തെറ്റായ ദിശയിലെത്തിയ എസ് യു വി ഇടിച്ച് തെറിപ്പിച്ച ബൈക്ക് യാത്രികന് ദാരുണാന്ത്യം

ഗുരുഗ്രാം: ഗുരുഗ്രാമില്‍ എസ് യു വി ഇടിച്ച് ബൈക്ക് യാത്രികന് ദാരുണാന്ത്യം. തെറ്റായ ദിശയിലെത്തിയ എസ് യു വി ബൈക്ക് ഇടിച്ചു തെറുപ്പിക്കുകയായിരുന്നു. 
അമിത വേഗതയില്‍ എത്തിയ മഹീന്ദ്ര 3 എക്‌സ് ഒ വാഹനം യുവാവിനെ  ഇടിച്ച് തെറിപ്പിക്കുന്ന ദൃശ്യങ്ങള്‍ മറ്റൊരു വാഹനത്തിലെ ക്യാമറയില്‍ പതിഞ്ഞിരുന്നു. ഞായറാഴ്ചയാണ് അപകടമുണ്ടായത്. സംഭവത്തില്‍ അറസ്റ്റിലായ എസ് യു വി ഡ്രൈവറെ പിന്നീട് ജാമ്യത്തില്‍ പുറത്തിറങ്ങി. 
അപകടത്തില്‍ കൊല്ലപ്പെട്ട യുവാവിന്റെ സുഹൃത്തിന്റെ ഗോ പ്രോ ക്യാമറയിലാണ് അപകട ദൃശ്യങ്ങള്‍ പതിഞ്ഞത്. അക്ഷത് ഗാര്‍ഗ് എന്ന യുവാവാണ് കൊല്ലപ്പെട്ടത്. കുല്‍ദീപ് താക്കൂര്‍ എന്നയാളാണ് സംഭവത്തില്‍ അറസ്റ്റിലായത്. 
അപകടം നടന്ന ഉടനേ തന്നെ യുവാവിനെ ആശുപത്രിയില്‍ എത്തിച്ചെങ്കിലും യുവാവിനെ രക്ഷിക്കാനായില്ല. സംഭവത്തില്‍ കുല്‍ദീപ് താക്കൂറിനെതിരെ മനപൂര്‍വ്വമുള്ള നരഹത്യ, അശ്രദ്ധമായി വാഹനം ഓടിച്ച് അപകടമുണ്ടാക്കല്‍ അടക്കമുള്ള വകുപ്പുകള്‍ ചുമത്തിയാണ് കേസ് എടുത്തിരിക്കുന്നത്.