ലഖ്‌നൗ: മഹീന്ദ്ര ഥാര്‍ എസ്.യു.വിയുടെ മുകളില്‍ മണ്ണുകയറ്റി റോഡിലൂടെ അഭ്യാസപ്രകടനം നടത്തിയ ആള്‍ പിടിയില്‍. ഉത്തര്‍പ്രദേശിലെ മീററ്റില്‍ മുണ്ഡലി ഗ്രാമത്തിലെ ഇന്ദെസാര്‍ അലി എന്നയാളാണ് പിടിയിലായത്.
സംഭവത്തിന്റെ വീഡിയോ സമൂഹികമാധ്യങ്ങളില്‍ വൈറലായിരുന്നു. ഇതേത്തുടര്‍ന്ന് പോലീസ് ഇയാളെയും വാഹനവും കസ്റ്റഡിയില്‍ എടുക്കുകയായിരുന്നു. എസ്.യു.വിയുടെ റൂഫിലേക്ക് ഇയാള്‍ മണ്‍വെട്ടി കൊണ്ട് മണ്ണ് കയറ്റി ഇടുന്നതും പിന്നീട് വാഹനവുമായി ഇയാള്‍ അമിതവേഗത്തില്‍ റോഡിലൂടെ പോകുന്നതും റൂഫിലെ മണ്ണ് പറക്കുന്നതും ദൃശ്യങ്ങളിലുണ്ട്.
