അൺസെന്റ് ആയ മെസേജുകൾ എളുപ്പം കാണാനാവുന്ന തരത്തിൽ ഡ്രാഫ്റ്റ് ചെയ്യുന്ന സംവിധാനമാണ് വാട്സ്ആപ്പിലേക്ക് വരുന്നത് എന്നാണ് വാബെറ്റ് ഇൻഫോയുടെ റിപ്പോർട്ട്. ഇപ്പോൾ ആൻഡ്രോയ്ഡ് ബീറ്റ ടെസ്റ്റർമാർക്ക് ലഭ്യമായിട്ടുള്ള ഈ ഫീച്ചർ വൈകാതെ ലോഞ്ച് ചെയ്യും. വളരെ പ്രതീക്ഷയോടെയാണ് ഡ്രാഫ്റ്റ് ലേബൽ വാട്സ്ആപ്പ് അവതരിപ്പിക്കുന്നത്. അപൂ‍‍ർണമായ സന്ദേശമായി ഇത്തരം മെസേജുകൾ ചാറ്റ് ബോക്സിൽ കാണാനാകും.
അൺസെന്റ് ആയ മെസേജുകൾ കൃത്യമായി ഇതിൽ രേഖപ്പെടുത്തിയിരിക്കും. എല്ലാ മെസേജുകളും ഓപ്പൺ ചെയ്ത് പരിശോധിക്കാതെ തന്നെ അൺസെന്റ് മെസേജുകൾ എളുപ്പത്തിൽ കണ്ടെത്താൻ ഇത് സഹായിക്കും. ഏറ്റവും അവസാനം ഡ്രാഫ്റ്റായ മെസേജായിരിക്കും ചാറ്റ് ലിസ്റ്റിൽ ആദ്യം കാണിക്കുക. വളരെ സുപ്രധാനമായ മെസേജുകൾ അൺസെന്റ് ആവുകയോ മിസ്സാവുകയോ ചെയ്താൽ കണ്ടെത്താൻ പുതിയ ഫീച്ചർ സഹായകമാകും.
വാട്സ്ആപ്പ് കൂടുതൽ യൂസർ ഫ്രണ്ട്ലി ആക്കുന്നതിന്റെ ഭാഗമായാണ് പുതിയ ഫീച്ചറുകൾ അവതരിപ്പിക്കുന്നത്. ഫേവറൈറ്റ് എന്നൊരു ഫീച്ചർ അടുത്തിടെ വാട്സ്ആപ്പ് അവതരിപ്പിച്ചിരുന്നു. പ്രധാനപ്പെട്ട കോണ്‍ടാക്റ്റുകളും ഗ്രൂപ്പുകളും കോളുകളും ഫേവറൈറ്റ്‌സുകളായി സെലക്ട് ചെയ്ത് വെക്കാനാവുന്ന സംവിധാനമാണിത്. സ്ഥിരമായി മെസേജ് അയക്കുകയോ കോള്‍ ചെയ്യുകയോ ചെയ്യുന്ന കോണ്‍ടാക്റ്റുകളും സജീവമായി നോക്കുകയോ ഇടപെടുകയോ ചെയ്യുന്ന ഗ്രൂപ്പുകളെയും ഇതോടെ എളുപ്പം നിങ്ങള്‍ക്ക് കണ്ടെത്താനാകും.
