തിരുവനന്തപുരം: തീയേറ്ററുകളിൽ സിനിമ കാണുന്നതിനിടെ കറുമുറാ തിന്നുന്ന പോപ്കോണിന്റെ നികുതി ഉയർത്തിയെന്ന പ്രചാരണത്തോടെ ആശങ്കയിലായിരുന്നു സിനിമാ പ്രേമികൾ.
സിനിമയ്ക്കിടെ ഏറ്റവും കൂടുതൽ പേർ ഭക്ഷിക്കുന്നതാണ് പോപ്കോൺ. എന്നാൽ ജി.എസ്.ടി കൗൺസിൽ യോഗത്തിൽ പോപ്കോണിന്റെ ജി.എസ്.ടി നിരക്ക് വർദ്ധിപ്പിക്കാൻ തീരുമാനിച്ചിട്ടില്ലെന്ന് വ്യക്തത വരുത്തുകയാണ് കേന്ദ്രസർക്കാർ
കേന്ദ്രം പറയുന്നത് ഇങ്ങനെ- അടുത്തിടെ നടന്ന ജിഎസ്‌ടി കൗൺസിൽ യോഗത്തിൽ പോപ്കോണിന്റെ ജിഎസ്‌ടി നിരക്കിൽ വർധന വരുത്തിയിട്ടില്ല.
ഉപ്പും മസാലകളും ചേർത്ത പോപ്കോൺ ഉൾപ്പെടുന്ന ഭക്ഷ്യവർഗീകരണവും ജിഎസ്‌ടി നിരക്കും വ്യക്തമാക്കാൻ ഉത്തർപ്രദേശിൽനിന്ന് അഭ്യർഥന ലഭിച്ചു. ഈ വിഷയം 55-ാമത് ജിഎസ്‌ടി കൗൺസിലിന്റെ ശ്രദ്ധയിൽപ്പെടുത്തുകയും, ഇക്കാര്യം വ്യക്തമാക്കാൻ കൗൺസിൽ ശുപാർശ നൽകുകയും ചെയ്തു.
വ്യത്യസ്ത തരം പോപ്‌കോണുകളുടെ നിരക്കിലെ വ്യത്യാസത്തിന്റെ അടിസ്ഥാനം എന്താണെന്നതിലും കേന്ദ്രം വ്യക്തത വരുത്തുന്നുണ്ട്.
ലോക കസ്റ്റംസ് ഓർഗനൈസേഷൻ വികസിപ്പിച്ചെടുത്ത വിവിധോദ്ദേശ്യ അന്താരാഷ്ട്ര ഉൽപ്പന്ന നാമകരണ പദ്ധതിയായ ഏകീകൃത സമ്പ്രദായ വർഗീകരണമനുസരിച്ചാണ് ഭക്ഷ്യവസ്തുക്കൾ ഉൾപ്പെടെയുള്ള എല്ലാ ഉൽപ്പന്നങ്ങളും ജിഎസ്‌ടിക്കു കീഴിൽ തരംതിരിച്ചിരിക്കുന്നത്.
അന്താരാഷ്ട്ര വ്യാപാരത്തിലേർപ്പെട്ടിരിക്കുന്ന 98 ശതമാനത്തിലധികം വരുന്ന 200-ലധികം രാജ്യങ്ങൾ ഈ സമ്പ്രദായം ഉപയോഗിക്കുന്നു. എച്ച്എസ് സമ്പ്രദായത്തിലെ വിവിധ അധ്യായങ്ങൾക്കു കീഴിലുള്ള ഉൽപ്പന്നങ്ങളുടെ വർഗീകരണത്തിന്റെ അടിസ്ഥാനത്തിലാണു വ്യത്യസ്ത ജിഎസ്‌ടി നിരക്കുകൾ നിശ്‌ചയിക്കുന്നത്
എച്ച്എസ് വർഗീകരണം അനുസരിച്ച്, പഞ്ചസാര ചേർത്ത മധുരപലഹാരങ്ങൾ 17-ാം അധ്യായത്തിൽ എച്ച്എസ് 1704-ന് കീഴിൽ വരുന്നു. ചില നിർദിഷ്ട ഇനങ്ങൾ ഒഴികെയുള്ള എല്ലാ മധുരപലഹാരങ്ങൾക്കും 18% ജിഎസ്‌ടി ഈടാക്കുന്നു.
ഇന്ത്യയിൽ, ഉപ്പ് ചേർത്ത ലഘു ഭക്ഷണങ്ങളെ എച്ച്എസ് 2106 90 99 പ്രകാരം തരംതിരിച്ചിട്ടുണ്ട്. മുൻകൂട്ടി പാക്കു ചെയ്തതോ ലേബൽ ചെയ്തതോ അല്ലാത്ത രൂപത്തിൽ വിൽക്കുമ്പോൾ 5% ജിഎസ്‌ടിയും മുൻകൂട്ടി പാക്കു ചെയ്‌തതും ലേബൽ ചെയ്തതുമായ രൂപത്തിൽ വിൽക്കുമ്പോൾ 12% ജിഎസ്‌ടിയുമാണ് ഉപ്പ് ചേർത്ത ലഘുഭക്ഷണങ്ങൾക്ക് ഈടാക്കുന്നത്.
ഉപ്പും മസാലകളും കലർത്തിയ ‘റെഡി ടു ഈറ്റ് പോപ്കോൺ’ ഏതു വർഗീകരണ വിഭാഗത്തിൽപ്പെടുമെന്ന തർക്കവിഷയം പരിഹരിക്കാനും വ്യക്തത വരുത്താനുമാണു കൗൺസിൽ ശുപാർശ ചെയ്തത്.
തിയറ്ററുകളിൽ പോപ്കോൺ വിൽപ്പന കൂടുതൽ ചെലവേറിയതാകുമോ? എന്ന ചോദ്യത്തിന് കേന്ദ്രസർക്കാരിന്റെ മറുപടി ഇങ്ങനെ- സാധാരണയായി, പോപ്കോൺ തിയറ്ററുകളിൽ ഉപഭോക്താക്കൾക്ക് നൽകുന്നത് പാക്ക് ചെയ്യാത്ത നിലയിലാണ്
അതിനാൽ, സിനിമാശാലകളിൽ സ്വതന്ത്രമായി വിതരണം ചെയ്യുന്നിടത്തോളം കാലം ‘റെസ്റ്റോറന്റ് സേവനത്തിന്’ ബാധകമായ 5% നിരക്കാകും തുടർന്നും ഈടാക്കുക.