ശെമ്മാങ്കുടി സ്‌മൃതി ദിനാചരണവും ഭാരത് ഭവൻ സംസ്ഥാനതല കലാലയ ചെറുകഥാ പുരസ്‌കാര സമർപ്പണവും നടന്നു

വിഖ്യാത കർണ്ണാടക സംഗീതജ്ഞൻ  ശെമ്മാങ്കുടി ശ്രീനിവാസ ഭാഗവതരുടെ 21-mw ഓർമ്മ ദിനാചരണവും പ്രശസ്ത സാഹിത്യകാരനും ഭാരത് ഭവൻ മുൻ മെമ്പർ സെക്രട്ടറിയുമായിരുന്ന സതീഷ് ബാബു പയ്യന്നൂരിന്റെ ഓർമ്മയ്ക്കായ് ഭാരത് ഭവൻ ഒരുക്കിയ പ്രഥമ സംസ്ഥാനതല കലാലയ ചെറുകഥാ മത്സരവിജയികൾക്കുള്ള പുരസ്‌ക്കാര സമർപ്പണവും ഭാരത് ഭവനിലെ നിറഞ്ഞ സദസ്സിൽ നടന്നു.  ഭാരത് ഭവനിലെ ശെമ്മാങ്കുടി പ്രതിമയ്ക്ക് മുന്നിൽ 21  ചിരാതുകളിൽ ദീപ പ്രകാശനത്തോടെയും പുഷ്പാർച്ചനയോടെയും ചടങ്ങുകൾക്ക്  തുടക്കമായി.
 
കലാലയ ചെറുകഥാ മത്സരത്തിൽ യഥാക്രമം ഒന്ന് മുതൽ മൂന്ന് വരെയുള്ള സ്ഥാനങ്ങൾ കരസ്ഥമാക്കിയ സൈനബ.എസ്, അദ്വൈത്.പി.ആർ, ഡി.പി. അഭിജിത്ത് എന്നിവർക്ക് ക്യാഷ് അവാർഡും  പ്രശസ്തി പത്രവും ഫലകവും അടങ്ങുന്ന പുരസ്‌ക്കാരങ്ങൾ  സമ്മാനിച്ചു. ഭാരത് ഭവൻ മെമ്പർ സെക്രട്ടറി ഡോ.പ്രമോദ് പയ്യന്നൂരിന്റെ അധ്യക്ഷതയിൽ നടന്ന  ഓർമ്മകൂട്ടായ്മ കവി പ്രഭാവർമ്മ ചടങ്ങ് ഉദ്ഘാടനം ചെയ്ത് പുരസ്‌ക്കാരങ്ങൾ സമ്മാനിച്ചു. കുമാര കേരള വർമ്മ, ശെമ്മാങ്കുടി ഓർമ്മ പ്രഭാഷണം നടത്തി. ഭാരത് ഭവ ന്റെയും, വീണാ സംഗീത് സംഘിന്റെ സംയുക്‌താഭിമുഖ്യത്തിൽ സ്വാതിതിരുനാൾ സംഗീത കോളേജ്, തിരുവനന്തപുരം വിമൻസ് കോളേജ് എന്നിവരുടെ സഹകരണത്തോടെയാണ് സ്‌മൃതി ദിനം ആചരിച്ചത്.
ചെറുകഥാകൃത്ത് സി.അനൂപ് സതീഷ് ബാബു പയ്യന്നൂർ സ്മൃതി ഭാഷണവും, ചെറുകഥാ കൃത്തും സഞ്ചാര സാഹിത്യകാരനുമായ ശ്രീ.കെ.ആർ.അജയൻ കലാലയ കഥകളുടെ അവലോകനവും നടത്തി. സ്വാതി തിരുനാൾ സംഗീത കോളേജിലെ വിദ്യാർത്ഥികളും, വിമൻസ് കോളജിലെ സംഗീത വിദ്യാർത്ഥികളും, ഒരുക്കിയ  സംഗീത അർച്ചന, ഹിന്ദുസ്ഥാനിസംഗീതഞ്ജ അബ്രദിതാ ബാനർജിയുടെ സ്വാതി ഖയാൽ, പാർവ്വതിപുരം പദ്മനാഭ അയ്യരുടെ ശിഷ്യർ അവതരിപ്പിച്ച   ശെമ്മാങ്കുടി ശ്രീനിവാസ ഭാഗവതർ സംഗീതം നൽകിയ സ്വാതി തിരുനാളിന്റെ പ്രശസ്ത ഭാവയാമി രഘുരാമം -കീർത്തനത്തിന്റെ ആലാപനം, ചെറു കഥാ മത്സരത്തിൽ ഒന്നാം സ്ഥാനം ലഭിച്ച കഥയുടെ പാരായണം എന്നീ അവതരണങ്ങളും അരങ്ങേറി.
പാൽകുളങ്ങര അംബിക ദേവി, ലളിത ഗോപാലൻ നായർ, പ്രൊഫ.രുഗ്മിണി ഗോപാല കൃഷ്ണൻ, മൃദംഗ വിദ്വാൻ തിരുവനന്തപുരം വി. സുരേന്ദ്രൻ, ദേശീയ അധ്യാപക പുരസ്‌ക്കാര ജേതാവ് പാർവതീപുരം പദ്മനാഭ അയ്യർ, പ്രൊഫ.ഈശ്വരവർമ്മ, ഗിരിജ സതീഷ്ബാബു എന്നിവരും ഓർമ്മക്കൂട്ടായ്മയിൽ സന്നിഹിതരായി . വീണ സംഗീത സംഘ് സെക്രട്ടറി ടി.എൻ.ശ്രീകുമാരൻ തമ്പി സ്വാഗതവും, അഡ്വ.റോബിൻ സേവ്യർ നന്ദിയും രേഖപെടുത്തി.