മറ്റക്കരയിൽ ബൈക്കുകൾ കൂട്ടിയിടിച്ചു മധ്യവയസ്കന് ദാരുണാന്ത്യം. ഒപ്പമുണ്ടായിരുന്ന മകൾക്ക് ഗുരുതര പരിക്ക്. അപകടം മകളെ ജോലിക്ക് വിടാനായി പോകുന്നതിനിടെ

കോട്ടയം: മറ്റക്കരയിൽ ബൈക്കുകൾ കൂട്ടിയിടിച്ചുണ്ടായ അപകടത്തിൽ മധ്യവയസ്കൻ മരിച്ചു. ഒപ്പമുണ്ടായിരുന്ന മകൾക്ക് ഗുരുതര പരിക്ക്. മകളെ ജോലിക്ക് വിടാനായി പോകുന്നതിനിടെയാണ്  ബൈക്ക് അപകടത്തിൽപ്പെട്ട്  പിതാവിന് ജീവൻ നഷ്ടമായത്. അരുവിക്കുഴി വരിക്കമാക്കൽ സെബാസ്റ്റ്യൻ ജയിംസാണ് (55) മരിച്ചത്.
വെള്ളിയാഴ്ച  വൈകിട്ട് 6.30നു മഞ്ഞാമറ്റം – മണൽ റോഡിൽ രണ്ടുവഴിയിൽ വച്ചായിരുന്നു സംഭവം. ഒപ്പമുണ്ടായിരുന്ന മകൾ മെറിനെ (24) ഗുരുതര പരുക്കുകളോടെ പാലായിലെ സ്വകാര്യ ആശുപത്രിയിൽ പ്രവേശിപ്പിച്ചു.
പാലായിലെ ആശുപത്രിയിൽ നഴ്‌സായി ജോലി ചെയ്യുന്ന മെറിനെ കൊണ്ടു വിടാൻ പോകുന്നതിനിടയിൽ എതിരെ വന്ന ബൈക്കുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ സെബാസ്‌റ്റ്യൻ അവിടെവച്ച് തന്നെ മരണപ്പെട്ടു. സീനിയർ എൽ.ഐ.സി ഏജന്റായിരുന്നു സെബാസ്റ്റ്യൻ. പൂഞ്ഞാർ അടിവാരം വാഴയിൽ എൽസമ്മ സെബാസ്‌റ്റ്യനാണ് ഭാര്യ. മറ്റു മക്കൾ മെൽവിൻ, മാഗി.