കോട്ടയം: കെ.എസ്.ആര്‍.ടി.സി ബസില്‍ മദ്യം കടത്തിയ രണ്ടു ജീവനക്കാര്‍ക്കെതിരെ നടപടി. പൊന്‍കുന്നം ഡിപ്പോയുടെ മണക്കടവ് ഫാസ്റ്റ് പാസഞ്ചര്‍ ബസിലാണ് 5 കുപ്പി വിദേശമദ്യം കടത്തിയ സംഭവത്തില്‍ രണ്ടു ജീവനക്കാര്‍ക്കെതിരെ നടപടി സ്വീകരിച്ചത്.
പൊന്‍കുന്നം ഡിപ്പോയിലെ ബദലി (താത്കാലികം) വിഭാഗം കണ്ടക്ടറായ ഇടക്കുന്നം സ്വദേശി ഫൈസലിനെ ജോലിയില്‍ നിന്നു പിരിച്ചുവിടുകയും, ഡ്രൈവര്‍ വി.ജി.രഘുനാഥനെ സസ്‌പെന്‍ഡ് ചെയ്യുകയും ചെയ്തു.
ഈ മാസം 10ന് കെ.എസ്.ആര്‍.ടി.സി. വിജിലന്‍സ് സ്‌ക്വാഡ് കോഴിക്കോട് ബസ് സ്റ്റാന്‍ഡില്‍ വച്ചു നടത്തിയ പരിശോധനയിലാണ് 750 മില്ലിലിറ്റര്‍ വീതമുള്ള 5 കുപ്പി വിദേശം മദ്യം കണ്ടക്ടറുടെ സീറ്റിനടിയിലെ ബോക്‌സില്‍ നിന്നും കണ്ടെടുത്തത്. ഇവ എക്‌സൈസിനു കൈമാറി.
ഡ്രൈവര്‍ കം കണ്ടക്ടര്‍ ജീവനക്കാരനായ ഫൈസല്‍ അന്നു കണ്ടക്ടര്‍ ഡ്യൂട്ടിയിലായിരുന്നു. കെ.എസ്.ആര്‍.ടി.സി വിജിലന്‍സ് വിഭാഗം എക്‌സിക്യൂട്ടീവ് ഡയറക്ടര്‍ എ.ഷാജിയാണു നടപടി സ്വീകരിച്ച് ഉത്തരവിറക്കിയത്.
പൊന്‍കുന്നം ഡിപ്പോയുടെ ബസില്‍ മുമ്പും മദ്യം കടത്തല്‍ ഉണ്ടായിട്ടുണ്ട്. അന്നും ജീവനക്കാര്‍ക്കെതിരെ നടപടിയുണ്ടായിരുന്നു. മണക്കടവ് ബസില്‍ പതിവായി മദ്യക്കടത്തുണ്ടെന്നു രഹസ്യവിവരം ലഭിച്ചതിനെ തുടര്‍ന്നായിരുന്നു പരിശോധന.
കെ.എസ്.ആര്‍.ടി.സി ബസില്‍ മദ്യം കടത്തി; രണ്ട് ജീവനക്കാര്‍ക്കെതിരെ നടപടി, 5 കുപ്പി മദ്യം കണ്ടെത്തിയത് കണ്ടക്ടറുടെ സീറ്റിനടിയിലെ ബോക്സിൽ നിന്നും
Byadmin
Aug 22, 2024