കൊച്ചി: മജിസ്‌ട്രേറ്റ് ചമഞ്ഞ് തട്ടിപ്പ് നടത്തിയ യുവതി അറസ്റ്റില്‍. പത്തനംതിട്ട സ്വദേശി ജിഷ കെ. ജോയിയാണ് എറണാകുളം സൗത്ത് പിടിയിലായത്.
ഹൈക്കോടതിയില്‍ ജോലി വാഗ്ദാനം ചെയ്ത് എറണാകുളം സ്വദേശിയില്‍ നിന്ന് എട്ടര ലക്ഷം രൂപ തട്ടിയെടുത്ത കേസിലാണ് ജിഷ പിടിയിലായത്. നാലു വര്‍ഷത്തിനിടെ 8,65,000 രൂപയാണ് തട്ടിയെടുത്തത്.
ഹൈക്കോടതിയില്‍ അഭിഭാഷകയായിരുന്നെന്നും നിലവില്‍ മജിസ്‌ട്രേറ്റായി നിയമനം ലഭിച്ചെന്നും തെറ്റിദ്ധരിപ്പിച്ചായിരുന്നു തട്ടിപ്പ്. എറണാകുളം സ്വദേശിയായ പരാതിക്കാരന്റെ ബന്ധുവിന്റെ സ്ഥാപനത്തില്‍ സ്ഥിരം സന്ദര്‍ശകയായിരുന്നു ജിഷ. ഇയാള്‍ക്ക് ഹൈക്കോടതിയില്‍ അസിസ്റ്റന്റായി ജോലി വാഗ്ദാനം ചെയ്തായിരുന്നു തട്ടിപ്പ്.
2020ല്‍ രണ്ടേകാല്‍ ലക്ഷവും കഴിഞ്ഞ വര്‍ഷം ആറര ലക്ഷവും വാങ്ങി. വിദേശത്തുള്ള ബന്ധുവിന്റെ പഠനാവശ്യത്തിനെന്നു പറഞ്ഞായിരുന്നു കഴിഞ്ഞ വര്‍ഷം പണം കൈപ്പറ്റിയത്.
ജോലി കിട്ടായതോടെ പരാതിക്കാരന്‍ പണം തിരികെ ചോദിച്ചു, എന്നാല്‍ പണം ലഭിച്ചില്ല. ഇതോടെ പരാതി എറണാകുളം സൗത്ത് പോലീസിലെത്തി. ജിഷയെ പോലീസ് സ്റ്റേഷനിലേക്ക് വിളിച്ചുവരുത്തിയ ശേഷം അറസ്റ്റ് രേഖപ്പെടുത്തി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
ഹൈക്കോടതിയില്‍ ജോലി വാഗ്ദാനം ചെയ്ത് കൊച്ചിയില്‍ മജിസ്‌ട്രേറ്റ് ചമഞ്ഞ് തട്ടിപ്പ്; യുവതി അറസ്റ്റില്‍
Byadmin
Oct 5, 2024