സിറിയ: ലോകത്തെ സംഘര്‍ഷമേഖലകളില്‍ ജോലിചെയ്ത 54 മാധ്യമപ്രവര്‍ത്തകര്‍ കഴിഞ്ഞവര്‍ഷം കൊല്ലപ്പെട്ടതായി വെളിപ്പെടുത്തല്‍. റിപ്പോര്‍ട്ടേഴ്സ് വിത്തൌട്ട് ബോര്‍ഡേഴ്സിന്റെ (ആര്‍. എസ്. എഫ്) 2024 ലെ റൗണ്ട് – അപ്പിലാണ് ഈ റിപ്പോര്‍ട്ട്.
ഈ വര്‍ഷം ലോകമെമ്പാടും 54 മാധ്യമപ്രവര്‍ത്തകര്‍ കൊല്ലപ്പെട്ടു. ഗാസ, ഇറാഖ്, സുഡാന്‍, മ്യാന്‍മര്‍, ഉക്രെയ്ന്‍ തുടങ്ങിയ സംഘര്‍ഷമേഖലകളില്‍ മാത്രം 31 പേര്‍ കൊല്ലപ്പെട്ടു.
ഈ മരണങ്ങളില്‍ ഏകദേശം 30% ഗാസയിലാണ് സംഭവിച്ചതെന്ന് ആര്‍എസ്എഫിന്റെ ഡേറ്റ വെളിപ്പെടുത്തുന്നു. അവിടെ കുറഞ്ഞത് 35 പത്രപ്രവര്‍ത്തകര്‍ അവരുടെ ജോലിയുമായി നേരിട്ട് ബന്ധപ്പെട്ട് കൊല്ലപ്പെട്ടു.
2023 ഒക്ടോബര്‍ മുതല്‍, ഇസ്രായേല്‍ സൈന്യം ഈ മേഖലയില്‍ 145-ലധികം പത്രപ്രവര്‍ത്തകരുടെ മരണത്തിനു കാരണക്കാരായിട്ടുണ്ട്.
കഴിഞ്ഞ അഞ്ച് വര്‍ഷത്തിനിടയിലെ ഏറ്റവും ഉയര്‍ന്ന മരണനിരക്ക് രേഖപ്പെടുത്തിയ പലസ്തീന്‍, മാധ്യമപ്രവര്‍ത്തകര്‍ക്ക് ഏറ്റവും അപകടകരമായ രാജ്യമായി മാറിയെന്നും റിപ്പോര്‍ട്ട് ചൂണ്ടിക്കാണിക്കുന്നു.
550 മാധ്യമപ്രവര്‍ത്തകര്‍ അറസ്റ്റില്‍
ആഗോളതലത്തില്‍, 550 പത്രപ്രവര്‍ത്തകര്‍ നിലവില്‍ ജയിലിലാണ്, കഴിഞ്ഞ വര്‍ഷത്തെ അപേക്ഷിച്ച് 7% വര്‍ദ്ധനവ്.
ഗാസ ആക്രമണം ആരംഭിച്ചതിനുശേഷം മാധ്യമപ്രവര്‍ത്തകരുടെ മൂന്നാമത്തെ വലിയ ജയിലറായി മാറിയ റഷ്യയിലും ഇസ്രായേലിലും മാധ്യമപ്രവര്‍ത്തകരെ വന്‍ തോതില്‍ തടവിലാക്കിയതാണ് ഈ വര്‍ദ്ധനവിന് കാരണം.
ചൈന (124 പത്രപ്രവര്‍ത്തകര്‍), മ്യാന്‍മര്‍ (61), ഇസ്രായേല്‍ (41), ബെലാറസ് (40) എന്നീ നാല് രാജ്യങ്ങളിലാണ് ലോകമെമ്പാടും തടവിലാക്കപ്പെട്ട മാധ്യമപ്രവര്‍ത്തകരില്‍ പകുതിയോളം പേര്‍ ഉള്ളത്.
കൂടാതെ, 2024 ല്‍ റിപ്പോര്‍ട്ട് ചെയ്യപ്പെട്ട നാല് പുതിയ കേസുകള്‍ ഉള്‍പ്പെടെ 95 മാധ്യമപ്രവര്‍ത്തകരെ കാണാതായതായി റിപ്പോര്‍ട്ടുണ്ട്.