ചെന്നൈ: ഏതെങ്കിലും സംസ്ഥാനത്തിന്റെ ഗവര്‍ണര്‍ ആക്കാമെന്ന് വാഗ്ദാനം നല്‍കി തമിഴ്നാട് സ്വദേശിയെ കബളിപ്പിച്ച് അഞ്ച് കോടി രൂപ തട്ടിയെടുത്ത ഒരാളെ പോലീസ് അറസ്റ്റ് ചെയ്തു.
കുറ്റാരോപിതനായ നിരഞ്ജന്‍ കുല്‍ക്കര്‍ണി ചെന്നൈ നിവാസിയായ നരസിംഹ റെഡ്ഡി ദാമോദര്‍ റെഡ്ഡി അപ്പൂരിയെ ജനുവരി 12-ന് ഒരു ഹോട്ടലില്‍ വച്ച് കാണുകയും തനിക്ക് വ്യാപകമായ രാഷ്ട്രീയ ബന്ധമുണ്ടെന്ന് അവകാശപ്പെട്ട് ഗവര്‍ണര്‍ നിയമനം വാഗ്ദാനം ചെയ്യുകയുമായിരുന്നു.
സര്‍വീസ് ചാര്‍ജായി 15 കോടി രൂപയാണ് കുല്‍ക്കര്‍ണി ആവശ്യപ്പെട്ടത്. ഫെബ്രുവരി 7 ന് കുല്‍ക്കര്‍ണി റെഡ്ഡിയെ കാണുകയും അദ്ദേഹത്തെ ഗവര്‍ണര്‍ ആക്കുമെന്ന വാഗ്ദാനം പാലിക്കപ്പെട്ടില്ലെങ്കില്‍ പകരം ഭൂമി നല്‍കുമെന്ന് വാഗ്ദാനം ചെയ്യുകയും ചെയ്തു
പെഞ്ച്, ബോര്‍ കടുവ സങ്കേതങ്ങള്‍ക്ക് സമീപമുള്ള 100 ഏക്കര്‍ ഭൂമിയുടെ വ്യാജരേഖകള്‍ പ്രതി ഇദ്ദേഹത്തെ കാണിച്ചതായി ഉദ്യോഗസ്ഥര്‍ പറഞ്ഞു.
തുടര്‍ന്ന് നരസിംഹ റെഡ്ഡി അദ്ദേഹത്തിന് 60 ലക്ഷം രൂപ പണമായി നല്‍കുകയും ഫെബ്രുവരി 7 നും ഏപ്രില്‍ 2 നും ഇടയില്‍ 4.48 കോടി രൂപ അയാളുടെ ബാങ്ക് അക്കൗണ്ടിലേക്ക് മാറ്റുകയും ചെയ്തു.
പിന്നീട് താന്‍ കബളിപ്പിക്കപ്പെട്ടുവെന്ന് മനസ്സിലാക്കിയ റെഡ്ഡി പണം തിരികെ ആവശ്യപ്പെട്ടു. എന്നാല്‍ കുല്‍ക്കര്‍ണി ഇയാളെ ഭീഷണിപ്പെടുത്തി, തുടര്‍ന്ന് ഡിസംബര്‍ 7 ന് പരാതി നല്‍കുകയായിരുന്നു.