സാധാരണയായി ഒരു താരം മറ്റൊരു താരത്തിന്റെ സിനിമയുടെ ചടങ്ങുകളില്‍ പങ്കെടുക്കുന്ന പതിവില്ല. പ്രത്യേകിച്ച് തമിഴ് സിനിമാ രംഗത്ത്. ഇതിന് വിരുദ്ധമായ ഒന്നായിരുന്നു കഴിഞ്ഞ ദിവസം ചെന്നൈയില്‍ നടന്ന സിദ്ധാര്‍ത്ഥിന്റെ റൊമാന്റിക് കംബാക്ക് ചിത്രമായ ‘ മിസ് യു ‘ വിന്റെ ഓഡിയോ – ട്രെയിലര്‍ ലോഞ്ച്.
നടന്‍ കാര്‍ത്തിയായിരുന്നു വിശിഷ്ട അതിഥിയായി എത്തി ട്രെയിലര്‍ ലോഞ്ച് നടത്തിയത്. ട്രെയിലര്‍ പുറത്തിറക്കി സംസാരിച്ച താരം ഇന്നത്തെ പിള്ളേര്‍ക്ക് പ്രണയ കഥാ ചിത്രങ്ങളാണ് ഇഷ്ടം. എന്നാല്‍ അത് മനസിലാക്കാതെ ആക്ഷന്‍ സിനിമകള്‍ നിര്‍മ്മിക്കുന്നതുലാണ് എല്ലാവരുടെയും ശ്രദ്ധ എന്ന് അഭിപ്രായപ്പെട്ടു.
കാര്‍ത്തിയുടെ വാക്കുകള്‍…
‘ ഇന്നത്തെ നമ്മുടെ പിള്ളേര്‍ അധികവും ഉപയോഗിക്കുന്ന വാക്കുകളാണ് ‘ ലൗ യൂ ‘ , ‘ മിസ് യു ‘ എന്നിവ. അതില്‍ തന്നെ വളരെ ആകര്‍ഷകമായ വാക്കായ ‘ മിസ് യു ‘ വിനെയാണ് ടൈലറ്റില്‍ ആയി സ്വീകരിച്ചിരിക്കുന്നത്.
ആണ്‍ കുട്ടികള്‍ സോഷ്യല്‍ മീഡിയായില്‍ ചെയ്യുന്ന പോസ്റ്റുകളൊക്കെ ലൗ പോസ്റ്റുകളാണ്. പക്ഷെ നമ്മള്‍ എടുത്തു കൊണ്ടിരിക്കുന്നതൊക്കെ ആക്ഷന്‍ സിനിമകളാണ്.
വീണ്ടും ഒരു ആക്ഷന്‍ സിനിമ എടുത്ത്, അതില്‍ ഒരു ലൗ ഫെയിലിയര്‍ പാട്ടും , മദ്യപാന രംഗവുമായി ഈ സിനിമ ഞാന്‍ പഠിക്കുന്ന കാലത്ത് കണ്ട് ആസ്വദിച്ച സിനിമ പോലെ തോന്നുന്നു ഇതിന്റെ ട്രെയിലര്‍ കാണുമ്പോള്‍.
‘ ഇളയ ദളപതി ‘ വിജയ് സാറിന്റെ ‘ തുള്ളാത മനമും തുള്ളും ‘ എന്ന സിനിമ എനിക്ക് ഏറ്റവും ഇഷ്ടപ്പെട്ട സിനിമയാണ്. അതിലെ പാട്ടുകള്‍, പ്രണയം, അതിനെ ചുറ്റി പറ്റിയുള്ള വിഷയങ്ങള്‍ എന്നിങ്ങനെ അത് ഇപ്പോള്‍ കണ്ടാലും ഉത്സാഹവും ഉന്മേഷവും നല്‍കും.
അതു പോലുള്ള സിനിമകള്‍ക്കായി ആരാധകര്‍ ആകാംക്ഷയോടെ കാത്തിരിക്കയാണ്. എന്നാല്‍ അത്തരം സിനിമകള്‍ ഇപ്പോള്‍ എടുക്കുന്നില്ല. സിദ്ധാര്‍ഥ് ‘ ബോയ്‌സ് ‘ സിദ്ധാര്‍ത്ഥ് ആയതു കൊണ്ട് ഇപ്പോഴും പ്രേമിച്ചു കൊണ്ടിരിക്കുന്നു.
കാഴ്ചയിലും ചെറുപ്പമായതു കൊണ്ട് അദ്ദേഹത്തിന് അതു വലിയ സൗകര്യമാണ്. ഈ സിനിമ എന്റെ യൗവ്വന കാലത്തിലേക്ക് കൂട്ടികൊണ്ടു പോകുന്ന ഒന്നായിരിക്കും. എന്നെ പോലെ തന്നെ പ്രേക്ഷകരെയും… സിദ്ധാര്‍ത്ഥ് ഒരു സിനിമ തിരഞ്ഞെടുക്കുന്നുവെങ്കില്‍ അതില്‍ എന്തെങ്കിലും പ്രത്യേകത ഇല്ലാതിരിക്കില്ല.
‘ മിസ് യു ‘ നായിക ആഷിക രംഗനാഥ് എന്റെ നായികയായി ‘ സര്‍ദാര്‍ 2 ‘ – ല്‍ അഭിനയിക്കുന്നുണ്ട്. വളരെ സിന്‍സിയറായ നടിയാണ് അവര്‍. ‘ മിസ് യു ‘വില്‍ അവരെ കാണാന്‍ അതീവ സുന്ദരിയായിട്ടുണ്ട്. അവര്‍ക്ക് എന്റെ ആശംസകള്‍. ഇത് യൂത്തിന്റെ സിനിമയാണ്. റൊമാന്റിക് എന്റര്‍ടൈനറായ ‘ മിസ് യു ‘ വന്‍ വിജയമാകട്ടെ എന്ന് ആശംസിക്കുന്നു. ‘സിദ്ധാര്‍ത്തിനെയും സംഘത്തെയും പ്രശംസിച്ചു കൊണ്ട് കാര്‍ത്തി പറഞ്ഞു.
കാര്‍ത്തി പുറത്തിറക്കിയ ‘ മിസ് യു ‘ വിന്റെ ട്രെയിലര്‍ ഒറ്റ ദിവസം കൊണ്ട് ഒരു മില്യനിലേറെ കാഴ്ച്ക്കാരെ ആകര്‍ഷിച്ചു കൊണ്ടു യൂ ട്യൂബില്‍ തരംഗമായി മുന്നേറുകയാണ്. അതു തന്നെ സിനിമയെ കുറിച്ചുള്ള പ്രതീക്ഷ വര്‍ധിപ്പിച്ചിരിക്കയാണ്.
സിദ്ധാര്‍ത്ഥ് റൊമാന്റിക് ഹീറോ ആയി തിരിച്ചെത്തുന്ന റൊമാന്റിക് ഫീല്‍ ഗുഡ് സിനിമയായിരിക്കും എന്‍. രാജശേഖര്‍ തിരക്കഥ എഴുതി സംവിധാനം ചെയ്ത ‘ മിസ് യു ‘ എന്നാണ് അണിയറശില്പികള്‍ പറയുന്നത്. 7 മൈല്‍ പെര്‍ സെക്കന്റ്‌സിന്റെ ബാനറില്‍ മലയാളിയായ സാമുവല്‍ മാത്യുവാണ് ചിത്രം നിര്‍മ്മിച്ചിരിക്കുന്നത്.
ജിബ്രാനാണ് സംഗീതം. ശരത് ലോഹിത്ഷാ,പൊന്‍വണ്ണന്‍, ജെ പി, നരേന്‍, കരുണാകരന്‍, ബാല ശരവണന്‍, അനുപമ കുമാര്‍, രമ, ഷഷ്ടിക എന്നിങ്ങനെ പ്രഗല്‍ഭരായ അഭിനേതാക്കള്‍ മറ്റു കഥാപാത്രങ്ങളെ അവതരിപ്പിക്കുന്നു. ഡിസംബര്‍ 13 ന് റെഡ് ജെയിന്റ് മൂവീസ് ചിത്രം റിലീസ് ചെയ്യും.
– സി. കെ. അജയ് കുമാര്‍.
