തൃശൂര്‍: ഇരിങ്ങാലക്കുട സിവില്‍ സ്റ്റേഷനു സമീപം മദ്യം കയറ്റി വന്ന ലോറിയില്‍ നിന്നും കടുത്ത പുക ഉയര്‍ന്നത് പരിഭ്രാന്തി പരത്തി. വെള്ളിയാഴ്ച രാവിലെയാണ് സംഭവം. എന്നാല്‍, അപകടം നടന്നയുടനെ ലോറി ഡ്രൈവര്‍ ബാറ്ററിയുടെയും ഡീസല്‍ ടാങ്കിലേയ്ക്കുമുള്ള വാഹനത്തിന്റെ ബന്ധങ്ങള്‍ വിഛേദിച്ചത് വന്‍ ദുരന്തം ഒഴിവാക്കി.
സംഭവത്തെ തുടര്‍ന്ന് ഇരിങ്ങാലക്കുട അസി. സ്റ്റേഷന്‍ ഓഫിസര്‍ കെ. പി. സജീവന്റെ നേതൃത്വത്തിലുള്ള അഗ്‌നിശമന സേനാംഗങ്ങള്‍ എത്തി തീ നിയന്ത്രണ വിധേയമാക്കി.
വാഹനത്തിന്റെ എഞ്ചിനിലെ ടര്‍ബോ കത്തിയതാണ് അപകടത്തിന് കാരണമായതെന്നാണ് അഗ്‌നിശമന സേന പ്രാഥമികമായി വിലയിരുത്തുന്നത്.
സംസ്ഥാന പാതയില്‍ റോഡ് നിര്‍മാണം നടക്കുന്നതിനാല്‍ തൃശ്ശൂര്‍ ഭാഗത്തേയ്ക്കുള്ള വാഹനങ്ങള്‍ ഇരിങ്ങാലക്കുട വഴിയാണ് കടത്തി വിടുന്നത്. അപകടത്തെ തുടര്‍ന്ന് ഏറെ നേരം ഇതുവഴിയുള്ള ഗതാഗതം തടസപ്പെട്ടു.