കോട്ടയം: നഗരത്തിലെ നടപ്പാതകള്‍ കൈയ്യേറി കച്ചവടം നടത്തുന്നതു തടയാന്‍ നടപടിയില്ല. വഴിയോരക്കച്ചവടക്കാര്‍ മുതല്‍ വ്യാപാര സ്ഥാപനങ്ങളിലെ ഡിസ്പ്ലേ വരെ നടപ്പാതയിലേക്ക് ഇറക്കിവെച്ചിരിക്കുകയാണ്. തിരക്കേറിയ റോഡിലേക്കു കാല്‍നടയാത്രക്കാര്‍ ഇറങ്ങി നടക്കേണ്ട സ്ഥിതിയാണ്.
നടപ്പാതകളില്‍ തടസം സൃഷ്ടിച്ചാണ് അനധികൃത പാര്‍ക്കിങ്ങും തട്ടുകടകളും ചെറുകിട കച്ചവടങ്ങളും. രാത്രികാലങ്ങളില്‍ നടപ്പാത കയ്യേറിയാണു കച്ചവടം. കച്ചവടം കഴിഞ്ഞ് ഉന്തുവണ്ടികളും കച്ചവടസാമഗ്രികളും സൂക്ഷിച്ചു വയ്ക്കുന്നതും നടപ്പാതകളിലാണ്. ചിലരാകട്ടേ നടപ്പാത കെട്ടിയടച്ച് അവിടെ ഡിസ്പ്ലേയും സ്ഥാപിച്ചു കഴിഞ്ഞു. ആളുകള്‍ വേണമെങ്കില്‍ റോഡില്‍ ഇറങ്ങി നടക്കട്ടേയെന്ന നിലപാടാണ് ഇത്തരക്കാര്‍ക്കുള്ളത്.
കോട്ടയം നഗരത്തില്‍ തന്നെ ഇത്തരം കാഴ്ച കാണാമെന്നതാണ് ഏറെ അത്ഭുതപ്പെടുത്തുന്നതും. സ്‌കൂള്‍ കുട്ടികള്‍ ഉള്‍പ്പടെ നടന്നു പോകുന്ന എസ്.എച്ച്. മൗണ്ട് ചവിട്ടുവരി ജങ്ഷനിലാണ് വ്യാപാരികളുടെ പരസ്യമായ കൈയ്യേറ്റം. നാട്ടുകാര്‍ പരാതിപറഞ്ഞിട്ടും നടപ്പാത കെട്ടിയടച്ചതു തുറന്നു നല്‍കാന്‍ നടപടിയില്ല. അധികൃതരാകട്ടേ കണ്ട ഭാഗവം പോലും നടിക്കുന്നില്ലെന്നും നാട്ടുകാര്‍ പറയുന്നു.
അതേ സമയം തകര്‍ന്നു കിടക്കുന്ന നടപ്പാതകള്‍ നന്നാക്കാനും നടപടിയില്ല. ആഴ്ചകള്‍ക്കു മുമ്പ് ഓടകള്‍ നന്നാക്കാനെന്ന പേരില്‍ മിനുക്കുപണികള്‍ നടത്തിയെങ്കിലും കുഴികള്‍ ഇപ്പോഴും ബാക്കിയാണ്. കാല്‍നട യാത്രക്കാര്‍ക്കു സുരക്ഷിതമായി സഞ്ചരിക്കാനാണു നടപ്പാതകളെങ്കിലും നഗരത്തില്‍ ഇവ നോക്കുകുത്തിയാകുകയാണ്.
ബേക്കര്‍ ജങ്ഷന്‍, കഞ്ഞിക്കുഴി, എം.സി. റോഡ്, കെ.എസ്.ആര്‍.ടി.സി. തുടങ്ങി നിരവധിയിടങ്ങളില്‍ സ്ഥാപിച്ചിരിക്കുന്ന നടപ്പാതകള്‍ പലതും തകര്‍ന്നു. നടപ്പാതയിലെ ഇന്റലോക്ക് ടൈലുകളാണു തകര്‍ന്നത്. നടക്കാന്‍ കഴിയാത്ത തരത്തില്‍ ടൈലുകള്‍ ഇളകിയ നിലയിലാണ്.
നടപ്പാതകള്‍ കൈയ്യേറി കച്ചവടം നടത്തുന്നതു തടയാന്‍ നടപടിയില്ല, വ്യാപാര സ്ഥാപനങ്ങളുടെ ഡിസ്പ്ലേ സ്ഥാപിച്ചിരിക്കുന്നത് നടപ്പാത കെട്ടിയടച്ച്; ഇളകിയ ടൈലുകള്‍ നന്നാക്കാനെന്ന പേരില്‍ മിനുക്കുപണികള്‍ നടത്തിയിട്ടും കുഴികള്‍ ബാക്കി
Byadmin
Oct 14, 2024