പാലക്കാട്: ഒറ്റപ്പാലത്ത് റോഡരികില്‍ നിര്‍ത്തിയിട്ടിരുന്ന കാര്‍ കുട്ടികള്‍ സ്റ്റാര്‍ട്ട് ചെയ്തതിനെത്തുടര്‍ന്ന് അപകടം. കാറിലുണ്ടായിരുന്ന കുട്ടികളുമായി മുന്നോട്ട് നീങ്ങിയ കാര്‍ എതിര്‍ദിശയിലേക്ക് കടന്ന് മതിലിലേക്ക് ഇടിച്ചുകയറുകയായിരുന്നു.
ഇന്നലെ ഈസ്റ്റ് ഒറ്റപ്പാലത്തായിരുന്നു സംഭവം. റോഡരികില്‍ നിര്‍ത്തിയ കാറില്‍ നിന്ന് ഡ്രൈവര്‍ ഇറങ്ങി നില്‍ക്കുന്നതും മറ്റൊരാളുമായി സംസാരിച്ചുനില്‍ക്കുന്നതും ദൃശ്യങ്ങളില്‍ കാണാം. സാധനങ്ങള്‍ വാങ്ങിയശേഷം കാറിലുണ്ടായിരുന്ന മറ്റു കുടുംബാംഗങ്ങള്‍ വരുന്നതും കാത്തുനില്‍ക്കുന്നതിനിടെയാണ് അപകടമുണ്ടായത്. കാര്‍ ഓടിച്ചിരുന്നയാള്‍ മറ്റൊരാളുമായി സംസാരിച്ചു നില്‍ക്കുകയായിരുന്നു.
ഇതിനിടെ മറ്റു രണ്ടു സ്ത്രീകള്‍ സാധനങ്ങള്‍ വാങ്ങി കാറിന് സമീപത്തേക്ക് എത്തി കുട്ടികളുമായി സംസാരിക്കുന്നതിനിടെ പെട്ടെന്ന് കാര്‍ മുന്നോട്ട് നീങ്ങി. ഇതോടെ കാറുടമ ഡോര്‍ തുറന്ന് വാഹനം നിര്‍ത്താന്‍ ശ്രമിച്ചെങ്കിലും റോഡിന്റെ മധ്യത്തില്‍ തെറിച്ച് വീഴുകയായിരുന്നു. ഇതിനുശേഷമാണ് കാര്‍ മുന്നോട്ട് നീങ്ങി മതിലില്‍ ഇടിച്ച് നിന്നത്.
അപകടത്തിന്റെ സി.സി.ടിവി ദൃശ്യങ്ങള്‍ പുറത്ത് വന്നതിന് പിന്നാലെ പോലീസും മോട്ടോര്‍ വാഹന വകുപ്പും അന്വേഷണം ആരംഭിച്ചു. ആരുടെതാണ് കാറെന്നും എങ്ങനെയാണ് അപകടമുണ്ടായതെന്നതുമടക്കമുള്ള കാര്യങ്ങള്‍ അന്വേഷിച്ചുവരുകയാണെന്നും പോലീസ് അറിയിച്ചു.
ഒറ്റപ്പാലത്ത് നിര്‍ത്തിയിട്ടിരുന്ന കാര്‍ കുട്ടികള്‍ സ്റ്റാര്‍ട്ട് ചെയ്തു; മുന്നോട്ട് നീങ്ങിയ കാര്‍ മതിലില്‍ ഇടിച്ച് അപകടം
Byadmin
Dec 13, 2024