തിരുവനന്തപുരം: 12-ാമത് യൂറാക്‌സസ് സയന്‍സ് സ്ലാം ഇന്ത്യയുടെ ഫൈനല്‍ മത്സരത്തില്‍ മുംബൈ ടാറ്റാ ഇന്‍സ്റ്റിറ്റ്യൂട്ട് ഓഫ് ഫണ്ടമെന്റല്‍ റിസര്‍ച്ചിലെ (ടിഐഎഫ്ആര്‍) പിഎച്ച്ഡി സ്‌കോളര്‍ സുമന്‍ തിവാരി വിജയിയായി. ജര്‍മ്മന്‍ സാംസ്‌കാരിക കേന്ദ്രമായ ഗോയ്‌ഥെ-സെന്‍ട്രം മത്സരത്തിന് ആതിഥേയത്വം വഹിച്ചു. യൂറാക്‌സസ് സയന്‍സ് സ്ലാം ഇന്ത്യ-2024 ന്റെ ഫൈനലില്‍ മത്സരിച്ച വിവിധ ഗവേഷണ മേഖലകളിലുള്ള നാലു പേരില്‍ നിന്നാണ് വിജയിയെ തിരഞ്ഞെടുത്തത്. യൂറോപ്പിലേക്കുള്ള റൗണ്ട് ട്രിപ്പ് ടിക്കറ്റ് ആണ് വിജയിക്ക് ലഭിക്കുക.
കേരള കാര്‍ഷിക സര്‍വകലാശാല അസി. പ്രൊഫസര്‍ ജിജിന്‍ ടി, ഐഐടി പാലക്കാട് പിഎച്ച്ഡി സ്‌കോളര്‍ ഷബാന കെ എം, ഐഐടി ഖരഗ്പൂര്‍ പിഎച്ച്ഡി സ്‌കോളര്‍ ശ്രേഷ്ഠ ഗാംഗുലി എന്നിവരാണ് മറ്റു ഫൈനലിസ്റ്റുകള്‍. ഫൈനലിസ്റ്റുകള്‍ സദസ്സിനു മുന്നില്‍ അവതരിപ്പിച്ച ഗവേഷണ പ്രവര്‍ത്തനങ്ങള്‍ വിലയിരുത്തിയാണ് വിജയിയെ പ്രഖ്യാപിച്ചത്.
ഗവേഷകര്‍, സംരംഭകര്‍, സര്‍വ്വകലാശാലകള്‍, വ്യവസായങ്ങള്‍ എന്നിവയ്ക്കായി വിവരങ്ങള്‍ നല്‍കുകയും സേവനങ്ങളെ പിന്തുണയ്ക്കുന്നതിനുമായി യൂറോപ്യന്‍ യൂണിയന്‍ സംഘടിപ്പിക്കുന്നതാണ് യൂറാക്‌സസ്.
തിരുവനന്തപുരം ഗോയ്‌ഥെ-സെന്‍ട്രത്തിലെ ഫാക്കല്‍റ്റി ഷെറീന്‍ ഷിഹാബ്, ഇന്ത്യയിലെ യൂറോപ്യന്‍ യൂണിയന്‍ പ്രതിനിധി പിയറിക് ഫിലോണ്‍-ആഷിദ എന്നിവര്‍ ഉദ്ഘാടന ചടങ്ങില്‍ സംസാരിച്ചു. യൂറാക്‌സസ് കണ്‍ട്രി റപ്രസെന്റേറ്റീവ് ഡോ. സാമ്രാട്ട് എസ്. കുമാര്‍ സന്നിഹിതനായിരുന്നു.
ജര്‍മ്മനി, ഇറ്റലി, ഫ്രാന്‍സ്, നെതര്‍ലന്‍ഡ്‌സ്, ഡെന്‍മാര്‍ക്ക്, ഫിന്‍ലന്‍ഡ്, സ്വിറ്റ്‌സര്‍ലന്‍ഡ് തുടങ്ങിയ യൂറോപ്യന്‍ രാജ്യങ്ങളില്‍ നിന്നുള്ള പ്രതിനിധികള്‍ യൂറോപ്പിലെ പഠന-ഗവേഷണ സാധ്യതകളെക്കുറിച്ചുള്ള അവതരണങ്ങള്‍ നടത്തി.
യൂറോപ്പിലെ പഠന, ഗവേഷണ സാധ്യതകള്‍, യൂറോപ്യന്‍ യൂണിയന്‍ ഗവേഷണ കരിയര്‍ വികസന പരിപാടികള്‍, സയന്‍സ് കമ്മ്യൂണിക്കേഷന്‍ എന്നിവയെക്കുറിച്ച് അറിയാന്‍ സന്ദര്‍ശകര്‍ക്ക് അവസരം ലഭിച്ചിരുന്നു. പരിപാടിയുടെ ഭാഗമായി സംഘടിപ്പിക്കുന്ന നെറ്റ് വര്‍ക്കിംഗ് ഡിന്നറില്‍ പങ്കെടുത്തവര്‍ക്ക് യൂറാക്‌സസ് ഇന്ത്യ, ഗോയ്‌ഥെ-സെന്‍ട്രം, ജര്‍മ്മന്‍ കോണ്‍സുലേറ്റ്, ഇന്ത്യയിലേക്കുള്ള യൂറോപ്യന്‍ യൂണിയന്‍ പ്രതിനിധികള്‍, യൂറോപ്യന്‍ യൂണിയന്‍ അംഗരാജ്യങ്ങളുടെ പ്രതിനിധികള്‍, അക്കാദമിക്-ഇതര പ്രതിനിധികള്‍, സയന്‍സ് സ്ലാം ജൂറിയിലെ അംഗങ്ങള്‍ എന്നിവരുമായി സംവദിക്കാനും അവസരം ലഭിച്ചു.
സിഎന്‍ആര്‍എസ് ഇന്ത്യ, യൂറോപ്യന്‍ യൂണിയന്റെ ഇന്ത്യയിലെ പ്രതിനിധി, ചെക്ക് റിപ്പബ്ലിക് എംബസി, ഫെഡറല്‍ റിപ്പബ്ലിക് ഓഫ് ജര്‍മ്മനി എംബസി, ന്യൂഡല്‍ഹിയിലെ ഇറ്റലി എംബസി, ന്യൂ ഡല്‍ഹിയിലെ സ്ലോവേനിയ എംബസി, ന്യൂഡല്‍ഹിയിലെ സ്വീഡന്റെ എംബസി, ഗോയ്‌ഥെ-സെന്‍ട്രം തിരുവനന്തപുരം, ദി നെതര്‍ലാന്‍ഡ്‌സ് ഇന്നൊവേഷന്‍ നെറ്റ് വര്‍ക്ക് എന്നിവയാണ് യൂറാക്‌സസ് സയന്‍സ് സ്ലാം ഇന്ത്യ-2024 സംഘടിപ്പിക്കുന്നത്.
യൂറാക്‌സസ് സയന്‍സ് സ്ലാം ഇന്ത്യ ഫൈനല്‍ മത്സരം: ടിഐഎഫ്ആര്‍ സ്‌കോളര്‍ സുമന്‍ തിവാരി വിജയി ഫൈനല്‍ മത്സരത്തിന് ഗോയ്‌ഥെ – സെന്‍ട്രം ആതിഥേയത്വം വഹിച്ചു
Byadmin
Dec 7, 2024