദേശം 5 കിലോമീറ്റർ അകലെയാണ് ഇതിൽ ഒരു കേന്ദ്രം സ്ഥിതി ചെയ്യുന്നത്. ഇവിടെ കഫറ്റീരിയ, സുവനീർ ഷോപ്പ് എന്നിവ ഉണ്ടാകും. ഏകദേശം 30 വിനോദ സഞ്ചാരികൾക്ക് താമസിക്കാനുള്ള സൗകര്യങ്ങൾ ഇവിടെ ഉണ്ടാകുമെന്നാണ് റിപ്പോർട്ട്. ഡർബക്കിൽ നിന്ന് 12 കിലോമീറ്റർ അകലെയാണ് രണ്ടാമത്തെ കേന്ദ്രം ഒരുക്കുന്നത്. സമാനമായ സൗകര്യങ്ങൾ ഇവിടെയും ഒരുക്കും.
READ MORE: പാറമുകളിലേയ്ക്ക് വാഹനം ഓടിച്ച് കയറ്റാം! അസ്തമയ ഭംഗിയിൽ അലിയാം; വിസ്മയിപ്പിക്കും കടുമ്പുപാറ