അയല്‍വീട്ടില്‍ വഴക്ക് നടക്കുന്നെന്ന് ആരോ ഫോണ്‍ വിളിച്ച് പറഞ്ഞു;  അന്വേഷിക്കാനെത്തിയ പോലീസ് മര്‍ദ്ദിച്ചത് വഴിയാത്രക്കാരനെ; പോലീസിനെതിരേ പരാതി

കോട്ടയം: കുടുംബ പ്രശ്‌നം അന്വേഷിക്കാനെത്തിയ പോലീസ് ആളുമാറി വഴിയാത്രക്കാരനെ മര്‍ദിച്ചെന്ന് പരാതി. അമലഗിരി ഓട്ടക്കാഞ്ഞിരം കറുകശേരി കെ.എം. മാത്യു(48)വാണ് കോട്ടയം ഗാന്ധിനഗര്‍ പോലീസ് സ്റ്റേഷനിലെ എ.എസ്.ഐക്കെതിരെ ഉന്നത പോലീസ് അധികൃതര്‍ക്ക് പരാതി നല്‍കിയത്. പരിക്കേറ്റ മാത്യു കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. 
ചൊവ്വാഴ്ച രാത്രി എട്ടിന് ഓട്ടക്കാഞ്ഞിരം കവലയിലാണ് സംഭവം. രോഗിയായ അമ്മയ്ക്ക് മരുന്നു വാങ്ങി വീട്ടിലേക്ക് പോകവെ പോലീസ് ജീപ്പ് അടുത്തുനിര്‍ത്തിയശേഷം പുറത്തിറങ്ങിയ എ.എസ്.ഐ. ലാത്തികൊണ്ട് അടിക്കുകയായിരുന്നെന്ന് മാത്യു പറഞ്ഞു. വിവാഹിതനല്ലെന്നും ഡി.വൈ.എസ്.പിയുടെ വീട്ടിലെ ജോലിക്കാരനാണെന്നും പറഞ്ഞപ്പോള്‍ പരിഹസിച്ചെന്നും പരാതിയിലുണ്ട്. 
ഈ ഭാഗത്തുള്ള വീട്ടില്‍ വഴക്ക് നടക്കുന്നതുമായി ബന്ധപ്പെട്ട് ഒരാള്‍ പോലീസിനെ ഫോണില്‍ വിളിച്ചറിയിച്ചിരുന്നു. ഇത് അന്വേഷിക്കാനെത്തിയ പോലീസ് ആളുമാറിയാണ് മാത്യുവിനെ അടിച്ചതെന്ന് സംശയിക്കുന്നു. അതേസമയം, പരാതി നല്‍കിയ വ്യക്തിയുടെ സമീപം മാത്യുവിനെ കണ്ടപ്പോള്‍ ശാസിച്ച് പറഞ്ഞുവിട്ടതേയുള്ളൂവെന്നും അടിച്ചിട്ടില്ലെന്നുമാണ് പോലീസിന്റെ പ്രതികരണം. സംഭവത്തില്‍ പോലീസ് അന്വേഷണം ആരംഭിച്ചു.