പി. ജയചന്ദ്രനൊപ്പമാണ് ഞാന്‍ സ്റ്റേജ് ഷോയില്‍ ആദ്യമായി പാടിത്തുടങ്ങിയത്, അദ്ദേഹം എന്റെ വീട്ടില്‍ വരാറുണ്ട്; അനുശോചിച്ച് കെ.എസ്. ചിത്ര

തൃശൂര്‍: ഗായകന്‍ പി. ജയചന്ദ്രന്റെ വിയോഗ വാര്‍ത്തയില്‍ അനുശോചിച്ച് ഗായിക കെ.എസ്. ചിത്ര. ഫെയ്‌സ്ബുക്ക് കുറിപ്പിലൂടെയാണ് ചിത്രയുടെ പ്രതികരണം.
”ജയേട്ടന്റെ പെട്ടെന്നുള്ള വിയോഗ വാര്‍ത്ത കേട്ടപ്പോള്‍ എനിക്ക് വളരെ ദുഃഖം തോന്നി. അദ്ദേഹത്തിനൊപ്പമാണ് ഞാന്‍ സ്റ്റേജ് ഷോയില്‍ ആദ്യമായി പാടി തുടങ്ങിയത്. അദ്ദേഹം എന്റെ വീട്ടില്‍ വരാറുണ്ട്. അദ്ദേഹത്തിനൊപ്പം ധാരാളം സമയം ചെലവിടാന്‍ സാധിച്ചതു ഭാഗ്യമായി കരുതുന്നു.
തൃശൂരില്‍ വന്നപ്പോള്‍ വയ്യാതിരിക്കുന്ന അദ്ദേഹത്തെ മൂന്ന് തവണ കാണാന്‍ ശ്രമിച്ചു. എന്നാല്‍ സന്ദര്‍ശകരെ അനുവദിക്കാത്തതിനാല്‍ അതിനു അവസരം ലഭിച്ചില്ല. അതില്‍ സങ്കടമുണ്ട്.
ഗുരുവായൂരപ്പ ഭക്തന്‍ എന്ന നിലയില്‍ വൈകുണ്ഠ ഏകാദശിക്ക് തൊട്ടുമുമ്പ് അദ്ദേഹം നമ്മെ വിട്ടുപിരിഞ്ഞു. അനുഗ്രഹീതമായ ആത്മാവ്. അദ്ദേഹത്തിനു ആത്മശാന്തി നേരുന്നു. കുടുംബാംഗങ്ങളോടു ഹൃദയംഗമമായ അനുശോചനം അറിയിക്കുന്നു. സദ്ഗതി..”