കണ്ണൂര്‍: സെറിബ്രല്‍ പാള്‍സി രോഗം ബാധിച്ച് ദുരിതത്തിലായ കണ്ണൂര്‍ ചെറുപുഴ ചുണ്ടയില്‍ അക്ഷര(അമ്മു-13)യ്ക്ക് വീടൊരുക്കി പ്രവാസി വ്യവസായിയും അബുദാബി ആസ്ഥാനമായി പ്രവര്‍ത്തിക്കുന്ന ലുലു ഫിനാന്‍ഷ്യല്‍ ഹോള്‍ഡിങ്‌സ് എം.ഡിയുമായ അദീബ് അഹമ്മദിന്റെ നേതൃത്വത്തില്‍ പ്രവര്‍ത്തിക്കുന്ന അദീബ് ആന്റ് ഷെഫീന ഫൗണ്ടേഷന്‍.
അതോടൊപ്പം ഇവരുടെ ബാങ്കിലുള്ള കടബാധ്യതയും അദീബ് ആന്റ് ഷെഫീന ഫൗണ്ടേഷന്‍ ഏറ്റെടുത്തു. രോഗബാധിതയായ അമ്മുവിന്റെ വര്‍ഷങ്ങളായുള്ള ചികിത്സയെത്തുടര്‍ന്ന് ദുരിതത്തിലായ കുടുംബത്തിന് സ്വന്തമായി വീടില്ലെന്ന മാധ്യമവാര്‍ത്ത ശ്രദ്ധയില്‍പ്പെട്ടപ്പോള്‍ അദീബ് അഹമ്മദ് ഈ കുടുംബത്തിന് വീട് നിര്‍മ്മിച്ച് നല്‍കാന്‍ തയ്യാറാകുകയായിരുന്നു.
തുടര്‍ന്ന് ഫൗണ്ടേഷന്‍ ഭാരവാഹികളെ ചെറുപുഴയില്‍ എത്തിച്ച് വിവരങ്ങള്‍ മനസിലാക്കി ഇവര്‍ക്ക് വീട് വച്ച് നല്‍കാനുള്ള ഉദ്യമം ഏറ്റെടുക്കുകയും ചെയ്തു. അമ്മുവിന്റെ ചികിത്സയ്ക്കായി ലക്ഷങ്ങളുടെ കടമാകുകയും മരപ്പണിക്കാരനായ പിതാവ് സുരേഷ് പരിക്കേറ്റ് ചികിത്സയിലാകുകയും ചെയ്തതോടെ നേരത്തെ നിര്‍മ്മാണം ആരംഭിച്ച ഇവരുടെ വീടിന്റെ പണി നിലയ്ക്കുകയും ചെയ്തിരുന്നു.
2024 മേയ് മാസത്തിലാണ് അമ്മുവിന്റെ ദുരിതത്തെക്കുറിച്ചുള്ള മാധ്യമ വാര്‍ത്ത അദീബ് അഹമ്മദിന്റെ ശ്രദ്ധയില്‍പ്പെട്ടത്. 2024 ജൂണ്‍ മാസത്തില്‍ നിര്‍മ്മാണ പ്രവര്‍ത്തനം അദീബ് ആന്റ് ഷെഫീന ഫൗണ്ടേഷന്‍ ഏറ്റെടുത്തു. രണ്ട് മുറിയും ഒരു അടുക്കളയും മാത്രമായി നിര്‍മ്മാണം ആരംഭിച്ചിരുന്ന വീടിന്റെ നിര്‍മ്മാണ പ്രവര്‍ത്തനം അദീബ് ആന്റ് ഷെഫീന ഫൗണ്ടേഷന്‍ ഏറ്റെടുത്തതോടെ കൂടുതല്‍ സൗകര്യങ്ങള്‍ ഉള്‍പ്പെടുത്തി സിറ്റൗട്ട്, ഹാള്‍, അടുക്കള, മൂന്ന് മുറികള്‍, മുന്നിലേക്ക് ഷീറ്റ് കെട്ടി ഇറക്കി വീല്‍ ചെയറില്‍ കൂടുതല്‍ സഞ്ചരിക്കാന്‍ കഴിയുന്ന സാഹചര്യവും അതിനോടൊപ്പം ചുറ്റുമതില്‍ ഉള്‍പ്പെടെ നിര്‍മ്മിച്ച് വീട് അടച്ചുറപ്പുള്ള സുരക്ഷിത മന്ദിരമാക്കുകയും ചെയ്തു.
ജന്മനാ സെറിബ്രല്‍ പാള്‍സി രോഗത്തെ തുടര്‍ന്ന് പരസഹായമില്ലാതെ നടക്കാനോ മറ്റും കഴിയാത്ത സ്ഥിതിയിലാണ് അമ്മുവിന്റെ ജീവിതം. അമ്മുവിന്റെ അമ്മ സുഷമ അടുത്തുള്ള സ്‌കൂളില്‍ ഉച്ചഭക്ഷണം പാചകം ചെയ്യുന്ന ജോലിയാണ് ചെയ്തിരുന്നത്.
സുഷമയുടെ അമ്മയും ഇവരുടെ കൂടെയാണ് താമസം. അമ്മുവിന് വീടിന് അകത്ത് ഉള്‍പ്പെടെ വീല്‍ ചെയറിലൂടെ സഞ്ചരിക്കാനുള്ള സൗകര്യവും പുതിയ വീട്ടിലൊരുക്കിയിട്ടുണ്ട്.
2025 ജനുവരി 19ന് നാട്ടുകാര്‍ ഉത്സവാന്തരീക്ഷത്തില്‍ ഏറ്റെടുത്ത ഗൃഹപ്രവേശന ചടങ്ങില്‍ വച്ച് അദീബ് അഹമ്മദിന്റെ സെക്രട്ടറി സനീര്‍ പി.എയും ഫൗണ്ടേഷന്‍ പ്രതിനിധി വിജു അസീസും ചേര്‍ന്ന് വീടിന്റെ താക്കോല്‍ അമ്മുവിനും കുടുംബത്തിനും കൈമാറി. തുടര്‍ന്ന് പാലുകാച്ചി കുടുംബം താമസം ആരംഭിക്കുകയായിരുന്നു.
ചെറുപുഴ ചുണ്ട റെസിഡന്‍സ് അസോസിയേഷന്‍ ഭാരവാഹികളായ രാജു ചുണ്ട, വിശ്വനാഥന്‍ കെ.വി, രാജന്‍ കെ, ബേബി എന്‍.ജെ, വിജേഷ് കണ്ടതില്‍ തുടങ്ങിയവരും നാട്ടുകാരും സന്നിഹിതനായിരുന്നു. അദീബ് ആന്റ് ഷെഫീന ഫൗണ്ടേഷന്‍ തങ്ങള്‍ക്ക് പുതിയൊരു ജീവിതമാണ് സമ്മാനിച്ചതെന്ന് അമ്മുവിന്റെ മാതാവ് സുഷമ പറഞ്ഞു.
അബുദാബി ആസ്ഥാനമായി പ്രവര്‍ത്തിക്കുന്ന ലുലു ഫിനാന്‍ഷ്യല്‍ ഹോള്‍ഡിംഗ്‌സ് എം.ഡി. അദീബ് അഹമ്മദിന്റേയും പത്‌നിയും റിസ്ഖ് ആര്‍ട്ട് ഇനിഷ്യേറ്റീവ് ഫൗണ്ടറുമായ ഷെഫീന യൂസഫലിയുടേയും നേതൃത്വത്തിലാണ് അദീബ് ആന്റ് ഷെഫീന ഫൗണ്ടേഷന്‍ പ്രവര്‍ത്തിക്കുന്നത്.
തങ്ങളുടെ പ്രവാസി ജീവിതത്തിന്റെ തിരക്കുകള്‍ക്കിടയിലും നാട്ടില്‍ ഇത്തരത്തില്‍ അവശത അനുഭവിക്കുന്നവരുടെ ഉന്നമനത്തിന് വേണ്ടി പ്രവര്‍ത്തിക്കാന്‍ വേണ്ടിയാണ് അദീബ് ആന്റ് ഷെഫീന ഫൗണ്ടേഷന്‍ രൂപീകരിച്ചത്.
തിരുവനന്തപുരത്ത് സംസ്ഥാന സര്‍ക്കാരിന് കീഴിലെ ശിശുക്ഷേമ സമിതിയിലെ കുട്ടികള്‍ക്കായി അദീബ് ആന്റ് ഷെഫീന ഫൗണ്ടേഷന്‍ ബഹുനില മന്ദിരം ഉള്‍പ്പെടെ നിര്‍മ്മിച്ച് നല്‍കിയിട്ടുണ്ട്.
